25-Dec-2025

ତୁଷୁରା (ପଞ୍ଚାନନ ନାଏକ )ବଲାଙ୍ଗୀର ଜିଲ୍ଲା ଗୁଡଭେଲା ବ୍ଲକ ଅନ୍ତର୍ଗତ ଘୁନା ହାଇସ୍କୁଲଠାରେ ଶିକେରପାଟ୍ ମହୋତ୍ସବ କମିଟୀ ଖଡଙ୍ଗା ଅଞ୍ଚଳ ଦ୍ବାରା ସ୍ବେଚ୍ଛାକୃତ ରକ୍ତଦାନ ଶିବିର ଅନୁଷ୍ଠିତ ହୋଇଯାଇଛି ।  ଶିବିରରେ ମୋଟ ୪୭ ଜଣ ୪୩ ପୁରୁଷ ଓ ୪ ମହିଳା ରକ୍ତଦାନ କରିଥିଲେ l  ଏହି ଅବସରରେ ମହୋତ୍ସବ କମିଟିର ସଭାପତି ରୋହିତ ମାଝୀଙ୍କ ସଭାପତିତ୍ୱରେ ଅନୁଷ୍ଠିତ ସଭାରେ  ମୁଖ୍ୟ ଅତିଥି ଭାବେ ଗୁଡଭେଲ ବ୍ଳକ ପୂର୍ବତନ  ଅଧ୍ୟକ୍ଷ ଅଶୋକ ଦୋରା, ସମ୍ମାନିତ ଅତିଥି ଗୁଡଭେଲା ଗୋଷ୍ଟି ସ୍ୱାସ୍ଥ୍ୟକେନ୍ଦ୍ରର ଡ଼. ସମୀର ଆଚାର୍ଯ୍ୟ, ଭାଗବତ ନାହାକ, ଘୁନା ସରପଞ୍ଚ କବିତା ମହାନନ୍ଦ  ଉପସ୍ଥିତ ରହି ରକ୍ତଦାତାଙ୍କୁ ଉତ୍ସାହିତ କରିଥିଲେ । ମଞ୍ଚ ପରିଚାଳନା ଓ ସ୍ୱାଗତ ଭାଷଣ ମହୋତ୍ସବ କମିଟି ସମ୍ପାଦକ  ଲମ୍ବୋଦର ମନହିରା ପ୍ରଦାନ କରିଥିବାବେଳେ,ଧୁବଳେଶ୍ବର ସାହୁ ଧନ୍ୟବାଦ ଅର୍ପଣ କରିଥିଲେ । ରକ୍ତ ଭଣ୍ଡାର କାଉନସିଲର ଶେଖ ଅସରଫ ଓ ରକ୍ତ ପରୀକ୍ଷକ ଲକ୍ଷ୍ମୀଧର ସାହୁ, ରଞ୍ଜିତ ବେହେରା ଙ୍କ ସହ ଗୁଡଭେଲା ଗୋଷ୍ଟି ସ୍ୱାସ୍ଥ୍ୟ କେନ୍ଦ୍ର ସ୍ବାସ୍ଥ୍ୟ ଅଧିକାରୀ ଡ଼. ସୂର୍ଯ୍ୟକାନ୍ତ ପତ୍ର ପ୍ରମୁଖ ଉପସ୍ଥିତ ଥିଲେ l ଏଥିରେ ମହୋତ୍ସବ କମିଟୀର  ସମସ୍ତ ସଦସ୍ୟ ସଦସ୍ୟା ସହଯୋଗ କରିଥିଲେ ।
ଅପରପକ୍ଷରେ  ଖଡଙ୍ଗା ଅଞ୍ଚଳ ଲୋକ ସାହିତ୍ୟ, ସଂସ୍କୃତି ଓ ପରମ୍ପରାକୁ ପୁଣିଥରେ ଆସନ୍ତା ଡିସେମ୍ବର ୨୫ରୁ ୨୯ ତାରିଖରେ ପର୍ଯ୍ୟନ୍ତ  ଶିକେରପାଟ୍ ମହୋତ୍ସବ ୨୦୨୫-୨୬ ଅନୁଷ୍ଠିତ ହେବାକୁ ସମସ୍ତ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଥିବାବେଳେ ରାଜ୍ୟର ବିଭିନ୍ନ ଜିଲ୍ଲାର ସାଂସ୍କୃତିକ ଦଳ ଅଂଶଗ୍ରହଣ କରିବା ସହ ମିନା ବଜାର ପଲ୍ଲୀଶ୍ରୀ ମେଳା ଓ କୃଷି ମେଳାର ମଧ୍ୟ ବ୍ୟବସ୍ଥା ରହିଥିବା କମିଟୀ ପକ୍ଷରୁ ସୂଚନା ମିଳିଛି ।