30-Jan-2021

ବଲାଙ୍ଗୀର (ପ୍ରେରଣା ଖବର)-ମହାତ୍ନା ଗାନ୍ଧୀଙ୍କୁ ଜାଣିବାକୁ ହେଲେ ତାଙ୍କୁ ସନ୍ଥ ଭାବରେ ଦେଖିବାକୁ ପଡିବ । ସେ ରାଜନୀତିରେ ଜଣେ ଅସଫଳ ମଣିଷ ଥିଲେ ମଧ୍ୟ ତାଙ୍କର ସେବା ଶ୍ରଦ୍ଧା ଓ ତଥା ଅହିଂସା ସାରା ବିଶ୍ୱକୁ ଏକ ନୂତନ ଦିଗ୍‌ଦର୍ଶନ ଦେଇଥିଲା ବୋଲି ଆଜି ଗାନ୍ଧୀ ସ୍ମୃତି କମିଟି ପକ୍ଷରୁ ସ୍ଥାନୀୟ ଯାଦବ ଭବନ ଠାରେ ଆୟୋଜିତ ‘ସେବା ଓ ଶ୍ରଦ୍ଧା- ଜୀବନ ଏକ ନିବେଦନ’ ଶୀର୍ଷକ ଆଲୋଚନାଚକ୍ରରେ ମୁଖ୍ୟ ଅତିଥି ଭାବରେ ଯୋଗ ଦେଇ ଏହା କହିଛନ୍ତି ରାଜେନ୍ଦ୍ର ବିଶ୍ୱବିଦ୍ୟାଳୟର ବାଣିଜ୍ୟ ବିଭାଗର ଅବସରପ୍ରାପ୍ତ ପ୍ରଧ୍ୟାପକ ରବି ଶଙ୍କର ପାଣ୍ଡିଆ । ଆଜିର ଗାନ୍ଧୀଙ୍କ ତିରୋଧାନ ଦିବସର ଏହି ସଭାକୁ ଦିବଙ୍ଗତ ସମାଜସେବୀ ଲଳିତ କୁମାର ନାୟକଙ୍କ ଉଦ୍ଦେଶ୍ୟରେ ସମର୍ପିତ କରାଯାଇଥିଲା ।  ପ୍ରଥମେ ଅତିଥି ମାନେ ମହାତ୍ମା ଗାନ୍ଧୀଙ୍କ ଫଟୋଚିତ୍ରରେ ପୁଷ୍ପଗୁଚ୍ଛ ପ୍ରଦାନ କଲା ପରେ ବିଶିଷ୍ଟ ସମାଜସେବୀ ଲଳିତ କୁମାର ନାୟକଙ୍କ ଅମର ଆତ୍ମାର ସଦ୍‌ଗତି ପାଇଁ ଦୁଇ ମିନିଟ ନିରବ ପ୍ରାର୍ଥନା କରାଯାଇଥିଲା । ଗାନ୍ଧୀ ସ୍ମୃତି କମିଟିର ଆବାହକ ପ୍ରଶାନ୍ତ ମହାକୁଡଙ୍କ ପରିଚାଳନାରେ ଆୟୋଜିତ ଏହି ସଭାରେ   ସମ୍ମାନିତ  ବକ୍ତା ଭାବରେ ସୂଚନା ଅଧିକାର କର୍ମୀ ହେମନ୍ତ ପଣ୍ଡା ଯୋଗ ଦେଇ ଗାନ୍ଧୀଜୀଙ୍କୁ ଜଣେ ସର୍ବୋଦୟ ନେତା ଭାବରେ ବିବେଚନା କରିବା ସହ ଗାନ୍ଧୀଜୀଙ୍କ ସେବା ମନୋଭାବ, ଶ୍ରଦ୍ଧା, ସେବା ଓ ନିବେଦନର ଐଶରୀୟ ଗୁଣ ଦିବଙ୍ଗତ ଲଳିତ ନାୟକଙ୍କ ମଧ୍ୟରେ ରହିଥିଲା ବୋଲି କହିଥିଲେ । ଅନ୍ୟତମ ବକ୍ତା ଭାବରେ ନାଟ୍ୟଭୂଷଣ ଜଗଦାନନ୍ଦ ଛୁରିଆ ଓ ବରିଷ୍ଠ ସାମ୍ବାଦିକ ସତ୍ୟନାରାୟଣ ବେହେରା ମଂଚାସୀନ ରହି ଗାନ୍ଧୀଜୀଙ୍କ ଆଦର୍ଶ ଓ ଜୀବନଶୈଳୀର ଏବେ ମଧ୍ୟ ପ୍ରସଙ୍ଗିକତା ରହିଛି ବୋଲି କହିଥିଲେ । ଆଜି ଲଳିତ ନାୟକଙ୍କ ଆବର୍ତ୍ତମାନରେ ତାଙ୍କ ଆଦର୍ଶରେ ସମଗ୍ର ଯୁବ ସମାଜ ଅନୁପ୍ରାଣିତ ହେବା ଉଚିତ ବୋଲି ବକ୍ତା ଦ୍ୱୟ ମତ ପ୍ରକାଶ କରିଥିଲେ । ଅନ୍ୟ ମାନଙ୍କ ମଧ୍ୟରେ ବିଷ୍ଣୁ ପ୍ରସାଦ କେଡିଆ, ଜୟରାମ ମିଶ୍ର, ମନୋରଂଜନ ସାହୁ, ବିଭୁ କଲ୍ଯାଣ ଗଡତିଆ, ଗୋପଭୂଷଣ ନlଥ, ପୂର୍ଣ୍ଣଚନ୍ଦ୍ର ପଣ୍ଡା ପ୍ରମୁଖ  ଉପସ୍ଥିତ ଥିଲେ । ସଭା ପ୍ରାରମ୍ଭରେ ସାମ୍ବାଦିକ ବୀରେନ୍ଦ୍ର କୁମାର ଝାଙ୍କର ପ୍ରାରମ୍ଭିକ ସୂଚନା ପ୍ରଦାନ କରିଥିବା ବେଳେ  ବିନୋଦ କାଲସାଏ ଧନ୍ୟବାଦ ଅର୍ପଣ କରିଥିଲେ ।