12-Oct-2025

 ତୁଷୁରା( ପଞ୍ଚାନନ ନାଏକ) ତୁଷୁରା ବିଜ୍ଞାପିତ ଅଞ୍ଚଳ ପରିଷଦ ସଭାଗୃହରେ ଆଜି ଶିକେରପାଟ୍ ମହୋତ୍ସବ କମିଟି, ଖଡଙ୍ଗା ଅଞ୍ଚଳ ପକ୍ଷରୁ ଏକ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଥିଲା। ସମ୍ମିଳନୀକୁ କମିଟିର ସମ୍ପାଦକ ଶ୍ରୀ ଲମ୍ବୋଦର ମନହିରା ଅଧ୍ୟକ୍ଷତା କରିଥିଲେ। ସମ୍ମିଳନୀରେ ଜଣାଇ ଯାଇଥିଲା ଯେ, ଗୁଡଭେଲା ବ୍ଲକର ଘୁନା, ବିରାମୁଣ୍ଡା, ଜାମୁଟ ଓ ଗମ୍ଭାରିଗୁଡା ଗ୍ରାମପଞ୍ଚାୟତର ସମସ୍ତ ଜନସାଧାରଣଙ୍କ ଇଷ୍ଟଦେବତା ହେଉଛନ୍ତି ପ୍ରଭୁ ଶିକେରପାଟ୍। ପ୍ରତ୍ୟେକ ଶୁଭ କାର୍ଯ୍ୟ ପୂର୍ବରୁ ଶିକେରପାଟ୍ ନାମ ଉଚ୍ଚାରଣ ହେଉଛି ଏଠାର ଆଞ୍ଚଳିକ ପରମ୍ପରା। ଏହି ଆଦିପରମ୍ପରାକୁ ଅବିକଳ ରଖିବା ଓ ଅଞ୍ଚଳର ଏକତା ସୂତ୍ରକୁ ଶକ୍ତିଶାଳୀ କରିବା ଉଦ୍ଦେଶ୍ୟରେ ଏହି ମହୋତ୍ସବ ପାଳନ ହେଉଛି।ଖଡଙ୍ଗା ଅଞ୍ଚଳରେ ୪ ଗ୍ରାମପଞ୍ଚାୟତ ଓ ୩୨ ମୌଜା ରହିଛି। ଏହି ଭୂଖଣ୍ଡ ପୂର୍ବରେ ଖଡଙ୍ଗ ନଦୀ, ପଶ୍ଚିମରେ ରାହୁଲ, ଉତ୍ତରରେ ତେଳ ଓ ଦକ୍ଷିଣରେ କାଳୀ ଗଙ୍ଗାଜୋର ନଦୀ ଦ୍ୱାରା ପରିବେଷ୍ଟିତ। ପ୍ରାୟ ୨୫,୦୦୦  ଏକର ଭୂଭାଗରେ ଏହି ଅଞ୍ଚଳ ଅବସ୍ଥିତ ଥିବାରୁ ଏହା ଏକ ବିଶାଳ ସଂସ୍କୃତିକ ଏକକ ଭାବେ ପରିଚିତ।ପ୍ରଭୁ ଶିକେରପାଟଙ୍କ ବାର୍ଷିକ ଯାତ୍ରା ପ୍ରତିବର୍ଷ ଦୁଇଥର— ଆଷାଢ଼ ଓ ପୌଷ ଶୁକ୍ଳ ପକ୍ଷ ଦ୍ୱିତୀୟା ତିଥିରେ— ପାଳନ ହୁଏ। ଚଳିତ ବର୍ଷ ପୌଷ ଶୁକ୍ଳ ପକ୍ଷ ଦ୍ୱିତୀୟା ତିଥି ୨୩ ଡିସେମ୍ବର ୨୦୨୫ରେ ଯାତ୍ରା ପାଳନ ହେବ। ଏହି ଅବସରରେ ୨୫ ଡିସେମ୍ବର ରୁ ୨୯ ଡିସେମ୍ବର ୨୦୨୫ ପର୍ଯ୍ୟନ୍ତ ଶିକେରପାଟ୍ ମହୋତ୍ସବ ଆୟୋଜିତ ହେବ। ମହୋତ୍ସବ ସ୍ଥାନ ହେବ କୁମ୍ଭାରପଦର ଖେଳପଡିଆ, ଘୁନା ମହୋତ୍ସବରେ ସ୍ଥାନୀୟ ଓ ଆଞ୍ଚଳିକ କଳାକାର ଙ୍କୁ ଗୁରୁତ୍ୱଦେଇ ମଞ୍ଚ ସୃଷ୍ଟି ହେବ l ଏହା ସହିତ ଓଡ଼ିଶା ସରକାରଙ୍କ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ର ସହଯୋଗରେ ଜିଲ୍ଲା ଓ ରାଜ୍ୟ ଅଞ୍ଚଳର ସାଂସ୍କୃତିକ ଦଳ ଅଂଶଗ୍ରହଣ କରିବେ। ସେହିପରି, କେନ୍ଦ୍ର ସଂସ୍କୃତି ବିଭାଗ ର ସହଯୋଗରେ ରାଜ୍ୟବାହାର ର ଦଳ ମଧ୍ୟ ଅଂଶଗ୍ରହଣ କରିବେ। ମହୋତ୍ସବ ସମୟରେ ଲୋକମାନଙ୍କ ସାଂସ୍କୃତିକ ଓ ଆର୍ଥିକ ରୁଚି ପୂରଣ ପାଇଁ ମୀନାବଜାର ଓ ପଲ୍ଲିଶ୍ରୀ ମେଳା ଆୟୋଜନ ହେବ। ସେହିପରି ମାଗଣା ଚିକିତ୍ସା ଶିବିର, ସ୍ୱେଚ୍ଛାକୃତ ରକ୍ତଦାନ ଶିବିର, ଓ ଛାତ୍ରଛାତ୍ରୀଙ୍କ ପାଇଁ ବିଭିନ୍ନ

ପ୍ରତିଯୋଗିତା ଆୟୋଜନ ହେବ। ଶିକେରପାଟ୍ ମହୋତ୍ସବ ହେଉଛି ଏକ ଏକତାର ପର୍ବ—ଯେଉଁଠି ଜାତି, ଧର୍ମ, ବର୍ଣ୍ଣ, ଲିଙ୍ଗ ନିର୍ବିଶେଷରେ ସମସ୍ତେ ଏକତ୍ରିତ ହୋଇ ଲୋକକଳା, ସାହିତ୍ୟ, ସଂସ୍କୃତି ଓ ପରମ୍ପରାକୁ ଅଭିନବ ରୂପରେ ପ୍ରତିପାଦନ କରା ଯାଇଥାଏ l ଭାଗବତ ନାହାକ ଉଦ୍ଦେଶ୍ୟ ଜ୍ଞାପନ କରିଥିବା ବେଳେ ଧୁବଳେଶ୍ବର ସାହୁ ଅତିଥି ପରିଚୟ ପ୍ରଦାନ କରିଥିଲେ l ସାମ୍ବାଦିକ ସମ୍ମିଳନୀରେ ଦାଶରଥି ପଧାନ,ଲକ୍ଷ୍ମଣ ସାହୁ, ଚିନ୍ତାମଣି ରଣା, ହାଡୁ ବଗର୍ତ୍ତୀ,ଖୁସିରାମ ଭୋଇ,ଦୀଲିପ ଭୋଇ,ରଞ୍ଜନ ମହାକୁର,ରାମଚନ୍ଦ୍ର ରଣା ଉପସ୍ଥିତ ଥିବାବେଳେ ନାରାୟଣ ଦାସ ଧନ୍ୟବାଦ ଅର୍ପଣ କରିଥିଲେ l