24-Sep-2025

(ରାମନାଥ ପଣ୍ଡା)
 ନୂଆପଡ଼ା ଜିଲ୍ଲା ଖରୀଆର ପଞ୍ଚାୟତ ସମିତି ସଭା ଗୃହରେ ଜିଲ୍ଲା ମୁଖ୍ୟ ଉନ୍ନୟନ ଅଧିକାରୀ ଲମ୍ବୋଦର ଧରୁଆଙ୍କ ଅଧ୍ୟକ୍ଷତାରେ ବ୍ଲକ ସ୍ତରୀୟ ସାମାଜିକ ସମୀକ୍ଷାର ଜନ ଶୁଣାଣୀ ଶିବିର ଅନୁଷ୍ଠିତ ହୋଇଯାଇଛି।ସମ୍ମାନିତ ଅତିଥି ରୂପେ କମିଟି ସଦସ୍ୟ ଅଜିତ କୁମାର ପଣ୍ଡା ଓ ଜିତେନ୍ଦ୍ର ପଟ୍ଟନାୟକ,ଡି ଏସ ଏ ମିଳନ କୁମାର ପତି,ବ୍ଲକ ଉପାଧ୍ୟକ୍ଷା ଗୌତମ ତାଣ୍ଡି,ଜିଲ୍ଲା ପରିଷଦ ସଦସ୍ୟ ଚିତ୍ତରଞ୍ଜନ ବେହେରା,ଜିଲ୍ଲା ପରିଷଦ ସଦସ୍ୟ ମଳୟ ବନ୍ତ ସୁନା,ଅତିରିକ୍ତ ଗୋଷ୍ଠୀ ଉନ୍ନୟନ ଅଧିକାରୀ ଖୀତିସୂତା ବାଗ, ଏ ପି ଓ ଜିତେନ୍ଦ୍ର ସାହୁ ପ୍ରମୁଖ ମଞ୍ଚାସିନ ଥିଲେ ।ଗତ ୨୦୨୪-୨୫ ଆର୍ଥିକ ବର୍ଷର ଜାତୀୟ ଖାଦ୍ୟ ସୁରକ୍ଷାର ସମୀକ୍ଷା ଅବଧି ଥିବାବେଳେ,୨୦୨୫-୨୬ ଆର୍ଥିକ ବର୍ଷର ମନରେଗାର ପ୍ରଥମ ପର୍ଯ୍ୟାୟର ସାମାଜିକ ସମୀକ୍ଷା କରାଯାଇଥିଲା। କାର୍ଯ୍ୟକ୍ରମରେ ୧୯୫ ଗୋଟି ଭିନ୍ନ ଭିନ୍ନ ସମସ୍ୟାର ଶୁଣାଣୀ କରାଯାଇଥିବା ବେଳେ ସି ଡି ଓ ଲମ୍ବୋଦର ଧରୁଆ ସମସ୍ତ ସମସ୍ୟାର ପୁଙ୍ଖାନୁପୁଙ୍ଖ ଆଲୋଚନା କରିଥିଲେ ଏବଂ ବିଭିନ୍ନ ଅଭିଯୋଗର କାର୍ଯ୍ୟାନୁଷ୍ଠାନ ପାଇଁ କଡ଼ା ପଦକ୍ଷେପ ଗ୍ରହଣ କରିବାକୁ ନିର୍ଦ୍ଦେଶ ଦେଇଥିଲେ ।ଜାତୀୟ ଖାଦ୍ୟ ସୁରକ୍ଷା ଅନ୍ତର୍ଗତ କାର୍ଯ୍ୟକ୍ରମରେ ମୃତ ବ୍ୟକ୍ତି ମାନଙ୍କ ପରିବାରକୁ ଚାଉଳ/ ରାସନ ଦେବା ଅଭିଯୋଗରେ ସମସ୍ତ ଚାଉଳ ରିକୋଭରି କରିବା ପାଇଁ ଯୋଗାଣ ନିରୀକ୍ଷକଙ୍କୁ ନିର୍ଦ୍ଦେଶ ଦେଇଥିଲେ ।ଏତଦ୍ ବ୍ୟତୀତ ମନରେଗା କାର୍ଯ୍ୟର ସମସ୍ତ ସମସ୍ୟାକୁ ଦୃଷ୍ଟିରେ ରଖି ଆଗାମୀ ଦିନ ମାନଙ୍କରେ ଯେପରି କୌଣସି ଭୂଲ ନ ହୁଏ ସେଥି ପ୍ରତି ସଜାଗ ହେବା ପାଇଁ ନିର୍ଦ୍ଦେଶ ଦେଇଥିଲେ ।ଠିକ୍ ସମୟରେ ଶ୍ରମିକଙ୍କ ପାଉଣା ପୈଠ,ଲୋକଙ୍କୁ ସଚେତନ କରି ନିୟମ ଅନୁସାରେ ବାର୍ଷିକ ୧୦୦ ଦିନର କାମ ଯୋଗାଇବା ପାଇଁ ଏବଂ ବିଭିନ୍ନ ସ୍ଥାୟୀ ସମ୍ପତ୍ତି ସୃଷ୍ଟି କରିବା ସହିତ ଲୋକଙ୍କ ଜୀବିକାକୁ ସୁଦୃଢ଼ କରିବା ପାଇଁ ମଧ୍ୟ ନିର୍ଦ୍ଦେଶ ଦେଇଥିଲେ।ସାମାଜିକ ସମୀକ୍ଷା ସମୟରେ ଯାଞ୍ଚ ନିମନ୍ତେ ନଥିପତ୍ର , କେଶ ରେକର୍ଡ ଦେଉ ନଥିବାରୁ ବିଭାଗୀୟ ଅଧିକାରୀ ମାନଙ୍କ ବିରୁଦ୍ଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ମଧ୍ୟ ନିର୍ଦ୍ଦେଶ ଦେଇଥିଲେ।ବି ଏସ ଏ ପ୍ରଦୀପ କୁମାର ବେହେରା ସମସ୍ତ ପ୍ରକାର ସହଯୋଗ କରୁଥିଲେ ।ଉକ୍ତ ଶିବିରରେ ସମସ୍ତ ସରପଂଚ,ଭି ଆର୍ ପି,ପି ଇ ଓ, ଏ ଡି ଇ ଓ,ଜି ଆର୍ ଏସ,ପଞ୍ଚାୟତରୁ ଆସିଥିବା ସମସ୍ତ ହିତାଧିକାରୀ ଯୋଗ ଦେଇଥିଲେ ।