19-Sep-2025

ନର୍ଲା ( ଚିନ୍ତାମଣି ନାଏକ)
ରାଜ୍ୟସରକାର ୨୦୦୬/୨୦୦୭ ମସିହାରେ ଜଙ୍ଗଲ ଜମି ଅଧିକାର ଆଇନ ବଳରେ ପଟ୍ଟା ପ୍ରଦାନ କରାଯିବ ବୋଲି ଘୋଷଣା କରିଥିଲେ ମଧ୍ୟ ନର୍ଲା ବ୍ଲକ ଅଞ୍ଚଳର ବିଭିନ୍ନ ପଦରରେ ବସବାସ କରୁଥିବା ଏହି ଆଦିବାସୀ ମାନଙ୍କୁ ଆଜିଯାଏଁ ସେମାନେ ରହୁଥିବା ଜଙ୍ଗଲ ଜମିର ପଟ୍ଟା ମିଳିପାରି ନାହିଁ । ଏଥିପାଇଁ ପ୍ରତିବର୍ଷ ଦୁଇଥର ଏମାନଙ୍କୁ ନେଇ ସିପିଆଇଏମଏଲ ଜାଗ୍ରତ ସମିତି ତରଫରୁ ବ୍ଲକ ଓ ତହସିଲ ଘେରାଉ କରି ଦାବୀ ପତ୍ର ପ୍ରଦାନ କରାଯାଉଥିଲେ ମଧ୍ୟ ଏହା ଅରଣ୍ୟରୋଦନ ସାଜୁଛି । ଗତ ବର୍ଷ ନର୍ଲା ବିଡିଓ ଟୁଟୁଙ୍ଗ ଝୁଲା ପଦରକୁ ଯାଇ ଜଙ୍ଗଲଜମିରେ ବସବାସ କରୁଥିବା ଆଦିବାସୀ ମାନଙ୍କ ସହ ଆଲୋଚନା ଥିଲେ ହେଲେ ବର୍ଷ ହେଇଗଲା ଆବାସ ଯୋଜନା ରେ ଘର ତିଆରି ନିମନ୍ତେ କାର୍ଯ୍ୟାଦେଶ ଦିଆଯାଇଥିଲେ ମଧ୍ୟ କାହିଁକି ଗୃହ ନିର୍ମାଣ କରୁନ ବୋଲି ପ୍ରଶ୍ନ କରିଥିଲେ । ଏମାନଙ୍କୁ ସେମାନଙ୍କ ଜଙ୍ଗଲ ଜମି ଛାଡି ଅନ୍ୟ ଗ୍ରାମରେ ୪ ଡିସିମିଲ ଲେଖାଏଁ ଜାଗା ପ୍ରଦାନ କରାଯିବ । ସେଥିରେ ସେମାନେ ଆବାସ ଯୋଜନାରେ ଘର କରି ରୁହନ୍ତୁ ବୋଲି ପ୍ରସ୍ତାବ ଦେଇଥିଲେ । ହେଲେ ଏମାନେ ନିଜ ପୂର୍ବ ପୁରୁଷରୁ ରହି ଆସିଥିବା ଜଙ୍ଗଲ ଜମି ଜାଗା ଛାଡି ଅନ୍ୟତ୍ର ରହିବା ପାଇଁ ନାରାଜ ଅଛନ୍ତି । ସେମାନଙ୍କ ଦାବୀ ସେମାନେ ରହି ଆସୁଥିବା ଜଙ୍ଗଲ ଜମିର ପଟ୍ଟା ସରକାର ଦିଅନ୍ତୁ ସେଠାରେ ସେମାନେ ଆବାସ ଯୋଜନାରେ ଘର କରି ରହିବେ ବୋଲି । ଏଥିପାଇଁ ଗରୁବାର ସିପିଆଇଏମଏଲର ଜିଲ୍ଲା ସାଧାରଣ ସମ୍ପାଦକ ସଂଗ୍ରାମୀ ନେତା କେଶବ ପଧାନ ଓ ସହ ସମ୍ପାଦକ ଦୟାସାଗର ନାଏକଙ୍କ ନେତୃତ୍ୱରେ 
 ୧୦୦ ରୁ ଉର୍ଦ୍ଧ୍ୱ ମହିଳା ଓ ପୁରୁଷ ନର୍ଲା ବ୍ଲକ କୁ ଆସି ସେମାନେ ରହୁଥିବା ଜାଗାର ଜଙ୍ଗଲ ଜମି ଆଇନ ଅନୁଯାୟୀ ପଟ୍ଟା ପ୍ରଦାନ କରାଯାଉ ଏବଂ ଆବାସ ଯୋଜନାରେ ଘର ପ୍ରଦାନ କରାଯାଉ ବୋଲି ନର୍ଲା ବିଡିଓ ବିପିନ ବିହାରୀ ଦୀପଙ୍କ ମାଧ୍ୟମରେ ମୁଖ୍ୟମନ୍ତ୍ରୀ ଙ୍କୁ ଦାବୀ ପ୍ରତ୍ର ପ୍ରଦାନ କରିଥିଲେ।