26-Jan-2021

ବୌଦ୍ଧ (ପ୍ରେରଣା ଖବର) : ଭାରତୀୟ ଷ୍ଟେଟ୍ ବ୍ୟାଙ୍କ୍ ଏଟିଏମରୁ ବାହାରିଲା କାଗଜ ପେଷ୍ଟ ଥିବା ନୋଟ୍ । ନୋଟ୍ ଫେରସ୍ତ ନେବାକୁ ମନାକରିଦେଇଛି ବ୍ୟାଙ୍କ୍ । ଏମିତିରେ ଟଙ୍କା ଉଠାଇ ସମସ୍ୟାରେ ପଡିଛନ୍ତି ଜଣେ ଚାଷୀ ।

ସୂଚନାଯୋଗ୍ୟ ଯେ, ସୋମବାର ଦିନ ବୌଦ୍ଧ ଜିଲ୍ଲା ଚାରି ଛକ ସ୍ଥିତ ଭାରତୀୟ ଷ୍ଟେଟ୍ ବ୍ୟାଙ୍କ୍ ଏଟିଏମରୁ ଟଙ୍କା ଉଠାଇବାକୁ ଯାଇଥିଲେ ସ୍ଥାନୀୟ ଅଞ୍ଚଳର ଜଣେ ଚାଷୀ । ସେ ଏଟିଏମରୁ ୯ ହଜାର ଲେଖାଏଁ ମୋଟ୍ ୧୮ ହଜାର ଟଙ୍କା ଉଠାଇଥିଲେ । ତେବେ ଟଙ୍କା ଉଠାଇବାବେଳେ କାଗଜ ପେଷ୍ଟ ଥିବା ୨୦ଟି ୫ ଶହ ଟଙ୍କିଆ ନୋଟ୍ ଏଟିଏମରୁ ବାହାରିଥିଲା । ତେବେ ସେହି ନୋଟ୍ ଗୁଡିକ ସେ ବ୍ୟାଙ୍କକୁ ନେଇ ଫେରସ୍ତ କରିବାକୁ ଯାଇଥିଲେ ସୁଦ୍ଧା ସେବୁକୁ ନେବାକୁ ମନା କରିଦେଇଛନ୍ତି ବ୍ୟାଙ୍କ୍ କର୍ତ୍ତୃପକ୍ଷ ।

ତେବେ ଏଭଳି କାଗଜ ପେଷ୍ଟ ଥିବା ନୋଟ୍ ଗୁଡିକ କିଭଳି ଏଟିଏମ୍ ମଧ୍ୟକୁ ଆସିଲା, କେମିତି ବ୍ୟାଙ୍କ୍ କର୍ତ୍ତୃପକ୍ଷ ଏହା ଜାଣିପାରିଲେନାହିଁ ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି ।