06-Aug-2025

ବରୀ(ରଞ୍ଜିତମହାନ୍ତି): ବ୍ରାହ୍ମଣୀ-କେଲୁଅ ଘେରିବନ୍ଧ ବରୀ ଦ୍ବୀପାଞ୍ଚଳର ବନ୍ୟା ସମସ୍ୟା ଦୂର କରିବା ଉଦ୍ଦେଶ୍ୟରେ ନିର୍ମାଣ କରାଯାଇଥିଲା। ବିରୂପା ନଦୀ ମୁହାଣରେ ଗମୁ ଓ ମହାକାଳ ପଡ଼ାରେ ୨ଟି ବଡ଼ବଡ଼ ସୁଇସ୍ ଗେଟ୍ ରହିଛି। ମାତ୍ର ପ୍ରତିବର୍ଷ ଏହାର ପରିଚାଳନା ଗତ ତ୍ରୁଟି ପାଇଁ ତଳ ଅଞ୍ଚଳ ଯଥା ମହାକାଳପଡ଼ା, ଗମୁ, ରତ୍ନଗିରି ଓ ଅମଠପୁର ଆଦି ୪ଟି ପଞ୍ଚାୟତର ଜମିଗୁଡିକ ପାଣିରେ ବୁଡ଼ି ଯାଇ ବ୍ୟାପକ ଫସଲ ହାନି ଘଟିଥାଏ। ଚଳିତ ଥର ମଧ୍ୟ ସମାନ ଅବସ୍ଥା ଦେଖା ଦେଇଛି। ନଦୀମାନଙ୍କରେ ପାଣି ଆସିବା ପୂର୍ବରୁ ଲଘୁଚାପ ଜନିତ ଲଗାଣ ବର୍ଷା ହୋଇଥାଏ। ଏହି ସମୟରେ ବର୍ଷା ପାଣି ଉପର ବିଲରୁ ଗଡ଼ି ଆସି ସୁଇସ୍ ଗେଟ୍ ପର୍ଯ୍ୟନ୍ତ ଜମା ହୋଇ ରହିଥାଏ। ବର୍ଷା ଆରମ୍ଭରୁ ସୁଇସ୍ ଗେଟ୍ ଖୋଲିବାର ଆବଶ୍ୟକ‌ତା ରହିଛି। କାରଣ ଏହି ସମୟରେ ଗେଟ୍ ତଳ ପଟକୁ ଥ‌ିବା ବିରୂପା ନଦୀର ଜଳ ପତ୍ତନ କମ୍ ଥାଏ । ଗେଟ୍ ଖୋଲିଲେ ଉଚ୍ଚରୁ ବର୍ଷା ପାଣି ଗଡ଼ି କମ୍ ଜଳ ପତ୍ତନ ଥୁବା ନଦୀ ଭିତରକୁ ଅତି ସହଜରେ ପ୍ରବେଶ କରିପାରିବ। ମାତ୍ର କୌଣସି ବର୍ଷ ସମୟରେ ଏହି ଗେଟ୍ ଖୋଲେ ନାହିଁ। ଦ୍ଵିତୀୟତଃ ଏହି ଗେଟ୍ ଖୋଲା ବ୍ୟବସ୍ଥାଟି ମନୁଷ୍ୟକୃତ କରାଯାଇଥିବାରୁ ଗୋଟିଏ କବାଟ ଖୋଲିବାକୁ ୬୵୭ଜଣ ଲୋକଙ୍କ ଆବଶ୍ୟକତା ପଡ଼ୁଥିବାରୁ ବର୍ଷା ସମୟରେ ଏହା ସମ୍ଭବ ହେଉନାହିଁ। ବର୍ଷା ଛାଡ଼ିଲେ ଉପର ମୁଣ୍ଡର ବର୍ଷା ପାଣି ଅବା ହୀରାକୁଦ ଡ୍ୟାମ ପାଣି ବିରୂପା ନଦୀରେ ଆସିବାର ଦେଖ୍ ବିଭାଗୀୟ କର୍ମକର୍ତ୍ତା, ଯନ୍ତ୍ରୀ ଆଉ ଘେରିବନ୍ଧ ଫାଟକ ଖୋଲନ୍ତି ନାହିଁ । କାରଣ ଏହି ସମୟରେ ଫାଟକ ଖୋଲିଲେ ଜଳ ନିଷ୍କାସନ ବଦଳରେ ଜଳ ପ୍ରବେଶ କରିଯିବ । ପ୍ରତିବର୍ଷ ଭଳି ଏ ବର୍ଷ ମଧ୍ୟ ୨୦ ଦିନ ହେଲା ଚାଷ ଜମିରେ ୫ରୁ ୬ ଫୁଟ ପାଣି ଜମି ରହିଛି। ଧାନଗଛ ଗୁଡିକ ବୁଡ଼ି ରହିବା ଫଳରେ ପଚି ସମ୍ପୂର୍ଣ ନଷ୍ଟ ହୋଇଗଲାଣି। ଏଥିପାଇଁ ଅଞ୍ଚଳବାସୀ ଜଳସମ୍ପଦ ବିଭାଗକୁ ଦାୟୀ କରି ଶୀଘ୍ର ଏହାର ତଦନ୍ତ କରିବା ସହ କ୍ଷତିଗ୍ରସ୍ତ ଚାଷୀଙ୍କୁ କ୍ଷତିପୂରଣ ଦେବାପାଇଁ ଦାବି କରିଛନ୍ତି। ବର୍ଷା ସମୟରେ ଯଦି ସବୁ ଫାଟକ ଖୋଲି ଦିଆ ଯାଇଥାନ୍ତା ଏଭଳି ପରିସ୍ଥିତି ହୋଇନଥାନ୍ତା ବୋଲି ଚାଷୀ ପର୍ଶୁରାମ ବିଶ୍ଵାଳ, ଧୀରେନ ବିଶ୍ବାଳ, ବୁଲା ସେଠୀ, ରଞ୍ଜନ ନାୟକ, ଗୁରୁଚରଣ ନାୟକ, ଦାଶରଥ୍ ମହାପାତ୍ର ପ୍ରମୁଖ ମତ ଦେଇଛନ୍ତି। ମନୁଷ୍ୟକୃତ ବଦଳରେ ଏଠାରେ ଯାନ୍ତ୍ରିକ ଫାଟକ ଖୋଲାଯିବାର ବ୍ୟବସ୍ଥା କରାଗଲେ ପ୍ରତି ବର୍ଷ ଜଳ ନିଷ୍କାସନ ହୋଇପାରିବ ବୋଲି ସାଧାରଣରେ କୁହାଯାଉଛି।