03-Aug-2025

ସୋନପୁର(ମଳୟ ମିଶ୍ରଙ୍କ  ରିପୋର୍ଟ): ସଂପ୍ରତି ସୁବର୍ଣ୍ଣପୁର ଜିଲ୍ଲାର ନୂତନ ଜିଲ୍ଲାପାଳ ଭାବେ ଡ.ନୃପରାଜ ସାହୁ(ଓ ଏ ଏସ୍) (ଏସ୍ ଏସ୍) ଜିଲ୍ଲାର ୩୪ତମ ଜିଲ୍ଲାପାଳ ଭାବରେ ଯୋଗ ଦେଇଛନ୍ତି। ପଡୋଶୀ କଳାହାଣ୍ଡି ଜିଲ୍ଲାର କର୍ଲାମୁଣ୍ଡା ବ୍ଲକର ନିବାସୀ ଡ.ସାହୁ ଜଣେ ଶିକ୍ଷାବିତ୍, ସାହିତ୍ଯାନୁରାଗୀ ଓ ଅଭିଜ୍ଞ ପ୍ରଶାସକ ଭାବ ସେ ବଲାଙ୍ଗୀର, ନୂଆପଡା,କଳାହାଣ୍ଡି ଇତ୍ୟାଦି ଜିଲ୍ଲାରେ ବିଡିଓ, ତହସିଲଦାର ଓ ସମ୍ବଲପୁରରେ ବିଶ୍ବବିଦ୍ୟାଳୟର ରେଜିଷ୍ଟ୍ରାର୍ ଇତ୍ୟାଦି ପଦରେ ଅବସ୍ଥାପିତ ଥିଲେ। ସେ ଯୋଗଦେବା ପରେ ଜିଲ୍ଲାବାସୀଙ୍କ ପକ୍ଷରୁ ତାଙ୍କୁ ଉଚ୍ଛ୍ବସିତ ସ୍ବାଗତ ସମ୍ବର୍ଦ୍ଧନା ପ୍ରଦାନ କରାଯାଉଛି। ତେବେ ଆଗାମୀ ୨୦୨୬ ଅଗଷ୍ଟରେ ସେ ଅବସର ଗ୍ରହଣ କରିବେ ବୋଲି ଶୁଣାଯାଇଛି । ଅନ୍ୟପକ୍ଷରେ 

ଜଗତସିଂହପୁର ଜିଲ୍ଲାର ଏକ ରାଜନୈତିକ ପରିବାରରୁ ଆସିଥିବା କୁହାଯାଉଥିବା ସେହି ଯୁବମହିଳା ଜିଲ୍ଲାପାଳ ଗତ  ୩୦.୦୧.୨୦୨୪ ତାରିଖରେ ଏଠାରେ  ଯୋଗ ଦେଇଥିବା ବିଦାୟୀ ଜିଲ୍ଲାପାଳ ଅନ୍ୟା ଦାସ(ଆଇଏଏସ୍) ଗତ ୨୯. ୦୭.୨୦୨୫ ତାରିଖରେ ଭୁବନେଶ୍ଵରକୁ ଅନ୍ୟ ପଦବୀରେ ବଦଳି ହୋଇ ଯାଇଛନ୍ତି। ତାଙ୍କର ଏଠାରେ କାର୍ଯ୍ୟକାଳ ମଧ୍ଯରେ ସେ ସିଧାସଳଖ ହାତଚିକ୍କଣ କରୁଥିବାର ଦୁର୍ନାମ ରହିଥିଲା।  ଉନ୍ନୟନମୂଳକ ଫାଇଲ୍ ଗୁଡିକ ଜିଲ୍ଲା କାର୍ଯ୍ୟାଳୟରୁ ତାଙ୍କ ସମୟରେ ଶୀଘ୍ର ଛଡାଯାଉ ନଥିଲା। ତେଣୁ ଏ ସମ୍ପର୍କରେ ଜଣେ ନେତା  ସାମ୍ବାଦିକ ସମ୍ମିଳନୀରେ ବିଷୋଦଗାର କରିଥିଲେ। ଆହୁରି ମଧ୍ଯ ଯୋଗାଣ ବିଭାଗର ଧାନକିଣା, ମଣ୍ଡି, ନିୟନ୍ତ୍ରିତ ବଜାର କମିଟି ଓ  ଚାଉଳକଳ ଗୁଡିକ ଉପରେ ମହିଳା ସାଂସଦଙ୍କ ସହ ଯାଇ ପ୍ରତ୍ୟେକ୍ଷ ଉଦ୍ଦେଶ୍ଯମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବା, ବଦଳି ନିଯୁକ୍ତି, ଶିଶୁଖାଦ୍ୟ ପ୍ରସ୍ତୁତ କରୁଥିବା ଏସ୍ ଏଚ୍ ଜି ର ଛତୁଆ ୟୁନିଟରୁ ଦଲାଲଙ୍କ ଜରିଆରେ ଓ ସିଧାସଳଖ ନିରଙ୍କୁଶ ବଟି ଆଦାୟ ଅଭିଯୋଗ, ବିଭିନ୍ନ ସରକାରୀ ସାମଗ୍ରୀକ୍ରୟାଦି ଓ ଅନ୍ଯାନ୍ଯ ବିଭାଗରୁ ତାଙ୍କର ଶୋଷଣ ଚର୍ଚ୍ଚାରେ ରହିଆସିଥିଲା । ଏପରିକି କିଛିଦିନ ତଳେ ପଞ୍ଚାୟତରାଜ ମନ୍ତ୍ରୀଙ୍କ ଗସ୍ତ ବେଳେ ମନ୍ତ୍ରୀ ମନରେଗା କାମରେ ମେସିନ୍ ବ୍ୟବହାର ଇତ୍ୟାଦି ଧରି ପ୍ରକଳ୍ପ ସ୍ଥଳରେ ଲୋକଙ୍କ ସାମ୍ନାରେ ଜିଲ୍ଲାପାଳଙ୍କ ଉପରେ ବର୍ଷିଥିବା ଖବର ପ୍ରକାଶ ପାଇଥିଲା। ଜିଲ୍ଲାରେ ଉନ୍ନୟନ କାମ ଧିମେଇ ଯାଇଥିଲା। ବ୍ଲକ୍ ଓ ପଞ୍ଚାୟତ ଗୁଡିକରେ ତାଙ୍କର ହସ୍ତକ୍ଷେପ  ରହିଥିଲା। ବିନିକା ଓ ଡୁଙ୍ଗୁରିପାଲି ବ୍ଲକରେ ଚାଲିଥିବା ଗ୍ରାମ୍ୟ ଜଳଯୋଗାଣ ପ୍ରକଳ୍ପ ଓ ଅନ୍ଯାନ୍ଯ ଅନେକ ପ୍ରକଳ୍ପ  ଅଧାପନ୍ତରିଆ ପଡିରହିଥିଲା। ମୁଖ୍ଯତଃ ଡୁଙ୍ଗୁରିପାଲି  ନିୟନ୍ତ୍ରିତ ବଜାର କମିଟିର ଜଣେ ପୂର୍ବତନ ସମ୍ପାଦକଙ୍କ ଜରିଆରେ ଯାବତୀୟ ଦୁର୍ନୀତି ତାଙ୍କରି ଜ୍ଞାତସାରରେ ଚାଲିଥିବା ଅଭିଯୋଗ ପ୍ରକାଶ ପାଇଥିଲା। ଏହିସବୁ କାରଣରୁ ତାଙ୍କ ଉପରେ ଲୋକେ ଅସନ୍ତୁଷ୍ଟ  ଥିଲେ। ଉପରୋକ୍ତ ବିଷୟରେ ବାରମ୍ବାର ଗଣମାଧ୍ୟମରେ ପ୍ରକାଶ ପାଇଥିଲେ ହେଁ ସେ ବେଖବର୍ ରହୁଥିଲେ। ଏଣୁ ଗତଥରର ଜିଲ୍ଲାପାଳମାନଙ୍କ ବଦଳିରେ ସେ ତାଲିକାଭୁକ୍ତ ନ ଥିବା ଓ ଏବେ ତାଙ୍କର ବଦଳି ହୋଇଥିବାରୁ ଜିଲ୍ଲାବାସୀ ଆଶ୍ବସ୍ତ ହୋଇ ଥିବା ପ୍ରକାଶ। ଅପରତଃ ନବନିଯୁକ୍ତ ଜିଲ୍ଲାପାଳ ଡ.ସାହୁ କାର୍ଯ୍ୟରେ ଯୋଗଦେବା ପରେ ଉତ୍ସାହୀ ହୋଇପଡିଥିବା ଲକ୍ଷ୍ୟ କରାଯାଇଛି। ତାଙ୍କର ଲୋକଙ୍କ ସହ ମିଶିବା ଓ କେଉଁଠି କିଛି ସମସ୍ୟା ସୃଷ୍ଟିହେବାର ଖବର ପାଇଲେ ଘଟଣାସ୍ଥଳକୁ ଧାଇଁ ଯାଇ ସମସ୍ୟାର ଆଶୁସମାଧାନ କରୁଥିବା ତାଙ୍କୁ ଆରମ୍ଭରୁ ଲୋକପ୍ରିୟ କଲାଣି। ସେ ମଧ୍ଯ ସମାଜର ପ୍ରାୟ ସମସ୍ତବର୍ଗର ଲୋକଙ୍କ ସହ ନିର୍ବିଘ୍ନରେ ମିଶୁଥିବା ଲୋକଙ୍କୁ ସୁହାଉଛି। ସେ ତାଙ୍କ ସ୍ବାଗତ ଅଭିଭାଷଣରେ ଜିଲ୍ଲାର ପ୍ରତ୍ୟେକ ଲୋକଙ୍କର ସମସ୍ୟାର ସମାଧାନ କରିବାକୁ ସେ ସତତ ପ୍ରୟାସରତ ଓ ସାମ୍ବାଦିକମାନେ ପ୍ରଶାସନର ଆଖିକାନ ଇତ୍ୟାଦି ଆପ୍ତବାକ୍ୟ କହି ଆଶ୍ବାସନା ଦେଉଥିବା ପ୍ରକାଶ। ତେବେ ଅବିଭକ୍ତ ବଲାଙ୍ଗୀର ଜିଲ୍ଲାରୁ ବିଚ୍ଛିନ୍ନ ହେଲାପରେ ଏଇ ନବଗଠିତ ସୁବର୍ଣ୍ଣପୁର ଜିଲ୍ଲାର ଅଗ୍ରଗତି ଅଦ୍ୟାବଧି ଆଶାନୁରୂପ ହୋଇପାରିନାହିଁ। ଆରମ୍ଭରୁ ଏହି ଜିଲ୍ଲାର ଭାଗ୍ୟବିଧାତା ଭାବେ ଯେଉଁମାନେ ଜିଲ୍ଲାପାଳ ହୋଇ ଆସିଛନ୍ତି, ସେମାନଙ୍କ ମଧ୍ଯରେ ଅଧିକାଂଶତଃ ଅବସରକାଳ ପାଖେଇ ଆସିଥିବା, ପ୍ରମୋଟୀ ପ୍ରାଇଜ୍ ପ୍ରଶାସକ ଅର୍ଥାତ୍ ସେମାନଙ୍କ ରିମୋଟ୍ ରାଜନେତା, ନିର୍ବାଚିତ ଲୋକପ୍ରତିନିଧି ବନାମ ସରକାରଙ୍କ ହାତରେ ରହିଥିବା କଥାଟି ଏତେ ଦୁର୍ବୋଧ୍ୟ ନୁହେଁ। ତେଣୁ ବିଭିନ୍ନ ସରକାରୀ ଯୋଜନାର ବାସ୍ତବ ରୂପାୟନ, ଦୁର୍ନୀତିମୁକ୍ତ ଶାସନବ୍ୟବସ୍ଥା ଓ ଜିଲ୍ଲାର ପ୍ରକୃତ ବିକାଶ କାହାହାତରେ ବୋଲି ଲୋକଙ୍କ ମନରେ ଶଙ୍କା ସୃଷ୍ଟି ହେବା ସ୍ୱାଭାବିକ। ଏହି ଜିଲ୍ଲାର ପ୍ରାୟ ପ୍ରତ୍ୟେକ ବିଭାଗରେ ଅଧିକାରୀଙ୍କ ବ୍ୟତୀତ କର୍ମଚାରୀମାନେ ବର୍ଷ ବର୍ଷ ଧରି ଜାଗାମାଡି ବସିଛନ୍ତି। ପଞ୍ଚାୟତ ଠାରୁ ଜିଲ୍ଲାସ୍ତର ପର୍ଯ୍ୟନ୍ତ ଏହା ଦେଖାଯାଇଛି l ଜିଲ୍ଲାର ୨ଟି 

ସବଡିଭିଜନ ବା ୬ ଟି ବ୍ଲକରେ ସଂସ୍କାର ଜରୁରୀ। ବହୁ ସମସ୍ୟା ପ୍ରତି ପ୍ରଶାସନ ବର୍ଷ ବର୍ଷ ଧରି ଆଖିବୁଜି ଦେଇଛି। ତରଭା ବ୍ଲକର ଶିଶୁ ବିକାଶ ପ୍ରକଳ୍ପର ଅଫିସ୍ ଗୃହ ନ ଥିବା ହେଉ ବା ବୀରମହାରାଜପୁର ବ୍ଲକର କୁଞ୍ଜାପାଲି ଆଶ୍ରମସ୍କୁଲ୍ ରେ ଶିକ୍ଷକ/ଶିକ୍ଷୟିତ୍ରୀ ନ ରହିବା ବା ତରଭା ବ୍ଲକର ଚାରଭଟା ଅନୁସୂଚିତ ଜାତି ଓ ଜନଜାତିର ଆବାସିକ ଉଚ୍ଚ ମାଧ୍ୟମିକ ବିଦ୍ୟାଳୟର ନିମ୍ନମାନର ନିର୍ମାଣ ଓ ମରାମତି , ପେକ୍ସ ଅନିୟମିତତା, ଭଙ୍ଗାସ୍କୁଲଗୃହ, ଅତାସିଂହା କେଜିବିଭି କୋଠା ଦୁରବସ୍ଥା ହେଉ ।  କେନ୍ଦ୍ର ଓ ରାଜ୍ଯ ସରକାରଙ୍କ ବହୁ ଘୋଷିତ ଯୋଜନା କେବଳ ମିଟିଂରେ ପର୍ଯ୍ୟବେଶିତ।  ଠିକା ଓ ଠକେଇରେ ଚାଲିଛି ବିକାଶ। ଏସବୁ ବିନା ରାଜନୈତିକ ଇଚ୍ଛାଶକ୍ତିରେ ସମ୍ଭବ କି ?

ତେବେ ନୂତନ ଜିଲ୍ଲାପାଳ ଡ ସାହୁ ତାଙ୍କ ସୀମିତ ଶାସନ କାଳରେ ଯାବତୀୟ ପ୍ରତିବନ୍ଧକକୁ ସାମ୍ନା କରି ସୁବର୍ଣ୍ଣପୁର ଜିଲ୍ଲାବାସୀଙ୍କ ଆସ୍ଥାଭାଜନ ହୁଅନ୍ତୁ ଓ ଅୟମାରମ୍ଭ ଶୁଭାରମ୍ଭ ଭବତୁ, ଏହା ହିଁ ମା' ସୁରେଶ୍ଵରୀ ଓ ସୁବର୍ଣ୍ଣଶମ୍ଭୁଙ୍କ ନିକଟରେ ପ୍ରାର୍ଥନା  ।