22-Jul-2025

ବଲାଙ୍ଗିର(ପ୍ରେରଣା ଖବର): ସୋମବାର ରାତି ପ୍ରାୟ ୮.୩୦ । ବଲାଙ୍ଗିର ଜିଲ୍ଲାପାଳ କାର୍ଯ୍ୟାଳୟରେ ଜଣେ ରାଇସ୍ ମିଲ୍ ମାଲିକଙ୍କ ହାଇଡ୍ରାମା ଆଲୋଚନାର ବିଷୟ ହୋଇଛି। ବେଲପଡ଼ାସ୍ଥିତ ଅନନ୍ତ ପେଡି ପ୍ରଡକ୍ଟ ଓସ୍ନାପ୍ ପେଡି ପ୍ରୋସେସିଂ ରାଇସ୍ ମିଲ୍ ମାଲିକ ଶଙ୍କର ଜୈନ୍ ସଂଧ୍ୟାରେ ଜିଲାପାଳ କାର୍ଯ୍ୟାଳୟକୁ ଆସିଥିଲେ । ୨୦୨୩-୨୪ର ଯୋଗାଣ ବିଭାଗ ପାଖରେ ଥ‌ିବା ବକେୟା ବିଲ୍ ବାବଦକୁ ୬୦ ଲକ୍ଷ ଟଙ୍କା ଦେବାକୁ ଦାବି କରିଥିଲେ। ଖପ୍ରାଖୋଲରେ ଜିଲାପାଳ ଓ ଆରକ୍ଷୀ ଅଧୀକ୍ଷକଙ୍କ ଜନଶୁଣାଣି ଶିବିର ଥିବାରୁ ଜିଲାପାଳ ସଂଧ୍ୟାରେ କାର୍ଯ୍ୟାଳୟକୁ ନଆସି ଆବାସିକ କାର୍ଯ୍ୟାଳୟରେ ଥିଲେ। ଜିଲା ମୁଖ୍ୟ ଯୋଗାଣ ଅଧିକାରୀ ବକେୟା ବିଲ୍ ନଦେଇ ୪ ମାସ ହେଲା ଦିନ ଗଡ଼ାଇ ଚାଲିଥିବାରୁ ଆଜି ବିଲ୍ ନମିଳିଲେ ଆତ୍ମହତ୍ୟା କରିବାକୁ ଶ୍ରୀ ଜୈନ୍ ଧମକ ଦେଇଥିଲେ । ସେ ଆତ୍ମହତ୍ୟା କରିବାକୁ ବଲାଙ୍ଗିର ରେଳଷ୍ଟେସନ ଅଭିମୁଖେ ଯାଉଛନ୍ତି ବୋଲି କହି ଶ୍ରୀ ଜୈନ୍ ଜିଲାପାଳ କାର୍ଯ୍ୟାଳୟରୁ ବାହାରି ଆସିଥିଲେ। ଏନେଇ ଶ୍ରୀ ଜୈନ୍‌ଙ୍କ ଜିଲାପାଳଙ୍କ ଷ୍ଟେନୋ ଜୟବିହାରୀ ଗୁରୁଙ୍କୁ ଫୋନ୍ କରି ସୂଚନା ଦେଇଥିଲେ । ଷ୍ଟେନୋ ଶଙ୍କର ଜୈନ୍‌ଙ୍କୁ ଫୋନ୍ କରି ଜିଲାପାଳଙ୍କ କାର୍ଯ୍ୟାଳୟ ଆସିବାକୁ ଅନୁରୋଧ କରିଥିଲେ । ମୁଖ୍ୟ ଜିଲା ଯୋଗାଣ ଅଧିକାରୀଙ୍କ ସହ ଆଲୋଚନା କରି ସମସ୍ୟା ସମାଧାନ କରାଯିବ ବୋଲି କହିବା ପରେ ଶ୍ରୀ ଜୈନ୍‌ ଫେରିଥିଲେ। ଆଜି ପୁଣି ଆଉ ୧୦ଜଣ ରାଇସମିଲ ମାଲିକ ଶଙ୍କର ଜୈନଙ୍କ ସହ ସିଏସଓ ଅଫିସ ଆସିଥିଲେ। କାନ୍ଦିକାନ୍ଦି ବକେୟା ବିଲ ମାଗିଛନ୍ତି। ଶ୍ରୀ ଜୈନ୍‌ଙ୍କ ବେଲପଡ଼ାସ୍ଥିତ ଅନନ୍ତ ପେଡି ପ୍ରଡକ୍ଟ ଓ ସ୍ନାପ୍ ପେଡି ପ୍ରୋସେସିଂର ଧାନପେସା, ପରିବହନ ଆଦି ବାବଦକୁ ୬୦ ଲକ୍ଷ ଟଙ୍କା ବିଲ୍ ଯୋଗାଣ ବିଭାଗ ପାଖରେ ବକେୟା ରହିଛି । ୪ ମାସ ହେଲା ମୁଖ୍ୟ ଯୋଗାଣ ଅଧିକାରୀ ରଞ୍ଜନ ପଣ୍ଡା ଦିନ ଗଡ଼ାଇ ଚାଲିଥିବା ଶ୍ରୀ ଜୈନ୍ ଅଭିଯୋଗ କରିଛନ୍ତି। ସେପଟେ ସବୁ ରାଇସମିଲ ମାଲିକଙ୍କ ପେମେଣ୍ଟ ହେଉଛି ବାକି ଲୋକଙ୍କ ବି ହେବ। ଡ୍ରାମା କରିଦେଲେ ଶୀଘ୍ର ଦେଇଦେବେ ବୋଲି ସେମିତି କରିଛନ୍ତି। ପର୍ଯ୍ୟାୟକ୍ରମେ ପେମେଣ୍ଟ ଦିଆଯିବ ବୋଲି କହିଛନ୍ତି ଯୋଗାଣ ବିଭାଗର ଆକାଉଣ୍ଟାଣ୍ଟ ଗିରିଜାଶଙ୍କର ବେହେରା। ତେବେ ବଲାଙ୍ଗିର ଜିଲ୍ଲାର ମୁଖ୍ୟ ଯୋଗାଣ ଅଧିକାରୀ ରଞ୍ଜନ ପଣ୍ଡା ଯୋଗଦେବା ପରଠାରୁ ବିବାଦରେ ରହିଛନ୍ତି l ବଲାଙ୍ଗିର ଜିଲ୍ଲାରେ ରାଜନୈତିକ ଚାପ ଅଧିକ ରହୁଥିବା କାରଣରୁ କାମ କରିବାରେ ଅସୁବିଧା ହେଉଥିବା କହି ଆସୁଛନ୍ତି l ତେଣୁ ଜିଲ୍ଲାରେ ମିଲର୍ସ ଓ ଅନ୍ୟମାନେ କାମ କରାଇବାରେ ଅସୁବିଧା ହେଉଛି ବୋଲି ଅଭିଯୋଗ ହେଉଛି l ଗତକାଲିର ଏହି ଘଟଣାପରେ ରାତିରେ ଜିଲ୍ଲାପାଳଙ୍କ ଆବସିକ କାର୍ଯ୍ୟାଳୟରେ ଜିଲ୍ଲାପାଳ,ଅତିରିକ୍ତ ଜିଲ୍ଲାପାଳ,ଜିଲ୍ଲା ମୁଖ୍ୟ ଯୋଗାଣ ଅଧିକାରୀଙ୍କୁ ନେଇ ଏକ ବୈଠକ କରାଯାଇ ମିଲର୍ସ ଶଙ୍କରଜୈନଙ୍କ ବାକିଆ ବିଲ କରି ଅନୁମୋଦନ ପାଇଁ ରାଜ୍ୟ ସରକାରଙ୍କୁ ପଠାଇଥିବା ଜଣାଯାଇଛି l