11-Jul-2025

ସୁବର୍ଣ୍ଣପୁର (ମନୋରଞ୍ଜନ ତ୍ରିପାଠୀ)
 ଜିଲ୍ଲା ର ରାମପୁର ଥାନା ତଥା ଡୁଙ୍ଗୁରିପାଲି ବ୍ଳକର ଗଜବନ୍ଧ ପଂଚାୟତର ପୂର୍ବତନ ସରପଞ୍ଚ ତଥା ବର୍ତମାନ ର ସରପଞ୍ଚ ବାସନ୍ତୀ କ୍ଷେତୀଙ୍କ ସ୍ବାମୀ ବଲ୍ଲଭ କ୍ଷେତି ଙ୍କୁ ଗତ ରାତିରେ ଅତି ନିର୍ମମ ଭାବରେ ଖଣ୍ଡାରେ ହାଣି ହତ୍ୟା କରାଯାଇଛି । ପ୍ରାପ୍ତ ସୂଚନା ଅନୁସାରେ ଗତ ସଂଧ୍ୟାରେ ଗଜବନ୍ଧ ଛକଠାରେ ତାଙ୍କର କେତେକ ବନ୍ଧୁମାନଙ୍କ ସହିତ ରାତି ପ୍ରାୟ ୯.୩୦ ପର୍ଯ୍ୟନ୍ତ ରହିଥିଲେ । ଫେରିବାବେଳେ ସେ ଅନ୍ୟ ଜଣକୁ ତାଙ୍କ ଘରକୁ ଛାଡି ଆସି ନିଜ ଗ୍ରାମ ଗଜବନ୍ଧ ପଂଚାୟତ କେନ୍ଦୁପାଲିକୁ ବାଇକ ଯୋଗେ ଯାଉଥିଲେ । ପ୍ରାୟ ରାତି ୧୦ଟା ସମୟରେ ଗଜବନ୍ଧଠାରୁ ୨କିମି ଦୂର ବ୍ରାହ୍ମଣିପାଲି, ପଣ୍ଡରାପାଲି ଓ କେନ୍ଦୁପାଲି ଗ୍ରାମର ମଧ୍ଯ ଭାଗରେ ଥିବା ଛକ ନିକଟରେ କେତେ ଜଣ ଦୁବୃର୍ତ ଛପି ରହିଥିଲେ । ସେଠାରେ ପହଂଚିବା ପରେ ତାଙ୍କୁ ଅତର୍କିତ ଭାବରେ ଖଣ୍ଡାରେ ଆକ୍ରମଣ କରିଥିଲେ । ଖଣ୍ଡl ଚୋଟରେ ସେ ତଳେ ପଢି ଯାଇଥିଲେ । ଖବର ପାଇ ପରିବାର ଏବଂ ସଂପର୍କୀୟମାନେ ତାଙ୍କୁ ଡୁଙ୍ଗୁରିପାଲି ଡାକ୍ତରଖାନାକୁ ଆଣିଥିଲେ । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ସଳାଳେ ଏହି ଖବର ପ୍ରଚାରିତ ହେବା ପରେ ବ୍ଳକର ବିଭିନ୍ନ ଗ୍ରାମର ଲୋକେ ତଥା ଜିଲ୍ଲା ସରପଞ୍ଚ ସଂଘ ର କର୍ମକର୍ତ୍ତା ଡାକ୍ତର ଖାନା ରେ ପହଂଚିଥିଲେ । ସ୍ୱର୍ଗତ କ୍ଷେତୀ ଗତ ଥର ଉକ୍ତ ପଂଚାୟତର ସରପଞ୍ଚ ରହିଥ‌ିବା ବେଳେ ଚଳିତ ଥର ମହିଳାଙ୍କ ପାଇଁ ସଂରକ୍ଷିତ ରହିଥ‌ିବାରୁ ତାଙ୍କ ସ୍ତ୍ରୀ ବାସନ୍ତୀ କ୍ଷେତୀ ଏ ଥର ସରପଞ୍ଚ ରହିଛନ୍ତି । ଏଥୁରୁ ସେ  ଅଞ୍ଚଳରେ ସେ ବେଶ ଲୋକପ୍ରିୟତା  ଥିବା ଜଣାପଡ଼ିଛି । ସେ ଜଣେ ପରୋପକାରୀ, ସଂଗଠକ, ମେଳାପୀ ବ୍ୟକ୍ତି ଥିଲେ । ତାଙ୍କ ବିୟୋଗରେ ବିଭିନ୍ନ ମହଲରେ ଶୋକ ପ୍ରକାଶ କରାଯାଇଛି । ତାଙ୍କର ଗୋଟିଏ  ପୁଅ ଓ ଝିଅ ଅଛନ୍ତି । ଉକ୍ତ ଘଟଣା ପରେ ରାମପୁର ପୁଲିସ ସନ୍ଦେହରେ ୨ଜଣକୁ ଅଟକ ରଖି ପଚରାଉଚୁରା ଜାରି ରଖିଛି । ତାଙ୍କର ହତ୍ୟା କାଣ୍ଡକୁ ନେଇ ବିଭିନ୍ନ ମହଲରେ ଭିନ୍ନ ଭିନ୍ନ କଥା ଆଲୋଚନା ହେଉଛି । କେତେକ ପୁର୍ବ ଶତୃତାରୁ ଏହା ଘଟିଥ‌ିବା ଆଲୋଚନା ହେଉଥିବା ବେଳେ ଆଉ କେତେକ ଜମିବାଡିକୁ ନେଇ ମଧ୍ଯ ନାନା କଥା ଶୁଣିବାକୁ ମିଳୁଛି । ସେ ବିଜେଡି ଦଳର ଜଣେ ଆଗଧାଡିର ନେତା ଭାବରେ ଜଣାଶୁଣା ଥିଲେ l ଏହି ଘଟଣାକୁ ନେଇ ଡୁଙ୍ଗୁରିପାଲି ବ୍ଲକ ସରପଞ୍ଚ ସଂଘ ନିନ୍ଦା କରିଛି। ଯେବେ ଜଣେ ସରପଞ୍ଚ ଙ୍କୁ ଏଭଳି ହତ୍ୟା କରାଯାଉଛି ତାହେଲେ ସାଧାରଣ ଜନତାଙ୍କ କଥା କିଏ ପଚାରେ ବୋଲି ସଂଘ ପକ୍ଷରୁ ନିନ୍ଦା କରାଯାଇଛି ।  ସ୍ମରଣଯୋଗ୍ୟ ଯେ ଗତବର୍ଷ  ଇଚ୍ଛାପୁର ସରପଞ୍ଚ ଙ୍କୁ ବ୍ଳକ କାର୍ଯ୍ୟାଳୟ ତଥା ବି ଡି ଓ ଙ୍କ ସରକାରୀ ବାସଭବନ ସମ୍ମୁଖରେ ମରଣାନ୍ତକ ଆକ୍ରମଣ କରାଯାଇଥିଲା । ବର୍ଷେ ମଧ୍ୟରେ ଜଣେ ଲୋକ ପ୍ରତିନିଧୁକୁ ମରଣାନ୍ତକ ଆକ୍ରମଣ ଓ ଜଣକୁ ନିର୍ମମ ହତ୍ୟା ଘଟଣା ଅଂଚଳରେ ଆଇନ ଶୃଙ୍ଖଳା ବିପର୍ଯ୍ୟସ୍ତ ହୋଇ ପଡିଛି ବୋଲି ସରପଂଚ ସଂଘ ସଭାପତି ମନୋଜ ପୁରୋହିତ ତାଙ୍କ ପ୍ରତିକ୍ରୀୟାରେ ପ୍ରକାଶ କରିଛନ୍ତି । ବଲାଙ୍ଗିର ସାଇଣ୍ଟିଫିକ ଦଳ ଡୁଙ୍ଗୁରିପାଲି ଡାକ୍ତରଖାନା ଏବଂ ଘଟଣା ସ୍ଥଳରେ ପହଂଚି ତଦନ୍ତ ଚଳାଇଛନ୍ତି । ସେହିପରି ସୁବର୍ଣ୍ଣପୁର ଜିଲ୍ଲା ଆରକ୍ଷୀ ଅଧିକ୍ଷକ ନାରାୟଣ ନାୟକ ମଧ୍ଯ ଘଟଣା ସ୍ଥଳ ପରିଦର୍ଶନ କରି ଫେରି ଯାଇଛନ୍ତି । ହତ୍ୟାକାଣ୍ଡରେ ସଂପୃକ୍ତ ଆସାମୀମାନଙ୍କୁ ଧରି ଘଟଣାର ପର୍ଦ୍ଦାଫାସ କରିବା ରାମପୁର ପୁଲିସ ପାଇଁ ଏକ ଚେଲେଞ ସୃଷ୍ଟି କରିଛି । ଗାଁ ଗାଁରେ ଅବାଧ ମଦ ବିକ୍ରୀ, ଖୁଲମଖୁଲା ନିଶାକାରବାର, ହୁଗୁଳା ଆଇନ ବ୍ୟବସ୍ଥା ଯୋଗୁଁ ଦିନକୁ ଦିନ ଅସାମାଜିକ କାର୍ଯ୍ୟ, ଚୋରି, ଢକାୟତି, ରାହାଜାନୀ, ହତ୍ୟା ବଢିବାରେ ଲାଗିଛି । ରାମପୁର ପୁଲିସ ଶବ ପଞ୍ଚନାମା ପରେ ବ୍ୟବଚ୍ଛେଦ ପାଇଁ ବିନିକା ପଠାଇଛନ୍ତି । ରାମପୁର ଥାନାରେ ଏକ ହତ୍ୟାକାଣ୍ଡ ମାମଲା ଋଜୁ କରାଯାଇ ଥାନାଧିକାରୀ ପଦ୍ମାସିନୀ ମହେର ନିଜେ ଦାୟିତ୍ୱ ନେଇ ତଦନ୍ତ ଜାରି ରଖୁଛନ୍ତି । ଦୁଇ ଜଣ ଆସାମୀ ଙ୍କୁ ଆଜି ଗିରଫ କରା ଯାଇଥିବା ବେଳେ ଖୁବ ଶିଘ୍ର  ବାକି ସମସ୍ତ ଆସାମୀମାନଙ୍କୁ ଧରାଯିବ ବୋଲି ସେ ତାଙ୍କ ପ୍ରତିକ୍ରୀୟାରେ ପ୍ରକାଶ କରିଛନ୍ତି ।