10-Jul-2025

ବିନିକା(ହିମାଂଶୁ ଶେଖର ପୁଟେଲ)ସୁବର୍ଣ୍ଣପୁର ଜିଲ୍ଲା ବିନିକାର ପର୍ଯ୍ୟଟନସ୍ଥଳୀ ପୁଣ୍ୟପିଠ ପାପକ୍ଷୟ ରାସ୍ତାର ଐତିହାସିକ ତାରାପୁରଗଡ ଠାରେ ଥିବା ବିନିକା ଆଦର୍ଶ ବିଦ୍ୟାଳୟରେ ଅଧ୍ୟୟନରତ ପ୍ରଥମ ବ୍ୟାଚ ମେଟ୍ରିକ୍ ଛାତ୍ରଛାତ୍ରୀ ମାନେ ଚଳିତ ବର୍ଷ ଶତ ପ୍ରତିଶତ ପାସ କରି ବିଦ୍ୟାଳୟର ନାମ ରଖିଥିବା ବେଳେ ସେଥିରୁ ଏ ଗ୍ରେଡରେ ଉତ୍ତୀର୍ଣ୍ଣ ୨ଜଣ ଛାତ୍ରୀ ଭୁବନେଶ୍ୱର ସ୍ଥିତ ଆଇକୋନିକ ପ୍ରବେଶିକା ପରୀକ୍ଷାରେ ସଫଳ ହୋଇ ପୁନର୍ବାର ବିଦ୍ୟାଳୟର ଗୌରବ ବଡେଇବାରେ ସକ୍ଷମ ହୋଇଛନ୍ତି ।ସୂଚନା ଯୋଗ୍ୟ ଯେ ସମ୍ପୂର୍ଣ୍ଣ ଭାବେ ସରକାରଙ୍କ ଦ୍ଵାରା ପରିଚାଳିତ  ସର୍ବମୋଟ ୫୦୦ସିଟ ବିଶିଷ୍ଟ  ଭୁବନେଶ୍ବର ସ୍ଥିତ ଏକମାତ୍ର ଆଇକୋନିକ୍ ବିଦ୍ୟାଳୟରେ ପଡ଼ିବା ପାଇଁ ରାଜ୍ୟର ବିଭିନ୍ନ ସ୍ଥାନରେ ଥିବା ଆଦର୍ଶ ବିଦ୍ୟାଳୟରୁ ଚଳିତ ମେଟ୍ରିକ ପରୀକ୍ଷାରେ ୯୦ପ୍ରତିଶତରୁ ଅଧିକ ରଖିଥିବା ଛାତ୍ରଛାତ୍ରୀ ଆଇକୋନିକ ପ୍ରବେଶିକା ପରୀକ୍ଷା ଦେଇଥିଲେ।ଏଥିରେ ବିନିକା ଆଦର୍ଶ ବିଦ୍ୟାଳୟରୁ ୮ଜଣ ଛାତ୍ରଛାତ୍ରୀ ଭାଗନେଇଥିବା ବେଳେ ସେଥିରୁ  ୯୬.୮ପ୍ରତିଶତ ରଖିଥିବା ସିଲଭି ହୋତା ଆଇକୋନିକ ପରୀକ୍ଷାର ୯ନଂ ସ୍ଥାନ ଏବଂ  ୯୪.୬ ପ୍ରତିଶତ ରଖିଥିବା ସ୍ନେହା ସାହୁ ୨୩୪ନଂ ସ୍ଥାନରେ ଚୟନ ହୋଇ ପଡ଼ିବାର ସୁଯୋଗ ପାଇଛନ୍ତି ।ବିଦ୍ୟାଳୟର ଏହି ୨ଛାତ୍ରୀଙ୍କ ସଫଳତା ନେଇ ବିଦ୍ୟାଳୟର ସମସ୍ତ ଷ୍ଟାଫ,ଅଧ୍ୟୟନରତ ଛାତ୍ରଛାତ୍ରୀ ଏବଂ ଅଞ୍ଚଳର ଶିକ୍ଷାପ୍ରେମି ମହଲରେ ଖୁସିର ଲହରୀ ଖେଳିଯାଇଛି।ତେବେ ଚଳିତ ବର୍ଷ ବିନିକା ଆଦର୍ଶ ବିଦ୍ୟାଳୟରେ ପ୍ରଥମ କରି ଯୁକ୍ତ ଦୁଇ ଖୋଲିବା ନେଇ ସରକାର ସ୍ବୀକୃତି ପ୍ରଦାନ କରିଛନ୍ତି ।ଶିକ୍ଷାଦାନ ପାଇଁ ୫ଜଣ ଶିକ୍ଷକ/ଶିକ୍ଷୟତ୍ରୀ ମଧ୍ୟ ଯୋଗଦାନ କରି ସାରିଲେଣି ।ନାମ ଲେଖାଇଥିବା ଯୁକ୍ତଦୁଇ ଛାତ୍ରଛାତ୍ରୀଙ୍କ ଉଜ୍ଜଳ ଭବିଷ୍ୟତ ଓ ତାଙ୍କ ପାଇଁ ଉତ୍ତମ ଶିକ୍ଷାଦାନ ନେଇ ବିଦ୍ୟାଳୟ ତରଫରୁ  ପ୍ରୟାସ ଜାରି ରହିବ ବୋଲି ବିଦ୍ୟାଳୟର ଅଧ୍ୟକ୍ଷ ବିମଳ ବିଶ୍ଵାଳ  କହିଛନ୍ତି ।