03-Jul-2025

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ଜିଲ୍ଲା ଲୋଇସିଂହା ବନାଞ୍ଚଳ ଅନ୍ତର୍ଗତ ଭାଲୁପାଲିଠାରେ ରମାଇ ପାହାଡର ପାଦଦେଶରେ ଆଜି ଏକ ମେଗା ବନୀକରଣ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଲୋଇସିଂହା ବନାଞ୍ଚଳ ଅଧିକାରୀ ପାଉଲ ହରିପାଲଙ୍କ ସଭାପତିତ୍ୱରେ ଅନୁଷ୍ଠିତ ଏହି ବନୀକରଣ କାର୍ଯ୍ୟକ୍ରମରେ ମୁଖ୍ୟଅତିଥି ଭାବରେ ଲୋଇସିଂହା ବିଧାୟକ ତଥା  ସ୍ୱାସ୍ଥ୍ୟ ଓ ପରିବାରକଲ୍ୟାଣ, ସଂସଦୀୟ ବ୍ୟାପାର ଓ ବୈଦ୍ୟୁତିକ ସୂଚନାବିଭାଗର ମନ୍ତ୍ରୀ ଡ.ମୁକେଶ ମହାଲିଙ୍ଗ ଯୋଗଦେଇ ବୃକ୍ଷରୋପଣ କରିବା ସହିତ ସାମାଜର ସବୁବର୍ଗର ଲୋକ ବ୍ୟାପକ ବନୀକରଣ କରି ପରିବେଶ ସୁରକ୍ଷାରେ ଭାଗିଦାର ହେବାକୁ ଆହ୍ୱାନ ଦେଇଥିଲେ। ସେ ଏହି ଆହୁରି କହିଲେ ଯେ, ଓଡିଶା ହେଉଛି ପ୍ରଥମ ରାଜ୍ୟ ଯେଉଁଠି ବନୀକରଣ ମାଧ୍ୟମରେ ବିପୁଳ ପରିମାଣରେ ସବୁଜିକରଣ ବଢାଯାଇ ପାରିଛି। ଐତିହାସିକ ରମାଇ ପାହାଡ ତଳେ ବ୍ୟାପକ ବନୀକରଣ କରାଯାଇ ଜଙ୍ଗଲର ସବୁଜିମା ବଢାଇବାର ଉଦ୍ୟମ ହୋଇଛି ବୋଲି ଉପସ୍ଥିତ ଗ୍ରାମବାସୀ ଓ ଅଞ୍ଚଳବାସୀଙ୍କ ଉଦ୍ଦେଶ୍ୟରେ ମନ୍ତ୍ରୀ କହିଥିଲେ। ଏହି କାର୍ଯ୍ୟକ୍ରମରେ ବଲାଙ୍ଗୀର ଜିଲ୍ଲାପାଳ ଗୌରବଶିବାଜୀ ଇସଲୱାର, ଡିଏଫଓ  ଅଜିତ ବିଶି, ଏସିଏଫ ମନୋଜ ବେହେରା, ଲୋଇସିଂହା ବ୍ଲକ ଅଧ୍ୟକ୍ଷ ଜତିନ୍ଦ୍ର ପଟେଲ, ବାଦିବାହାଲ ସରପଞ୍ଚ ପ୍ରଶାନ୍ତ ତ୍ରୀପାଠୀ, ଫରେଷ୍ଟର ବାବୁଲା ଦାସ ପ୍ରମୁଖ ଯୋଗଦେଇଥିଲେ। ଏହି ଅବସରରେ ସାମାଜିକ ସୁରକ୍ଷା ବିଭାଗ ଓ ଶ୍ରମବିଭାଗ ପକ୍ଷରୁ ହିତାଧିକାରୀଙ୍କୁ ସରକାରୀ ସହାୟତା ପ୍ରଦାନ କରାଯାଇଥିଲା। ଏହା ସହିତ କିଛି ହିତାଧିକାରୀଙ୍କୁ ଆୟୁଷ୍ମାନ କାର୍ଡ ମଧ୍ୟ ବଣ୍ଟନ କରାଯାଇ ଥିଲା। ଜିଲ୍ଲା ସାମାଜିକ ସୁରକ୍ଷା ଅଧିକାରୀ ମଦନଜିତ ହୋତା, ଶ୍ରମ ଅଧିକାରୀ, ମନ୍ତ୍ରୀଙ୍କ ଲୋଇସିଂହା ପ୍ରତିନିଧି ଗୌରାଙ୍ଗ ନାଏକ, ପୁଇଁତଳା ବ୍ଲକ ପ୍ରତିନିଧି ଅଜିତ ପଣ୍ଡା, ଯୋଗିସର୍ଡା କଲେଜର ଛାତ୍ରଛାତ୍ରୀଗଣ, ଭାଲୁପାଲି ବନସୁରକ୍ଷା ସମିତିର କର୍ମକର୍ତ୍ତାଙ୍କ ସହିତ ଅଞ୍ଚଳବାସୀ ସାମିଲ ଥିଲେ ।