02-Jun-2025

ବିନିକା(ହିମାଂଶୁ ଶେଖର ପୁଟେଲ) ଶନିବାର ବିଳମ୍ବିତ ରାତିରେ ଗାନ୍ଧର୍ବ ରୀତିରେ ଶେଷ ହୋଇଛି ଦେବ ଦେବ ମହାଦେବ ତଥା ବିଶେଶ୍ୱର ବାବା ଓ ମାତା ପାର୍ବତୀଙ୍କ ବିବାହ ଉତ୍ସବ ।ବିନିକା ଜୁହ୍ମାପଡା ସ୍ଥିତ ଗୋପାଳଜି ମନ୍ଦିର ଠାରେ ମାତା ପାର୍ବତୀଙ୍କ ସହ ଭୋଲାବାବା ବିଶେଶ୍ୱରଙ୍କ ବିବାହ ସମ୍ପନ୍ନ ହେବାପରେ ଶ୍ରଦ୍ଧାଳୁଙ୍କୁ ଦର୍ଶନ ଦେଇଛନ୍ତି । ବରବଧୁ ବେଶରେ ଯୁଗଳ ମୂର୍ତ୍ତି ଦର୍ଶନ କଲେ କୁଆଡେ ପୁଣ୍ୟଫଳ ମିଳେ ବୋଲି ବିଶ୍ଵାସ ରହିଥିବାରୁ ଗତକାଲି ରବିବାର ସନ୍ଧ୍ୟାରେ ଦେବ ଦମ୍ପତିଙ୍କ ମନ୍ଦିର ପ୍ରତ୍ୟାବର୍ତ୍ତନ ଶୋଭାଯାତ୍ରାରେ ହଜାର ହଜାର ଶ୍ରଦ୍ଧାଳୁ ଭକ୍ତ ସାମିଲ ହୋଇ ଶିବ-ପାର୍ବତୀଙ୍କ ଦର୍ଶନ କରିଛନ୍ତି।୧୫୨ବର୍ଷରେ ପଦାର୍ପଣ କରିଥିବା ବିନିକା ଶୀତଳଷଷ୍ଠୀ ଯାତ୍ରା ଅର୍ଥାତ ଶିବ ପାର୍ବତୀଙ୍କ ବିବାହ ଉତ୍ସବ ଆନନ୍ଦ ଉଲ୍ଲାସ ମଧ୍ୟରେ ପାଳିତ ହୋଇଯାଇଛି । ଏଥିରେ ପୂଜକ ଉମାବଲ୍ଲଭ ଷଡ଼ଙ୍ଗୀ ବିବାହ କାର୍ଯ୍ୟ ତୁଲାଇଥିଲେ । କନ୍ୟାପକ୍ଷରୁ ଯଥାରୀତି ଯାନି ଯୌତୁକ ଦିଆଯାଇଥିଲା ।ପରେ ବରପକ୍ଷଙ୍କ ସହ ବରାତିରେ ଆସିଥିବା ଭକ୍ତଙ୍କୁ ପ୍ରସାଦ ଦିଆଯାଇଥିଲା ।ସନ୍ଧ୍ୟା ପ୍ରାୟ ୭ଘଣ୍ଟା ସମୟରେ ଦେବ ଦମ୍ପତିଙ୍କ ମନ୍ଦିର ବାହୁଡ଼ା ଯାତ୍ରା ଆରମ୍ଭ ହୋଇଥିଲା ।ପ୍ରଭୁଙ୍କ ସହ ବିନିକାର ବିଭିନ୍ନ ଦେବା ଦେବୀ ମଧ୍ୟ ସାମିଲ ହୋଇଥିଲେ ।ବରବଧୂ ବେଶରେ ଯୁଗଳ ମୂର୍ତ୍ତିଙ୍କୁ ସୁସଜ୍ଜିତ ରଥରେ ବିରାଜମାନ କରାଇ ସାରା ନଗରବାସୀଙ୍କ ସହ ଅଞ୍ଚଳର ହଜାର ହଜାର ଶ୍ରଦ୍ଧାଳୁ ଭକ୍ତଙ୍କ ଜୟ ଜୟ ଧ୍ୱନି ଓ ମା ମାଉସୀଙ୍କ ହୁଳହୁଳି ଧ୍ବନିରେ ଶୋଭାଯାତ୍ରା ସହର ପରିକ୍ରମା କରିଥିଲା  ।ଶୋଭାଯାତ୍ରାରେ ଘଣ୍ଟବାଦ୍ୟ,ବାଡ଼ିଖେଲ, ଦୂଳଦୁଲି,ଦଣ୍ଡନୃତ୍ୟ,ସଙ୍କୀର୍ତ୍ତନ,ଡିଜେର ତାଳେ ତାଳେ ମହିଳାଙ୍କ ଦ୍ଵାରା ନୃତ୍ୟ ପରିବେଷଣ ଆଦି ସାଂସ୍କୃତିକ କାର୍ଯ୍ୟକ୍ରମ ସହ ଘଣ୍ଟ,ଶଙ୍ଖ ଓ ହୁଳହୁଳି ଧ୍ବନିରେ ସହର ପ୍ରକମ୍ୱିତ ହୋଇଥିଲା ।ଏହି ଅବସରରେ ଦେବ ଦମ୍ପତିଙ୍କ ଦର୍ଶନ ପାଇଁ ବିନିକା ସହରର ଦଣ୍ଡସନା ପଡ଼ା,ମାରୱାଡ଼ି ପଡ଼ା,ରାଜାଜି ମାର୍ଗ,ପୁରୁଣା ବସଷ୍ଟାଣ୍ଡ ଦୁର୍ଗାମଣ୍ଡପ,ହାଇସ୍କୁଲ ଛକ,ଦୈନଦିନ ବଜାର ଛକ,ତହସିଲ ଛକ,ନୂଆପଡ଼ା,ମହିମାପଡ଼ା,ରଥପଡ଼ା ତଥା ମୁଖ୍ୟ ରାସ୍ତାର ଉଭୟ ପାର୍ଶ୍ବରେ ଶତାଧିକ ଶ୍ରଦ୍ଧାଳୁ ଉପସ୍ଥିତ ରହି ପ୍ରଭୁଙ୍କ ଦର୍ଶନ କରିବାର ସୁଯୋଗ ନେଇଥିଲେ ।ପରେ ଦେବ ଦମ୍ପତି ମନ୍ଦିରକୁ ପ୍ରତ୍ୟାବର୍ତ୍ତନ କରିଥିଲେ ।ଅନୁଷ୍ଟିତ ଏହି ଶୀତଳଷଷ୍ଠୀ ଯାତ୍ରାରେ ପ୍ରଭୁ ଶିବଙ୍କ ପିତା ମାତା ଭାବେ କ୍ଷୀରୋଦ ଚନ୍ଦ୍ର ସାମନ୍ତରାୟ ଓ ତାଙ୍କ ଧର୍ମପତ୍ନୀ ମୌସୁମୀ ରାଣୀ ମିଶ୍ର,ପାର୍ବତୀଙ୍କ ପିତା ମାତା ଭାବେ  ଶ୍ୟାମ ସୁନ୍ଦର ମେହେର ଓ ତାଙ୍କ ଧର୍ମପତ୍ନୀ ସୀମା ମେହେର ଦାୟିତ୍ଵ ନିର୍ବାହ କରିଥିଲେ ।ଶୀତଳଷଷ୍ଠୀ ଯାତ୍ରା ପରିଚାଳନା କମିଟିର ସମସ୍ତ କର୍ମକର୍ତ୍ତାଙ୍କ ସହ ବିଭିନ୍ନ ଅନୁଷ୍ଠାନର ସଦସ୍ୟ ଓ ଅଞ୍ଚଳବାସି ସାମିଲ ହୋଇ ସକ୍ରିୟ ସହଯୋଗ କରିଥିଲେ ।