31-May-2025

ଖଡ଼ିଆଳ: ଆଣ୍ଠୁଏ ପାଣିରେ ବୁଡି ରହିଛି ପାଚିଲା ଧାନ, ଆଉ ପାଣି ଭିତରୁ ଧାନ କାଟୁଛି ଚାଷୀ। ଏମିତି ଦୃଶ୍ୟ ଦେଖିବାକୁ ମିଳିଛି ନୂଆପଡ଼ା ଜିଲ୍ଲାର ଖଡ଼ିଆଳ ବ୍ଲକରେ। ଏହି ବ୍ଲକର ଖୁଦପେଜ ଗ୍ରାମ ପଞ୍ଚାୟତ ର ଚଲାନପଡା, ଖୁଦପେଜ,ଗୋଇମୁଣ୍ଡି, ଠକପାଲି, କିକିରି ବେଡା,ଦର୍ଲିପଡା,  ସାନ ମହେଶ୍ୱର ଗ୍ରାମ ପଞ୍ଚାୟତ ର ସାନମହେଶ୍ୱର, ବଡ଼ ମହେଶ୍ୱର, ତିଖାଳି,  କୁଳିଗାଁ, ରଜା ମୁଣ୍ଡା  ଚିନ୍ଦାଗୁଡା ଗ୍ରା.ପ, ବାଦି ଗ୍ରା. ପ ବରଗାଁ ଗ୍ରା. ପ ମାଣ୍ଡୋସିଲ ଗ୍ରା. ପ ଆଦି ଗ୍ରାମ ପଞ୍ଚାୟତର ବିଭିନ୍ନ ଗ୍ରାମରେ ସହସ୍ରାଧିକ ଜମିରେ ରବି ଧାନ ଚାଷ କରାଯାଇଥିଲା। ଧାନ ମଧ୍ୟ ଭଲ ହୋଇଥିଲା କିନ୍ତୁ ଅମଳ ସମୟରେ ଦାଉ ସାଜିଲା କାଳ ବୈଶାଖି। କିଛି ଦିନ ହେବ କାଳ ବୈଶାଖି ଜନିତ ବର୍ଷାରେ ନଷ୍ଟ ହୋଇ ଯାଇଛି ଧାନ ଫସଲ। ବିଲ ଉପରେ ପାଣି ସୁଅ ବୋହୁଥିବା ବେଳେ ପାଣି ଭିତରେ ଶେଷ ନିଃଶ୍ୱାସ ଗଣୁଛି ପାଚିଲା ଧାନ। କିଛି ଚାଷୀ ଧାନ କାଟି ରଖିଥିବା ବେଳେ ବର୍ଷା ହେବାରୁ ଖଳାକୁ ଆଣି ପାରିନି। ପୁଣି କିଛି ଚାଷୀ ଧାନ କାଟିବା ପୂର୍ବରୁ ବର୍ଷା ହେବାରୁ ଧାନ ଗଛ ସବୁ ପାଣିରେ ବୁଡି ରହିଛି। ବାଧ୍ୟ ହୋଇ କିଛି ଚାଷୀ ପାଣି ଭିତରୁ ଧାନ କାଟି ହିଡ ଉପରେ ସାଇତି ରଖୁଛନ୍ତି। ଏବେ ଅଧା ଅମଳ ହେବାର ମଧ୍ୟ ଆଶା ନାହିଁ। ମଣ୍ଡିକୁ ଗଲେ କଟନି ଛଟନି ରେ ଧାନ ବିକ୍ରି ହେବନି। ବ୍ୟାଙ୍କ୍ ଋଣ ଓ ସାହୁକାର ଠାରୁ ଆଣିଥିବା ଧାର କରଜ ଟଙ୍କା କେମିତି ଶୁଝିବ ସେଇ ଚିନ୍ତାରେ ଚାଷୀ ଆଖିରେ ନିଦ ନାହିଁ। ଏବେ ସରକାରୀ ସହାୟତା ହିଁ ତା ପାଇଁ ଏକମାତ୍ର ଭରସା। ଏନେଇ ଖଡ଼ିଆଳ ବ୍ଲକ କୃଷି ଅଧିକାରୀ ପୂର୍ଣ୍ଣଚନ୍ଦ୍ର ନାଏକଙ୍କୁ ପଚାରିବାରୁ ରାଜସ୍ବ ବିଭାଗ ଓ କୃଷି ବିଭାଗ ତରଫରୁ ତଦନ୍ତ ଚାଲିଛି, ଅତିଶିଘ୍ର ସରକାରଙ୍କୁ ରିପୋର୍ଟ ପ୍ରଦାନ କରାଯିବ ବୋଲି କହିଛନ୍ତି।

ନୂଆପଡା ଜିଲ୍ଲାରୁ ପରମେଶ୍ୱର ମେହେର ରିପୋର୍ଟ