25-May-2025

ବରଗଡ଼:- (ନିରଞ୍ଜନ ତ୍ରିପାଠୀ)
ବରଗଡ଼ ଜିଲ୍ଲା ପଦ୍ମପୁର ଉପଖଣ୍ଡର ଛଅଟି ବିଦ୍ୟାଳୟର ସିବିଏସଇ ପରୀକ୍ଷା ଫଳ ପ୍ରକାଶ ପାଇନଥିବାରୁ ପ୍ରଭାବିତ ଛାତ୍ରଛାତ୍ରୀମାନେ ତା ୨୪.୦୫.୨୦୨୫ରିଖ ସକାଳ ୧୦ ଘଟିକାରେ ଉପଜିଲାପାଳ କାର୍ଯ୍ୟାଳୟ ସମ୍ମୁଖରେ ଆମରଣ ଅନଶନ ଆରମ୍ଭ କରିଥିଲେ । କିନ୍ତୁ ମଙ୍ଗଳବାର ଦିନ ଫଳ ପ୍ରକାଶ ପାଇବ ବୋଲି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ପ୍ରତିଶ୍ରୁତି ଦେବାରୁ ଛାତ୍ରଛାତ୍ରୀ ମାନେ ଅନଶନକୁ ସ୍ଥଗିତ ରଖୁଛନ୍ତି । କେନ୍ଦ୍ରୀୟ ମାଧ୍ୟମିକ ଶିକ୍ଷାବୋର୍ଡ(ସିବିଏସଇ) ପରିଚାଳିତ ଦଶମ ଓ ଦ୍ବାଦଶ ଶ୍ରେଣୀ ପରୀକ୍ଷା ଫଳ ସାରା ଦେଶରେ ଗତ ୧୩ ତାରିଖରେ ପ୍ରକାଶିତ ହୋଇଥିବା ବେଳେ ବରଗଡ଼ ଜିଲ୍ଲା ପଦ୍ମପୁର ଉପଖଣ୍ଡର ୬ଟି ବିଦ୍ୟାଳୟର ୧୧୮୫ ଜଣ ଛାତ୍ରଛାତ୍ରୀଙ୍କ ପରୀକ୍ଷାଫଳ ଏ ପର୍ଯ୍ୟନ୍ତ ପ୍ରକାଶ ପାଇନାହିଁ। ପଦ୍ମପୁର, ପାଇକମାଲ, ଗାଇସିଲେଟ ଓ ସୋହେଲାରେ ଥିବା ଓଡ଼ିଶା ଆଦର୍ଶ ବିଦ୍ୟାଳୟ ସହିତ ପଦ୍ମପୁରର ଜେନିଥ ଗୁରୁକୂଳ ବିଦ୍ୟାଳୟ ଓ ପଦ୍ମପୁର ପବ୍ଲିକ ସ୍କୁଲ ଆଦି ୬ଟି ବିଦ୍ୟାଳୟର ଛାତ୍ରଛାତ୍ରୀଙ୍କ ପରୀକ୍ଷା ଫଳ ପ୍ରକାଶ ପାଇନଥିବାରୁ ଏହି ଛାତ୍ରଛାତ୍ରୀ ଓ ସେମାନଙ୍କ ଅଭିଭାବକମାନେ ମାନସିକ ଦୁଃଶ୍ଚିନ୍ତାରେ ଅଛନ୍ତି। ପରୀକ୍ଷା ଫଳ ପ୍ରକାଶ ପାଇଲା ଦିନ ଏହି ୬ ବିଦ୍ୟାଳୟର ପରୀକ୍ଷା ଫଳ ପରବର୍ତ୍ତୀ ସମୟରେ ପ୍ରକାଶ ପାଇବ ବୋଲି ଉଲ୍ଲେଖ କରାଯାଇଥିଲା। କିନ୍ତୁ ଇତି ମଧ୍ୟରେ ଏଗାର ଦିନ ବିତି ସାରିଥିଲେ ମଧ୍ୟ ଫଳ ପ୍ରକାଶ ପାଇନାହିଁ । ଏହି ଅଭିଭାବକମାନେ କେନ୍ଦ୍ରୀୟ ମାଧ୍ଯମିକ ଶିକ୍ଷା ବୋର୍ଡ କର୍ତ୍ତୃପକ୍ଷ, ବରଗଡ଼ ସାଂସଦ ଓ ଜିଲ୍ଲା ଶିକ୍ଷା ଅଧିକାରୀଙ୍କୁ ଏ ସମ୍ପର୍କରେ ଅବଗତ କରି ଆସୁଥିଲେ ମଧ୍ୟ କିଛି ଲାଭ ମିଳିଲା ନାହିଁ। ମାନ୍ୟବର ବରଗଡ଼ ସାଂସଦ ପ୍ରଦୀପ ପୁରୋହିତ  ସିବିଏସଇକୁ ଲିଖୂତ ଅନୁରୋଧ  ମଧ୍ୟ କରି ସାରିଛନ୍ତି । ପଦ୍ମପୁର ଅତିରିକ୍ତ ଜିଲ୍ଲାପାଳ, ଉପଜିଲ୍ଲାପାଳ ଓ ଜିଲ୍ଲା ଶିକ୍ଷାଧୂକାରୀ ଏ ଦିଗରେ କୌଣସି ପଦକ୍ଷେପ ନେଇ ପାରୁନାହାନ୍ତି। ତେଣୁ ଏହି ୬ଟି ବିଦ୍ୟାଳୟର ଛାତ୍ରଛାତ୍ରୀ ଅନ୍ୟ ହତୋତ୍ସାହିତ ହୋଇ  ଶେଷରେ ଉପଜିଲ୍ଲାପାଳ କାର୍ଯ୍ୟାଳୟ ସମ୍ମୁଖରେ ଗତକାଲିଠାରୁ  ଆମରଣ ଅନଶନରେ ବସିଥିଲେ। ଆନ୍ଦୋଳନ ସ୍ଥଳକୁ ପଦ୍ମପୁର ବିଧାୟିକା ବର୍ଷା ସିଂ ବରିହା ଆସି ସେମାନଙ୍କୁ ସମର୍ଥନ ଜଣାଇଥିଲେ। ଏହି ୬ଟି ବିଦ୍ୟାଳୟର ଅଭିଭାବକମାନେ ରାଜ୍ୟସଭା ସାଂସଦ ନିରଞ୍ଜନ ବିଶିଙ୍କୁ ଏ ସମ୍ପର୍କରେ ଲିଖୁତ ଅନୁରୋଧ କରିଥିଲେ । ରାଜ୍ୟସଭା ସଦସ୍ୟ ଶ୍ରୀ ବିଶି କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ନିକଟକୁ ଚିଠି ଲେଖି ଏହି ଛାତ୍ରଛାତ୍ରୀଙ୍କ ଭବିଷ୍ୟତକୁ ଆଖି ଆଗରେ ରଖି ସେମାନଙ୍କ ପରୀକ୍ଷାଫଳ ଶୀଘ୍ର ପ୍ରକାଶନ ଦିଗରେ ପଦକ୍ଷେପ ନେବାକୁ ଜଣାଇଛନ୍ତି । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଏ ବାବଦରେ ଆଲୋଚନା କରିବା ପାଇଁ ଛାତ୍ର ଛାତ୍ରୀଙ୍କ ଏକ ପ୍ରତିନିଧି ମଣ୍ଡଳୀକୁ ସମ୍ବଲପୁରକୁ ଡାକିଥିଲେ । କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହିତ  ସମ୍ବଲପୁରରେ ଅଭିଭାବକ ଓ ଛାତ୍ର ଆଲୋଚନା କରିଥିଲେ। ମନ୍ତ୍ରୀ ଆସନ୍ତା ମଙ୍ଗଳବାର ସୁଦ୍ଧା ପରୀକ୍ଷା ଫଳ ପ୍ରକାଶ ପାଇବ ବୋଲି ପ୍ରତିଶ୍ରୁତି ଦେଇଥିବା ଜଣାପଡିଛି। ତେଣୁ ଅଭିଭାବକ ଓ ଛାତ୍ରଛାତ୍ରୀ ଙ୍କ ମଧ୍ୟରେ ଆଲୋଚନା ହୋଇ ଆସନ୍ତା ମଙ୍ଗଳବାର ପର୍ଯ୍ୟନ୍ତ ଅନଶନ କୁ ସ୍ଥଗିତ କରାଯାଇଛି। ଫଳାଫଳ ପ୍ରକାଶ ନହେଲେ ପୁଣି ବୁଧବାରରୁ ଆନ୍ଦୋଳନ ହେବ ବୋଲି ଛାତ୍ରଛାତ୍ରୀ ମାନେ ଦୃଢ଼ତା ର ସହ ମତବ୍ୟକ୍ତ କରିଛନ୍ତି ।