12-May-2025

ବରୀ ବାଲିବିଲି ପଞ୍ଚାୟତ ମଧ୍ୟ ଦେଇ କେନ୍ଦ୍ରପଡାକୁ ସଂଯୋଗ କରୁଥିବା ଗାନ୍ଧିମାର୍ଗ ଅନ୍ଧକାରମୟ । ମାସକୁ ମାସ ଟାଟା ପାୱାର ରୋକଠୋକ ବିଲ୍  ଆଦାୟ କରିନେଉଥିବାବେଳେ ଅନ୍ଧାରରେ ବରିବାସୀ। ସନ୍ଧ୍ୟା ହେଲେ କଳା କିଟି କିଟି ଅନ୍ଧାରରେ ଲୋକମାନେ  ଯାତାୟାତ କରୁଛନ୍ତି ।  ଅନ୍ଧକାର ରାସ୍ତାରେ ଅନେକ ସମୟରେ  ଯାତ୍ରୀମାନେ ଦୁର୍ଘଟଣାର ଶିକାର  ବି ହେଉଛନ୍ତି । ଏ ସବୁକୁ 10 ଖଣ୍ଡ ପଂଚାୟତ ବାସିନ୍ଦା ନିନ୍ଦା କରୁଥିବାବେଳେ ଜିଲ୍ଲାପ୍ରଶାସନ ଆଖିରେ ଅନ୍ଧପୁଟୁଳି ବାନ୍ଧି ବସିରହିଥିବା ଅଭିଯୋଗ ଆଣନ୍ତି ବୁଦ୍ଧିଜୀବୀ । ଓଡ଼ିଶାର ସୁପରିଚିତ ବାଲିବିଲିର ସାଇ ମନ୍ଦିରକୁ ଦୃଷ୍ଟିରେ ରଖି  ପୂର୍ବତନ ବିଧାୟିକାଙ୍କ ପ୍ରଚେଷ୍ଟାରେ ମନ୍ଦିର ପାର୍ଶ୍ୱର  ଦୀର୍ଘ ଦୁଇ କିଲୋମିଟର ରାସ୍ତାରେ 71 ଟି ଷ୍ଟ୍ରିଟ୍‌ ଲାଇଟ୍‌ ର ବ୍ୟବସ୍ଥା କରାଯାଇଥିଲେ ମଧ୍ୟ ଏବେ ତାହା ସମ୍ପୂର୍ଣ୍ଣ ରୂପେ ଅଚଳ ହୋଇପଡ଼ିଛି। ବାରମ୍ବାର ପ୍ରଶାଶନର ଦ୍ୱାରସ୍ଥ ହୋଇ ପଂଚାୟତବାସୀ ଥକି ପଡ଼ିଥିବା ବେଳେ ବରିବାସୀଙ୍କ ମନରେ ଅସନ୍ତୋଷ ଦେଖାଦେଇଛି।