27-Apr-2025

ତୁଷୁରା ( ପଞ୍ଚାନନ ନାଏକ) ବଲାଙ୍ଗୀର ଜିଲ୍ଲା ତୁଷୁରା ସହରକୁ ଲାଗି କରି ସୋନଗଡ ନଦୀ ଓ ତେଲନଦୀ ରହିଥିଲେ ମଧ୍ଯ ତୁଷୁରା ଏନଏସି ଅଞ୍ଚଳରେ ଦିନକୁ ଦିନ ପାନୀୟଜଳ ସମସ୍ୟା ଦେଖା ଦେଉଛି। ଏନେଇ କିଛି ଜନସାଧାରଣ ଓ ସାମ୍ବାଦିକ ମାନେ ପାନୀୟଜଳ ସମସ୍ୟା ନେଇ ତୁଷୁରା ଜନସ୍ବାସ୍ଥ୍ୟ ବିଭାଗର କାର୍ଯ୍ୟାଳୟକୁ ଯାଇଥିଲେ । ସମସ୍ୟା ନେଇ ବିଭିନ୍ନ ପ୍ରଶ୍ନ ପଚାରିଥିବାରୁ କାର୍ଯ୍ୟାଳୟର ଅଧିକାରୀ ତଥା ଯନ୍ତ୍ରୀ ବିଜୟ ବେହେରା ଜଣେ ସାମ୍ବାଦିକକୁ ଅଫିସରୁ ବାହାରି ଯିବାକୁ କହିବା ସହ ମିଥ୍ୟା କେଶରେ ଫସାଇବାକୁ ଧମକ ଦେଇ ଥିବା ଭିଡିଓ ଭାଇଲାଲ ହେଉଛି। ଜଣେ ସାମ୍ବାଦିକକୁ ଯନ୍ତ୍ରୀ ମହାଶୟ ଏପରି ବ୍ଯବହାର କରୁଛନ୍ତି ତେବେ ସାଧାରଣ ଲୋକଙ୍କୁ କିପରି କରୁଥିବେ ସାଧାରଣରେ ଚର୍ଚ୍ଚାର କେନ୍ଦ୍ର ବିନ୍ଦୁ ପାଳଟିଛି। ଦିନକୁ ଦିନ ଗ୍ରୀଷ୍ମର ତାତି ଯେତେ ବଢ଼ୁଛି ଜଳ କଷ୍ଟ ମଧ୍ଯ ସେତେ ପରିମାଣରେ ବଢ଼ୁଛି। ଗ୍ରାମାଞ୍ଚଳ ଲୋକେ ପୋଖରୀ ପାଣି କୁ ବ୍ୟବହାର କରୁଥିବା ବେଳେ ତୁଷୁରା ସହରାଞ୍ଚଳର  ପ୍ରତି ଘରକୁ ସରକାର ପାଇପ ଯୋଗେ ପାନୀୟଜଳ ଯୋଗାଇଦେବାର ବ୍ୟବସ୍ଥା କରିଛନ୍ତି। ଘର ବାଟରେ ମିଟର ବି ବସିଛି ହେଲେ ପାଣି ବାହାରୁ ନାହିଁ। ଜଳ ଯନ୍ତ୍ରଣାର ଅଭିଯୋଗ କରିବାକୁ ଗଲେ ଯନ୍ତ୍ରୀ ଦେଖାଉଛନ୍ତି ନାଳି ଆଖି ସାଧାରଣ ଲୋକକୁ ଦେଉଛନ୍ତି ଅପବ୍ୟବହାର। ଲୋକଙ୍କ ସରକାରରେ ଯଦି ଲୋକଙ୍କ ଅସୁବିଧା ବୁଝୁଥିବା ବାବୁ ଅସୁବିଧା ଦୂର କରିବା ବଦଳରେ ଦୁର୍ବ୍ୟବହାର କରିବେ ତେବେ ଲୋକେ କାହାକୁ ଗୁହାରୀ କରିବେ ବୋଲି ସାଧାରଣରେ ଆଲୋଚନା ହେଉଛି। ଏହାକୁ ନେଇ ତୁଷୁରା ସହରରେ ଦିନକୁ ଦିନ ଅସନ୍ତୋଷ ବୃଦ୍ଧି ପାଇବାରେ ଲାଗିଛି ।  ତୁଷୁରା ସହରାଞ୍ଚଳରେ ଥିବା ଜନ ସ୍ଵାସ୍ଥ୍ୟ ବିଭାଗର କାର୍ଯ୍ୟାଳୟକୁ ପାନୀୟଜଳ ସମସ୍ୟା ନେଇ ବ୍ରଜ କିଶୋର ବେହେରା ଓ ଶମ୍ଭୁ ତରିଆ (ଝାଡୁ)  ଅଭିଯୋଗ କରିବାକୁ ଯାଇଥିଲେ । ଅଧିକାରୀ କିଛି ନଶୁଣିବାରୁ କିଛି ସାମ୍ବାଦିକ ଘଟଣା ସ୍ଥଳକୁ ପହଞ୍ଚିଥିଲେ। ତାଙ୍କୁ ଦେଖି ଯନ୍ତ୍ରୀ ମହାଶୟ ରାଗୀ ଯାଇ ଏଣୁ ତେଣୁ କହିବା ସହ ଦୁର୍ବ୍ୟବହାର ପ୍ରଦର୍ଶନ କରିବାକୁ ପଛାଇ ନଥିବା ତୋଷାଳୀ ସଂଘର ସଂପାଦକ ଶମ୍ଭୁ ପ୍ରସାଦ ସାହୁ ମୁଖ୍ୟମନ୍ତ୍ରୀଙ୍କୁ ଲିଖିତ ଅଭିଯୋଗ କରିଛନ୍ତି। ଏନେ ସ୍ବାସ୍ଥ୍ୟ ବିଭାଗର ଯନ୍ତ୍ରୀ ବିଜୟ ବେହେରାଙ୍କ ମୋବାଇଲ ନମ୍ବର ୮୯୧୭୨୧୭୭୩୦କୁ ବହୁଥର ଫୋନ କରାଯାଇ ଥିଲେ ମଧ୍ଯ ରିଙ୍ଗ ହେଉଥିଲା କିନ୍ତୁ ଫୋନ ଉଠାଇ ନଥିବାରୁ ତାଙ୍କର ମତାମତ ନିଆଯାଇ ପାରିଲା ନାହିଁ। ଏନେଇ ତୁଷୁରା ଏନଏସି ଅଧ୍ୟକ୍ଷ ଅଜୟ କୁମାର ଜୟଶ୍ବାଲଙ୍କୁ ପଚାରିବାରୁ ଯନ୍ତ୍ରୀକୁ ଡାକି ପାଣି ସମସ୍ୟାକୁ ନେଇ ତଦନ୍ତ କରାଯିବା ସହ ଘଟଣା ସଂପର୍କ ପଚାରି ବୁଝିବି ବୋଲି କହିଛନ୍ତି। ଏନେଇ ଜିଲ୍ଲା ପ୍ରଶାସନ ଦୃଷ୍ଟି ଦେବାକୁ ବିଭିନ୍ନ ମହଳରୁ ଦାବୀ ହେଉଛି।