26-Apr-2025

ସିନ୍ଧେକେଲା

ଅନୀଲ କୁମାର ତ୍ରିପାଠୀ 

ବଲାଙ୍ଗୀର ଜିଲ୍ଲାର ଐତିହ୍ୟ ସମ୍ପନ୍ନ ରାଣୀପୁର ଝରିଆଲ ବିକାଶ ଓ ଉନ୍ନତି ପାଇଁ ଶନିବାର ୧୯ ତାରିଖ ଗଣମାଧ୍ୟମ ରେ ସମ୍ଭାବନା ହରାଉଛି ରାଣୀପୁର ଝରିଆଲ, ନାଁ କୁ ଜାତୀୟ ଐତିହ୍ୟ ମାନ୍ୟତା , ଭିତ୍ତିଭୂମି ଶୁନ  ଶୀର୍ଷକ ଖବର ପ୍ରକାଶିତ ହୋଇଥିଲା। ତେବେ ମଙ୍ଗଳବାର ୨୨ ତାରିଖ ଟିଟିଲାଗଡ଼ ଉପଜିଲ୍ଲାପାଳ ଙ୍କ ଚିଠି ସଂଖ୍ୟା ୨୫୨୫ ରେ ଟିଟିଲାଗଡ଼ ସହାୟକ ଜିଲ୍ଲାପାଳଙ୍କୁ ରାଣୀପୁର ଝରିଆଲ ପହଞ୍ଚି ଭିତ୍ତିଭୂମି ବିଷୟରେ ସବିଶେଷ ତଥ୍ୟ ଉପସ୍ଥାପନ କରିବାପାଇଁ ନିର୍ଦ୍ଦେଶ ଦେଇଥିଲେ। ଏହାକୁ ନେଇ ଶୁକ୍ରବାର ସହାୟକ ଜିଲ୍ଲାପାଳ ସନ୍ଦିପ କୁମାର ଚନ୍ଦ୍ରକାର ଙ୍କ ନେତୃତ୍ୱରେ ବଙ୍ଗୋମୁଣ୍ଡା ବିଡ଼ିଓ ଶଙ୍କର୍ଷଣ ବେହେରା, ଅତିରିକ୍ତ ତହସିଲଦାର ହେମନ୍ତ କୁମ୍ଭାର, ବଙ୍ଗୋମୁଣ୍ଡା ରେଞ୍ଜର ପଦ୍ମନାଭ କୁମ୍ଭାର, ଏଏଓ ସ୍ମାର୍କୀ ପ୍ରଧାନ, ଉଦ୍ୟାନ କୃଷି ଅଧିକାରୀ ସୁନିଲ ମାଝୀ, ଆରଡବ୍ଲୁଏସଏସ ଇଇ କଣ୍ଟାବାଞ୍ଜି ପ୍ରଶାନ୍ତ କୁମାର ବାଗେ, କନିଷ୍ଠ ଯନ୍ତ୍ରୀ ସତ୍ୟ ସାରଦା ମହାନ୍ତି, ବିଦ୍ୟୁତ ବିଭାଗର କନିଷ୍ଠ ଯନ୍ତ୍ରୀ ଶିବଶଙ୍କର ଦାସ, ରାଜସ୍ବ ନୀରିକ୍ଷକ ରାକେଶ ବେହେରା ପ୍ରମୁଖ ଉପସ୍ଥିତ ରହି ରାଣୀପୁର ଝରିଆଲ ରେ କୋଉଠି କି ପ୍ରକାର ବିକାଶ କରାଗଲେ ଠିକ ହେବ ତା ଉପରେ ପୁଙ୍ଖାନୁପୁଙ୍ଖ ଆଲୋଚନା କରିଥିଲେ। ଏବଂ ବିଦ୍ୟୁତ, ପାଣି, ଫରେଷ୍ଟ ପାର୍କ, ଉଦ୍ୟାନ, କୃଷି ତଥା ଏ ଅଞ୍ଚଳର ଖାଦ୍ୟ ଓ ଏ ଅଞ୍ଚଳରେ ତିଆରି ହେଉଥିବା ବିଭିନ୍ନ ସାମଗ୍ରୀ କୁ ମଧ୍ୟ ସାମିଲ କେମିତି କରାଯିବ ତା ଉପରେ ମନ୍ଦିର ଟ୍ରଷ୍ଟ କମିଟିର ସମସ୍ତ ସଦସ୍ୟ ତଥା ଉପସ୍ଥିତ ଥିବା ବିଭିନ୍ନ ଅଧିକାରୀ ମାନଙ୍କ ସହ ଆଲୋଚନା କରିଥିଲେ। ଝରିଆଲ ସରପଞ୍ଚ ଓ ଇଓ ଙ୍କୁ ତୁରନ୍ତ ସମିଆ ପୋଖରୀରେ ଆଗରୁ ସ୍ଵିକୃତି ମିଳିଥିବା ୧୦ ଲକ୍ଷ ଟଙ୍କାର ଏନ୍ଆରଇଜିଏ କାମ ଆରମ୍ଭ କରିବାକୁ ନିର୍ଦ୍ଦେଶ ଦେଇଥିଲେ। ତଥା ଉପସ୍ଥିତ ସମସ୍ତ ଅଧିକାରୀଙ୍କୁ ନିଜନିଜ ପ୍ରୋଜେକ୍ଟ ତିଆରି କରି ତୁରନ୍ତ ଦାଖିଲ କରିବାକୁ ନିର୍ଦ୍ଦେଶ ଦେଇଥିଲେ। ଏହି ସମୟରେ ବିଭିନ୍ନ ଏସଏଚଜି ଗ୍ରୁପ ମଧ୍ୟରୁ କଁସିଲ ଗ୍ରାମର ମହିଳାମାନେ ନିଜ ହାତରେ ବୁଣିଥିବା ଶାଢ଼ୀ ପ୍ରଦର୍ଶନ କରିଥିଲେ। ତେବେ ଆଗାମୀ ଦିନରେ ଏ ଅଞ୍ଚଳର ବିଭିନ୍ନ ସାମଗ୍ରୀ ସହ ବୁଣାକାର ମାନଙ୍କୁ ମଧ୍ୟ ରାଣୀପୁର ଝରିଆଲ ପର୍ଯ୍ୟଟନ ଭିତ୍ତିଭୂମି ରେ ଉଚିତ ସ୍ଥାନ ମିଲିବ ବୋଲି ଶ୍ରୀ ଚନ୍ଦ୍ରକାର କହିଥିଲେ। ଶେଷରେ ମନ୍ଦିର ଟ୍ରଷ୍ଟ କମିଟି ତରଫରୁ ସମସ୍ତଙ୍କୁ ଧନ୍ୟବାଦ ପ୍ରଦାନ କରାଯାଇଥିଲା।