22-Apr-2025

ଆଗଲପୁର, (ବିନୋଦ ଦୀପ) ଆଗଲପୁର ପଞ୍ଚାୟତ ସମିତି ମହାବିଦ୍ୟାଳୟ, ବାଣୀନିକେତନ ପାଇଁ ଜମି ପ୍ରଦାନ କରିଥିବା ରୋତର ଧର୍ମପରାୟଣା ଶତାୟୁ ମହିଳା ରକ୍ଷାବତୀ ପଟେଲ ୧୦୨ ବର୍ଷ ବୟସରେ ଇହଲୀଳା ସମ୍ବରଣ କରିଥିବାରୁ  ଆଜି କଲେଜରେ ତାଙ୍କ ଉଦ୍ଦେଶ୍ଯରେ ଏକ ଶୋକସଭା ଅନୁଷ୍ଠିତ ହୋଇଯାଇଛି। ମହାବିଦ୍ୟାଳୟର ଅଧ୍ୟକ୍ଷ ପ୍ରଦୀପ କୁମାର ଷଡଙ୍ଗୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଭାରେ ମହାବିଦ୍ୟାଳୟର ସମସ୍ତ ଅଧ୍ୟାପକ, ଅଧ୍ୟାପିକା ଓ କର୍ମଚାରୀବୃନ୍ଦ ଉପସ୍ଥିତ ରହି ତାଙ୍କ ଫଟୋଚିତ୍ରରେ ଶ୍ରଦ୍ଧାଞ୍ଜଳି ପ୍ରଦାନ ପୂର୍ବକ ପ୍ରଥମେ ଦୁଇ ମିନିଟର ନିରବ ପ୍ରାର୍ଥନା କରିଥିଲେ। ରୋତ ଭଳି ଏକ ଅନୁନ୍ନତ ଅଞ୍ଚଳରେ ଉଚ୍ଚଶିକ୍ଷାର ବିକାଶ କଥା ଚିନ୍ତା କରି ୧୯୮୩ ମସିହାରେ କଲେଜ ପାଇଁ ଆବଶ୍ୟକ ଜମି ଯୋଗାଇ ଦେଇଥିବା ସ୍ବର୍ଗତା ପଟେଲ ନିଜେ ଜଣେ ଅନୁଷ୍ଠାନ ବୋଲି ମତ ପ୍ରକାଶ ହୋଇଥିଲା। କଲେଜ ପ୍ରତି ତାଙ୍କ ଅବଦାନକୁ ସ୍ମରଣ କରି ମହାବିଦ୍ୟାଳୟର ଦିଲ୍ଲୀପ ଯୋଷୀ, ମନୋରଞ୍ଜନ ପଟେଲ ପ୍ରମୁଖ ବକ୍ତବ୍ଯ ରଖିଥିଲେ। ଶେଷରେ ଅଧ୍ୟାପକ ଡକ୍ଟର ଲିଙ୍ଗରାଜ ମେହେର ଧନ୍ୟବାଦ ଅର୍ପଣ କରିଥିଲେ l