01-Apr-2025

ବଲାଙ୍ଗୀର(ପ୍ରେରଣା ଖବର): ରାଜ୍ୟ  ପୁରସ୍କାରପ୍ରାପ୍ତ ଶିକ୍ଷକ  ପାରେଶ୍ଵର ମହାଲିଙ୍ଗ ସ୍ମୃତି କମିଟି ତରଫରୁ  ଆଜି ସହଜ ମାନସାଙ୍କ  ନାମକ ଏକ ପୁସ୍ତକ  ଦେୟ ମୁକ୍ତ ବିତରଣ ନିମନ୍ତେ  ଲୋକାର୍ପିତ ହୋଇଯାଇଛି।  ବିଶିଷ୍ଟ ସାହିତ୍ୟିକ ସନ୍ଦୀପ କୁମାର କୁଅଁରଙ୍କ  ସଭାପତିତ୍ବରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ନାଟ୍ୟଭୂଷଣ ଜଗଦାନନ୍ଦ ଛୁରିଆ  ଅତିଥି ବକ୍ତା ଭାବରେ ଯୋଗ ଦେଇ ଥିବା ବେଳେ  ଟାଉନ ବାଳିକା ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷକ ନରେନ୍ଦ୍ରନାଥ ମିଶ୍ର, ପ୍ରେରଣା ସଂପାଦକ ରଘୁନନ୍ଦନ ସିଂହ ସମ୍ମାନିତ ଅତିଥି ଭାବରେ ଯୋଗ ଦେଇ ଥିଲେ।ପାରେଶ୍ବର ମହାଲିଙ୍ଗ ସ୍ମୃତି କମିଟିର  ମୁଖ୍ଯ  ଗୌରୀଶଙ୍କର ମହାଲିଙ୍ଗ,   ସଂପାଦକ  ଦ୍ୟୁତିରଂଜନ

ମହାଲିଙ୍ଗ ଓ ସଦସ୍ଯା ସୃଷ୍ଟି ସଂପ୍ରାସ ମହାଲିଙ୍ଗ ମଂଚାସୀନ ହୋଇଥିଲେ। ମଂଚାସୀନ ଅତିଥିବୃନ୍ଦ  ରାଜ୍ୟ  ପୁରସ୍କାରପ୍ରାପ୍ତ ଶିକ୍ଷକ  ପାରେଶ୍ଵର ମହାଲିଙ୍ଗ ଙ୍କ ପୂର୍ବରୁ ୧୯୬୪ ମସିହାରେ ପ୍ରକାଶିତ  ଚତୁର୍ଥ  ଓ ପଞ୍ଚମ ଶ୍ରେଣୀ  ଛାତ୍ର ଛାତ୍ରୀଙ୍କ ପାଇଁ ସହଜ ମାନସାଙ୍କ ପୁସ୍ତକର ନୂତନ ଦେୟମୁକ୍ତ ସଂସ୍କରଣକୁ ଲୋକାର୍ପିତ କରିଥିଲେ।   ଶେଷରେ ସ୍ମୃତିକମିଟିର ସଂପାଦକ ଦ୍ୟୁତିରଂଜନ ମହାଲିଙ୍ଗ ଧନ୍ୟବାଦ ଅର୍ପଣ କରିଥିଲେ। ସଭାକୁ  ଶିକ୍ଷକ କବି ସତ୍ଯାନନ୍ଦ ବିଶ୍ବାଳ ସଂଯୋଜନା କରିଥିବା ବେଳେ ଶିକ୍ଷକ ରଂଜିତ ମିଶ୍ର , ସ୍ମୃତି ମହାଲିଙ୍ଗ,,ସୌଭାଗ୍ଯ ନାଏକ ଓ ଅନ୍ଯମାନେ ସହଯୋଗ କରିଥିଲେ।