04-Mar-2025

ତରଭା- ସୁବର୍ଣ୍ଣପୁର ଜିଲ୍ଲାର ସର୍ବବୃହତ ଓ ସର୍ବପୁରାତନ ମେଣ୍ଡାଗାଁରେ ବ୍ଲକସ୍ଥାପନ କରିବା ଦାବି ନେଇ ଏକ ପ୍ରତିନିଧି ମଣ୍ଡଳି ସୋନପୁର ବିଧାୟକ ନିରଂଜନ ପୂଜାରୀଙ୍କୁ ତାଙ୍କ ରାମପୁରସ୍ଥିତ ବାସଭବନଠାରେ ଭେଟି ଏକ ଦାବିପତ୍ର ପ୍ରଦାନ କରିବା ସହ ଆଲୋଚନା କରିଛନ୍ତି । ଏହି ପ୍ରତିନିଧି ମଣ୍ଡଳି ଦାବି କରିଛି ଯେ, ନୂତନ ବ୍ଲକରେ ମେଣ୍ଡା, ରାଣିସର୍ଡା, ଦେଉଳପଦର, ପାଇକବାହାଲ, ପୁଆ, ଜରାଜାରିଂ, ନାରାୟଣପୁର, ବଲାଡି, ଛକୋରମାଲ ଓ ଶିବତଳା ପଞ୍ଚାୟତକୁ ନେଇ ଗଠନ କରାଯିବାକୁ ପ୍ରସ୍ତାବ କରାଯାଇଛି । ପ୍ରସ୍ତାବିତ ବ୍ଲକ ଅଞ୍ଚଳର ପଞ୍ଚାୟତ ପ୍ରତିନିଧି ଓ ଲୋକପ୍ରତିନିଧି ତଥା ବିଶିଷ୍ଟ ବ୍ୟକ୍ତି ବିଶେଷଙ୍କୁ ଏମାନେ ଭେଟି ଆଲୋଚନା କରି କରାଯାଇଛି । ତରଭା ବ୍ଲକରେ ୨୧ଟି ପଞ୍ଚାୟତ ଥିବା ବେଳେ ଏଥିରୁ ମେଣ୍ଡା ଅଞ୍ଚଳର ୬ଟି ପଞ୍ଚାୟତ ପଛୁଆ ରହିଛି । ସରକାର ଦ୍ୱାରମୁହଁରେ ସୁଶାସନ ପହଞ୍ଚାଇବାକୁ ଘୋଷଣା କରୁଥିବା ବେଳେ ବିକଶିତ ଓଡିଶା ଗଠନରେ ଏହି ଅଞ୍ଚଳ ସାମିଲ ହେବାକୁ ଦାବି କରାଯାଇଛି ।  ଦୀର୍ଘ ୧୫୦୦ବର୍ଷର ଇତିହାସକୁ ବହନ କରୁଥିବା ତଥା ଐତିହାସିକପୃଷ୍ଠଭୂମୀ ଓ ଭିତ୍ତିଭୂମୀ ଥିବା ତଥା ଏକ ପୁରାତନ ଗଡଭାବରେ ପରିଗଣିତ ମେଣ୍ଡାକୁ ବ୍ଲକ ଗଠନଦାବି ଯଥାର୍ଥ ବୋଲି ପ୍ରତିନିଧିମଣ୍ଡଳି ବିଧାୟକଙ୍କୁ ଅବଗତ କରିଛନ୍ତି । ଯେତେବେଳେ ବ୍ଲକ ପୁନର୍ଗଠନ ପ୍ରସ୍ତାବ ସରକାର ଆହ୍ୱାନ କରିବେ ସେତେବେଳେ ବିଧାୟକ ତାହାପଠାଇବେ ବୋଲି ବିଧାୟକ ପ୍ରତିଶୃତି ଦେଇଛନ୍ତି ବୋଲି ଏହି ପ୍ରତିନିଧିଗଣ କହିଛନ୍ତି । ଏହି ପ୍ରତିନିଧିଦଳରେ ବାଳଗୋପାଳ ପଣ୍ଡା,ରାଣିସର୍ଡା ସରପଞ୍ଚ ବାଳଗୋପାଳ କର୍ମି, ପୂର୍ବତନ ମେଣ୍ଡା ସରପଞ୍ଚ ହୃଷିକେଶ ପାତ୍ର,ପ୍ରମୋଦ ପର୍ଡିଆ, ପୂର୍ବତନ ସମିତିସଭ୍ୟ ହାଡୁ ଜେନା, ପୂର୍ବତନ ଜିଲ୍ଲାପରିଷଦ ସଭ୍ୟ ବିପିନ ନାଗ,ସନାତନ କର୍ମି, ଭିକାରୀ ମେହେର, ସବ୍ୟସାଚୀ ଦଣ୍ଡସେନା, ଲୋକନାଥ ବାଦୀ,ଅଶୋକ ବିଶି, ପଦ୍ମନାଭ ମଲ୍ଲିକ,ନକୁଳ କର୍ଣ୍ଣ, ବିଭୁତି ଭୂଷଣ ଝାଙ୍କର, ନରୋତ୍ତମ ମଲ୍ଲିକ,ସୁରୁବାବୁ ମେହେର, ପୁରନ୍ଦର ମେହେର ଓ ଶିବା ନାଏକ ସାମିଲ ଥିଲେ ।