23-Feb-2025

ବଲାଙ୍ଗୀର(ପ୍ରେରଣା ଖବର):  ଫେବୃଆରୀ ୨୪ ରୁ ମାର୍ଚ୍ଚ ୫ ତାରିଖ ପର୍ଯ୍ୟନ୍ତ ଜିଲ୍ଲା ଲେଖକ ପରିଷଦ ତରଫରୁ ୧୦ ଦିନ ଧରି ସ୍ଥାନୀୟ କୋଶଳ କଳା ମଣ୍ଡଳ ପଡିଆରେ '୧୭ ତମ ବଲାଙ୍ଗୀର ବହିହାଟ- ୨୦୨୫ ଅନୁଷ୍ଠିତ ହେବ ବୋଲି ଆଜି ପରିଷଦ ପକ୍ଷରୁ ପ୍ରକାଶ କରାଯାଇଛି ।  
ସ୍ଥାନୀୟ ସରକାରୀ ବାଳିକା ଉଚ୍ଚ ବିଦ୍ୟାଳୟର ସମ୍ମିଳନୀ କକ୍ଷରେ ପରିଷଦର ସଭାପତି ମଳୟମିଶ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ସମ୍ମିଳନୀରେ ସମ୍ପାଦକ କପିଳେଶ୍ବର ଖମାରୀ, ଉପ- ସଭାପତି ମୁରଲୀଧାରୀ ପତି, ଯୁଗ୍ମ -ସମ୍ପାଦକ ମହେନ୍ଦ୍ର କୁମାର ଦର୍ଜୀ, ସହ-ସମ୍ପାଦକ ରଘୁନନ୍ଦନ ସିଂହ, କୋଷାଧ୍ୟକ୍ଷ ତଥା ସଂଯୋଜକ ଅଜିତ କୁମାର ମହାନ୍ତି ଏବଂ ଚଳିତ ବହିହାଟର ମୁଖ୍ୟସଂଯୋଜକ ଡ. ଶ୍ରୀକର ମିଶ୍ର ପ୍ରମୁଖ ଯୋଗ ଦେଇ ବହିହାଟର କାର୍ଯ୍ୟକ୍ରମ ସମ୍ପର୍କରେ ଗଣମାଧ୍ୟମକୁ ସୂଚନା ଦେଇଥିଲେ । 

ଏହି ଅନୁଯାୟୀ, ଏଥିରେ ଗଳ୍ପ ଆଲୋଚନା, କବିତା ଆଲୋଚନା, କୋଶଳୀ ସାହିତ୍ୟ ଆଲୋଚନା, ହାସ୍ୟବ୍ୟଙ୍ଗ, ସାହିତ୍ୟ ଆଲୋଚନା, ଲେଖିକା ଆସର , ବଲାଙ୍ଗୀରର ସମସ୍ୟା, କୁଇଜ୍, ସମ୍ବର୍ଦ୍ଧନା, ପୁସ୍ତକ ଉନ୍ମୋଚନ, ସ୍ମରଣିକା 'କୋଶଳାୟନ' ଉନ୍ମୋଚନ, ବହିହାଟ ସମ୍ମାନ ପ୍ରଦାନ ଓ ଅନ୍ୟାନ୍ୟ କାର୍ଯ୍ୟକ୍ରମଗୁଡ଼ିକ ସମ୍ପର୍କରେ ସୂଚନା ଦିଆଯାଇଥିଲା ।ଶେଷରେ ଉପସଭାପତି ମୁରଲୀଧାରୀ ପତି ଧନ୍ୟବାଦ ଦେଇଥିଲେ ।