05-Feb-2025

ରାଉରଙ୍ଗପୁର(ମୟୂରଭଞ୍ଜ): ଚଳିତ ବର୍ଷ ସଡ଼କ ସୁରକ୍ଷା ମାସ ଯାହାକି ସାରା ଓଡିଶାରେ ଜାନୁଆରୀ ୧ ରୁ ୩୧ ତାରିଖ ପର୍ଯ୍ୟନ୍ତ ସଡ଼କ ସୁରକ୍ଷା ପାଳନ ଅବସରରେ ବିଭିନ୍ନ ସଚେତନତା ଧର୍ମୀ କାର୍ଯ୍ୟକ୍ରମ ଜରିଆରେ ସମାଜର ବିଭିନ୍ନ କ୍ଷେତ୍ରରେ କାର୍ଯ୍ୟ କରୁଥିବା ବ୍ୟକ୍ତି ବିଶେଷ,ଅନୁଷ୍ଠାନ ଓ ଛାତ୍ରଛାତ୍ରୀ ମାନଙ୍କୁ ସାମିଲ କରି ଲୋକମାନଙ୍କୁ ବିଶେଷକରି ଗାଡ଼ି ଚାଳନା କରିବା ସମୟରେ ଟ୍ରାଫିକ ନିୟମ ମାନିବା ସହିତ ସତର୍କତା ମୂଳକ ପଦକ୍ଷେପ ନେବା ସମ୍ଭନ୍ଧରେ ସଚେତନ କରାଯାଇଥିଲା।ଏହି ଅବସରରେ ମଙ୍ଗଳବାର

ମୟୁରଭଞ୍ଜ ଜିଲ୍ଲାର ଜିଲ୍ଲାପାଳଙ୍କ କାର୍ଯ୍ୟାଳୟ ଠାରେ ଏକ ପୁରସ୍କାର ବିତରଣ କାର୍ଯ୍ୟକ୍ରମ କରାଯାଇଥିଲା। ଏହି କାର୍ଯ୍ୟକ୍ରମରେ ସଡ଼କ ସୁରକ୍ଷା ଜୀବନ ରକ୍ଷା ଅଭିଯାନ ରେ ସାମିଲ ହୋଇଥିବା କୃତି ଛାତ୍ରଛାତ୍ରୀ, ସାମ୍ବାଦିକ,ଡ୍ରାଇଭର ସଂଘ, ସମାଜ ସେବୀ ବ୍ୟକ୍ତିବିଶେଷ ଙ୍କୁ ଜିଲ୍ଲାପାଳ ଶ୍ରୀଯୁକ୍ତ ହେମାକାନ୍ତ ସାଏ, ଜିଲ୍ଲା ଆରକ୍ଷୀ ଅଧିକ୍ଷକ ଶ୍ରୀ ବରୁଣ ଗୁଣ୍ଟୁପଲ୍ଲୀ ଏବଂ ବାରିପଦା ଆଞ୍ଚଳିକ ପରିବହନ ଅଧିକାରୀ ଶ୍ରୀ ବିଶ୍ଵରାଜ ବେହେରାଙ୍କ ଦ୍ୱାରା ପୁରସ୍କୃତ କରାଯାଇଥିଲା । ଏହି ଅବସରରେ ବିଶୋଇ ଥାନା ଅଞ୍ଚଳରେ ବିଭିନ୍ନ ସଡ଼କ ଦୁର୍ଘଟଣା ରେ ଦେବଦୂତ ସାଜିଥିବା ୧୦ ଜଣ ସମାଜସେବୀ ତଥା ଜୀବନ ରକ୍ଷା କାରୀ ବ୍ୟକ୍ତିବିଶେଷ ଙ୍କୁ ଜିଲ୍ଲା ପ୍ରଶାସନ ତରଫରୁ ଜିଲ୍ଲାପାଳ, ଆରକ୍ଷୀ ଅଧିକ୍ଷକ ଓ ଜିଲା ପରିବହନ ଅଧିକାରୀ ମାନପତ୍ର ଓ ପ୍ରୋତ୍ସାହନ ସ୍ଵରୂପ ପ୍ରତ୍ୟେକଙ୍କୁ ଟ.୨୦୦୦/-ଙ୍କା ଲେଖାଏଁ ପୁରସ୍କାର ପ୍ରଦାନ କରିବା ସହ ଏହି

ମହତ କାର୍ଯ୍ୟ ପାଇଁ ସାଧୁବାଦ୍ ଜଣାଇଥିଲେ। ବିଶୋଇ ବ୍ଲକ ରୁ ସମ୍ମାନିତ ହୋଇଥିବା ୧୦ ଜଣଙ୍କ ମଧ୍ୟରେ ସାମ୍ବାଦିକ ଆନୁୱାର ହୁସେନ,ଅମିତ୍ ଦାସ,ଶ୍ଵାଶତ ଶର୍ମା,ସମାଜସେବୀ ସୁଶାନ୍ତ ମହାନ୍ତି,ରାମେଶ୍ୱର ସୋରେନ,ଦୟାନିଧି ଗିରି, ଗିରିଶ ପାଣିଗ୍ରାହୀ, ବିଶୋଇ ବ୍ଲକ ଡ୍ରାଇଭର ମହାସଂଘର ସଦସ୍ୟ ଦୁର୍ଗେଶ ପାତ୍ର,ଆଦିତ୍ୟ ବେହେରା ଓ ଜଗେନ୍ଦ୍ର ନାଏକ ରହିଥିଲେ।         

(ମୟୂରଭଞ୍ଜ ରାଇରଙ୍ଗପୁରରୁ ଶ୍ଯାମଳେନ୍ଦୁ ପରିଡାଙ୍କ ରିପୋର୍ଟ)