01-Feb-2025

ଯାଜପୁର/ବରୀ(ରଞ୍ଜିତ ମହାନ୍ତି): କେନ୍ଦ୍ର ଓ ରାଜ୍ୟ ସରକାର ଜୈବିକ ପ୍ରଣାଳୀରେ କୃଷି ଭିତ୍ତିକ ଫସଲ ଅମଳ କରିବାକୁ କୃଷକ ମାନଙ୍କୁ ବିଭିନ୍ନ ଗଣ ମାଧ୍ୟମରେ ପ୍ରଚାର ପ୍ରସାର କରୁ ଥିବାବେଳେ ବାସ୍ତବ ପକ୍ଷେ ଏହା ଦିଗହରା ହେଉଛି ବୋଲି ଜୈବିକ ଖତ ପ୍ରସ୍ତୁତ କରୁଥିବା ଯୁବ ଚାଷୀ ଜ୍ୟୋତିକାନ୍ତ ମହାପାତ୍ର ମତ ରଖିଛନ୍ତି। ସୂଚନା ମୁତାବକ ବରୀ ବ୍ଲକ ଅଟିରା ପଂଚାୟତ ଅରୁଆଳ ନିକଟରେ ଯୁବ ଚାଷୀ ଜୈବିକ ସାର ପ୍ରସ୍ତୁତ କରିବା ଓ ଏହାର ଅଭାବୀ ବିକ୍ରି ଯୋଗୁଁ କ୍ଷତି ସହିବା ପରେ ଓଡ଼ିଶାର ମୁଖ୍ୟ ମନ୍ତ୍ରୀ,କୃଷି ମନ୍ତ୍ରୀ ଓ ବରୀ ବ୍ଲକ ର କୃଷି ବିଭାଗର ଅଧିକାରୀକୁ ସଚେତନତା ପାଇଁ ପତ୍ର ଲେଖି ଥିଲେ ମଧ୍ୟ ସରକାରଙ୍କ ତରଫରୁ ଏ କ୍ଷେତ୍ରରେ କୌଣସି ପଦକ୍ଷେପ ନିଆଯାଇନଥିବା ଘଟଣାକୁ ଅତ୍ୟନ୍ତ କ୍ଷୋଭର ସହିତ ପ୍ରକାଶ କରିଛନ୍ତି। ବିଶେଷ କରି ଯୁବ ଚାଷୀ ମାନଙ୍କୁ ଜୈବିକ ପ୍ରଣାଳୀ ରେ କୃଷି କାର୍ଯ୍ୟ କରି ଆତ୍ମ ନିର୍ଭରଶୀଳ ହେବାକୁ କେନ୍ଦ୍ର ଓ ରାଜ୍ୟ ସରକାର ଡିଣ୍ଡିମ ପିଟୁ ଥିବା ବେଳେ ଦୀପ ତଳ ଅନ୍ଧାର ଭଲି ବ୍ଲକର କୃଷି କାର୍ଯ୍ୟାଳୟ ରୁ ମାତ୍ର ୩କିମି ଦୂରରେ ଅବସ୍ଥିତ ଏହି ଜୈବିକ ସାର ପ୍ରସ୍ତୁତି କରୁଥିବା ସେହି ଯୁବଚାଷୀ ମହାପାତ୍ରଙ୍କ ଉପରେ ନଜର ନପଡିବା ଅତ୍ୟନ୍ତ ଦୁଃଖ ଓ ପରୀତାପର ବିଷୟ ବୋଲି ସାଧାରଣରେ ଆଲୋଚିତ ହେଉଛି। ଯୁବ ଚାଷୀ ଜଣଙ୍କ  ଲଙ୍କା, ବରକୋଳି, ଟମାଟୋ, ବାଇଗଣ, କଲରା, ଭେଣ୍ଡି, ଜହ୍ନି, କାକୁଡି, ବିମ୍ସ, ଝୁଡ଼ଙ୍ଗ, ଆଳୁ, କଖାରୁ ଠାରୁ ଆରମ୍ଭ କରି ଫୁଲ ଚାଷ ପାଇଁ,କାମିନୀ, ଗେଣ୍ଡୁ, ଗୋଲାପ ପ୍ରଭୁତି ଚାଷ କରି ଜୈବିକ ସାର ର ବିକ୍ରି କ୍ଷେତ୍ରରେ ବ୍ଲକ ର କୃଷି ବିଭାଗ ତରଫରୁ ସଚେତନତା କାର୍ଯ୍ୟକ୍ରମ କରା ଯାଇ କୃଷକ ମାନଙ୍କୁ ଏକ୍ଷେତ୍ର ରେ ସାମିଲ କରାଗଲେ ଆଗାମୀ ଦିନରେ ଜୈବିକ ପ୍ରଣାଳୀରେ କୃଷି କାର୍ଯ୍ୟ ହେବା ସହିତ କୃଷକ ମାନେ ଉପକୃତ ହୋଇ ପାରିବେ ବୋଲି ସାଧାରଣରେ ମତ ପ୍ରକାଶ ପାଉଛି। ଏ ବିଷୟ ରେ ବରୀ କୃଷି ବିଭାଗର ଅଧିକାରୀଣୀ ଜ୍ୟୋତିର୍ମୟୀ ବେହେରାଙ୍କୁ ପଚାରିବା ରେ ସେ କୁହନ୍ତି  ମୁଁ ନୂତନ ଭାବେ ଏହି ବିଭାଗରେ ଯୋଗ ଦେଇଛି ଜୈବିକ ଖତ ଉତ୍ପାଦନ କରୁଥିବା ଯୁବ ଚାଷୀଙ୍କ ନିକଟରେ ପହଂଚି କିଭଳି ଭାବେ ଏହି ଜୈବିକ ସାରକୁ କୃଷକ ମାନେ ବ୍ୟବହାର କରିବେ ସେ କ୍ଷେତ୍ରରେ ଗୁରୁତ୍ୱ ଦିଆଯିବ।