27-Jan-2025

ବଲାଙ୍ଗିର: ବଲାଙ୍ଗୀର ଜିଲ୍ଲା ସଦରବ୍ଲକ ଚନ୍ଦନଭାଟି ଗ୍ରାମର ବିଶିଷ୍ଟ ଭେଟେରାନ କ୍ରୀଡାବିଦ ସୁକାନ୍ତ ପାଣିଗ୍ରାହୀଙ୍କ ୫୯ବର୍ଷ ବୟସରେ ପରଲୋକ ହୋଇଯାଇଛି । ସେ ଗତ କିଛିଦିନ ହେଲା ସ୍ୱାସ୍ଥ୍ୟସମସ୍ୟା ଜନିତ ଚିକିତ୍ସା ହେଉଥିଲେ । ମୁମ୍ବଇରେ ଏକ ଅସ୍ତୋପଚାର ହୋଇଥିଲେ । ସେହିକାରଣରୁ ତାଙ୍କର ଶରୀର ଆହୁରି ଅସୁସ୍ଥ ହୋଇପଡିଥିଲା ଓ ସୋମବାର ଭୋରରେ ତାଙ୍କର ଦେହାନ୍ତ ହୋଇଥିବା ଜଣାଯାଇଛି । ସୁକାନ୍ତ ଛାତ୍ରଜୀବନରୁ ଜଣେ ଦକ୍ଷ ଫୁଟବଲ ଓ ଭଲିବଲ ଖେଳାଳୀ ଥିଲେ । ସେ ସମ୍ବଲପୁର ବିଶ୍ୱବିଦ୍ୟାଳୟ ପକ୍ଷରୁ ଜାତୀୟ ତଥା ଆନ୍ତ୍‌ର୍ଯ୍ୟାତୀୟ ସ୍ତରରେ ମ୍ୟାଚରେ ଖେଳି ସୁନାମ ଅର୍ଜନ କରିଥିଲେ । ସେ ୧୯୮୪ ମସିହାରେ ଓଡିଶା ଟିମର ଗୋଲକିପର ଭାବରେ ମାଡ୍ରାସରେ ଆନ୍ତର୍ଯ୍ୟାତିକ ସନ୍ତୋଷଟ୍ରଫି ଫୁଟବଲ ଖେଳିଥିଲେ । ସେ ଜଣେ ଦକ୍ଷ ଫୁଟବଲ ଖେଳାଳୀ ହୋଇଥିଲେ ହେଁ ଭଲିବଲ ପ୍ରତି ତାଙ୍କର ଆଗ୍ରହ ବଢିଥିଲା । ସେଥିପାଇଁ ୧୯୮୬ ମସିହାରେ ସମ୍ବଲପୁର ବିଶ୍ୱବିଦ୍ୟାଳୟ ଟିମର ଅଧିନାୟକ ରହି ଜାପାନର ଟୋକିଓ ରେ ହୋଇଥିବା ଆନ୍ତଃରାଷ୍ଟ୍ରୀୟ ବିଶ୍ୱବିଦ୍ୟାଳୟସ୍ତରୀୟ ଭଲିବଲ ଟୁର୍ଣ୍ଣାମେଣ୍ଟରେ ଖେଳି କୃତୀତ୍ୱ ହାସଲ କରିଥିଲେ । ୧୯୮୭ ମସିହାରେ ମଧ୍ୟ ଓଡିଶାଟିମକୁ ନେଇ ଭିଲାଇରେ ଖେଳିଥିଲେ । ୧୯୮୮ ମସିହାରେ ସେ ସ୍ପୋର୍ଟସ କୋଟାରେ ପୋଲିସ ସବଇନ୍ସପେକ୍ଟର ଚାକିରି ପାଇ ଦୁଇବର୍ଷ ପରେ ପୋଲିସ ଚାକିରିଛାଡି ଏଜି ଅଫିସରେ ଚାକିରି ଆରମ୍ଭ କରିଥିଲେ । ଏହି ସମୟରେ ମଧ୍ୟ ସେ ତାଙ୍କର ସାଂଗଠାନିକ ଦକ୍ଷତା ପ୍ରଦର୍ଶନ କରିଥିଲେ । ସେହି ସମୟରେ ମଧ୍ୟ ସେ ଓଡିଶାଦଳରେ ଚୟନ ହୋଇ ଜାତୀୟ ଏଥେଲେଟିକ ପ୍ରତିଯୋଗିତାରେ ଭାଗ ନେଇଥିଲେ । ପରେ

ସେ ଭଲିବଲରେ ଇରାନ ଓ ଦୁବାଇ ମଧ୍ୟ ଖେଳିବାକୁ ଯାଇ ଥିଲେ । ୨୦୧୬ ମସିହାରେ ସେ ମହିଳା ଭଲିବଲ ଦଳର ମ୍ୟାନେଜର ଭାବରେ ଥାଇଲାଣ୍ଡ ଯାଇଥିଲେ । ୨୦୦୧ରେ ଏଜି ଅଫିସର ଅଡିଟ ଏଣ୍ଡ ଆକାଉଣ୍ଟ ସଂଘର ସାଧାରଣ ସଂପାଦକ ଓ ୨୦୧୭ ମସିହାରୁ ୨୦୧୯ ମସହା ପର୍ଯ୍ୟନ୍ତ ସର୍ବଭାରତୀୟ ସଂଘର ଉପସଭାପତି ରହିଥିଲେ । ସୁକାନ୍ତଙ୍କ ବାପା ବେଣୁଧର ପାଣିଗ୍ରାହୀ ମଧ୍ୟ ଜଣେ ଜଣାଶୁଣା ବ୍ୟକ୍ତି ଥିଲେ । ସେ ଚନ୍ଦନଭାଟି ଗ୍ରାମପଞ୍ଚାୟତରେ ୩ଥର ସରପଞ୍ଚ ରହିଥିଲେ । ଆଜି ତାଙ୍କର ଦେହାନ୍ତରେ ବଲାଙ୍ଗୀର ତଥା ଓଡିଶାର ବିଭିନ୍ନ ମହଲରେ ଶୋକପ୍ରକାଶ ପାଇଛି ।