06-Jan-2025

ତରଭା(କପିଳାସ ସେଠ)-ସୋନପୁର ଜିଲ୍ଲା ତରଭା ବ୍ଲକଅନ୍ତର୍ଗତ ଐତିହାସିକ ମେଣ୍ଡାଗାଁର ସାଗରତଳଛକଠାରେ ୩ୟ ବାରପାହାଡ ମହୋତ୍ସବ ଅନୁଷ୍ଠିତ ହୋଇଯାଇଛି । ଗତ ୩ତାରିଖଠାରୁ ଏହା ଆରମ୍ଭ ହୋଇ ଆସନ୍ତା ୯ତାରିଖ ପର୍ଯ୍ୟନ୍ତ ଏହା ଚାଲିବ । ଏଠାରେ ପ୍ରତ୍ୟହ କଂସଦରବାର ଚାଲିଥିବା ବେଳେ ବିଭିନ୍ନ ଅତିଥିବର୍ଗ ଯୋଗଦେଉଛନ୍ତି । ଆଜି ୪ର୍ଥ ସଂଧ୍ୟାରେ ଆୟୋଜିତ କଂସଦରବାରରେ ବଲାଙ୍ଗୀର କେନ୍ଦ୍ରସମବାୟ ବ୍ୟାଙ୍କର ପୂର୍ବତନ ସଭାପତି ତଥା ବର୍ତ୍ତମାନର ନିର୍ଦ୍ଦେଶକ ଲକ୍ଷ୍ମଣକୁମାର ମେହେର ମୁଖ୍ୟଅତିଥି,ସମ୍ମାନୀତ ଅତିଥି ଭାବରେ ମେଣ୍ଡା ଗ୍ରାମପଞ୍ଚାୟତର ସରପଞ୍ଚ ଲିଜାରାଣୀ ଦଣ୍ଡସେନା,ପାଇକବାହାଲ ସରପଞ୍ଚଦାୟୀତ୍ୱରେ ଥିବା ପିଙ୍କି

ଶିକା ,ପାଇକବାହାଲ ସମିତିସଭ୍ୟ ରାଜକିଶୋର ଭୁଏ ଓ ମୁଖ୍ୟବକ୍ତା ଭାବରେ ବରିଷ୍ଠ ସାମ୍ବାଦିକ ପୂର୍ଣ୍ଣଚନ୍ଦ୍ର ପଣ୍ଡା ଯୋଗଦେଇଥିଲେ । ସାମ୍ବାଦିକ ରାମଚନ୍ଦ୍ର ପୂଜାହାରୀଙ୍କ ସଂଯୋଜନାରେ ଅନୁଷ୍ଠିତ ସଭାରେ ମୁଖ୍ୟଅତିଥି ଲକ୍ଷ୍ମଣ ମେହେର ସୋନପୁର ମାଟିକୁ ଏକ ତ୍ୟାଗ ଓ ବଳିଦାନର ମାଟି ବୋଲି କହିବା ସହିତ ଏହି ମାଟିରୁ ସନ୍ଥକବି ଭୀମଭୋଇ ସମଗ୍ର ବିଶ୍ୱକୁ ଏକ ଯୁଗାନ୍ତକାରୀ ବାର୍ତ୍ତା ଦେଇଥିଲେ ବୋଲି କହିଥିଲେ । ଏହା ସହିତ ସ୍ୱାଧିନତା ସଂଗ୍ରାମୀ ରାମ ଶତପଥି,ଲକ୍ଷ୍ମଣ ଶତପଥି,ବିନିକାର ସହିଦ ଗୁରୁବାରୀ ମେହେରଙ୍କ ସହ ମେଣ୍ଡା ଅଞ୍ଚଳର ବିକାଶର ଅଗ୍ରଦୂତ ସ୍ୱର୍ଗତ ଡ.ଭୈରବଚରଣ ଦାସ ଓ ଡ.ସଦାନନ୍ଦ ଅଗ୍ରୱାଲଙ୍କୁ ସ୍ୱରଣ କରିଥିଲେ । ମୁଖ୍ୟବକ୍ତା ତାଙ୍କ ବକ୍ତବ୍ୟରେ କହିଲେ ଯେ,ଗୋଟିଏ ସମୟରେ ସୋନପୁର ଗଡଜାତରେ ମେରଣ୍ଡାଗଡ ଏକ ଗୁରୁତ୍ୱପୂର୍ଣ୍ଣ କେନ୍ଦ୍ରଥିଲା । ମେଣ୍ଡା ଗଡଜାତ ଅଞ୍ଚଳର ସ୍ୱାତନ୍ର୍ତ୍ରତା ଆଜି ମଧ୍ୟ ରହିଛି । ଏବେ ରାଜ୍ୟସରକାର ବ୍ଲକପୁନର୍ଗଠନ ପାଇଁ ଘୋଷଣା କରିଛନ୍ତି । ସେହିକ୍ରମରେ ପୁରାତନ ମେଣ୍ଡା ଗଡତି ଅଞ୍ଚଳକୁ ନେଇ ଏକ ନୂତନ ବ୍ଲକ ଗଠନ କରାଯାଉ ବୋଲି ସାମ୍ବାଦିକ ପୂର୍ଣ୍ଣଚନ୍ଦ୍ର ପଣ୍ଡା ଆହ୍ୱାନ ଜଣାଇଥିଲେ । ଏଥିପାଇଁ ଏହି ଅଞ୍ଚଳର ଜନସାଧାରଣ ସ୍ଥାନୀୟ ବିଧାୟକ,ଅନ୍ୟାନ୍ୟ ଲୋକପ୍ରତିନିଧିମାନଙ୍କ ଜରିଆରେ ଦୃଢଦାବି ରଖିବାକୁ କହିଥିଲେ । ମହୋତ୍ସବ ଅଞ୍ଚଳର ବିକାଶର

ମାଧ୍ୟମ ହେଉ ବୋଲି ଅତିଥିଗଣ ମତବ୍ୟକ୍ତ କରିଥିଲେ । ଫଟକରାର କଳାକାର ଅନୀଳ ନାଏକ ଓ ସାଥିଙ୍କ ଦ୍ୱାରା ପ୍ରତ୍ୟହ କଂସଦରବାର ଆୟୋଜିତ ହେଉଛି । ଛୋଟ ଛୋଟ ଶିଶୁ କଳାକାରମାନେ ତାଙ୍କର କଳାପ୍ରଦର୍ଶନ କରୁଛନ୍ତି । ମହୋତ୍ସବ ଆୟୋଜନରେ ରାଜେନ୍ଦ୍ର ପଣ୍ଡା,ଭାଗିରଥି ସାହୁ,ରାମଶଙ୍କର ମହାପାତ୍ର,ହୃଷିକେଶ ପଣ୍ଡା,ହୃଷିକେଶ ପାତ୍ର,ଡୁବୁଲ ଦଣ୍ଡସେନା,ତରଭା ବ୍ଲକଅଧ୍ୟକ୍ଷ ସରୋଜ କମ୍ପ,ଗଣନାଥ ସାହୁ,ମଦନମୋହନ ପଣ୍ଡା,ଚକ୍ରଧର ସା ପ୍ରମୁଖଙ୍କ ସହ ଶତାଧିକ ଯୁବକ ସହଯୋଗ କରୁଛନ୍ତି । ମୁଖ୍ୟତଃମେଣ୍ଡା,ଦେଉଳପଦର,ପାଇକବାହାଲ,ରାଣୀସର୍ଡା,ପୁଆ ଗ୍ରାମପଞ୍ଚାୟତର ଅଧିବାସୀ ମିଳିତ ଭାବରେ ଏହି ମହୋତ୍ସବକୁ ଆୟୋଜନ କରୁଛନ୍ତି ।