06-Jan-2025

ବଲାଙ୍ଗୀର (ପ୍ରେରଣା ଖବର): ରାଜନୀତି ଶିଖିବାକୁ ହେଲେ ନରସିଂହ ମିଶ୍ର ଏକ ବଡ ମାର୍ଗ | ଆୟୋଜକଙ୍କୁ ବହୁତ ଧନ୍ୟବାଦ ଏହିଭଳି ଏକ ଭବ୍ୟ ଆୟୋଜନ କରୁଥିବାରୁ | ଏହି ଆୟୋଜନ ନିଶ୍ଚୟ ଭାବେ ନାଟକକୁ ଏକ ଭିନ୍ନ ରୂପରେଖ ପ୍ରଦାନ କରୁଛି | ଡିଜିଟାଲ ଦୁନିଆରୁ ବାହାରି ପ୍ରତ୍ୟକ୍ଷ ଭାବେ ନାଟକ ଦେଖିବାର ରୁଚି ଦେଖି ମୋତେ ବହୁତ ଖୁସି ଲାଗୁଛି | ମଠଖାଇ ପାହାଡ ଭଳି ଏହି ମହୋତ୍ସବ ମଧ୍ୟ ଦୀର୍ଘାୟୁ ହେଉ ବୋଲି ମୋର କାମନା |

  ଅଗ୍ରଣୀ ସମାଜିକ ଓ ନାଟ୍ଯ ଅନୁଷ୍ଠାନ ଭୂମିକା  ତରଫରୁ ଆଜି ସନ୍ଧ୍ୟାରେ ସ୍ଥାନୀୟ କୋଶଳ କଳା ମଣ୍ଡଳ ପଡିଆ ଠାରେ ଆୟୋଜିତ ସର୍ବଭାରତୀୟ ବହୁଭାଷୀ ନାଟ୍ୟ ସମାରୋହ ମଠଖାଇ ମହୋତ୍ସବର ଦ୍ଵିତୀୟ ସନ୍ଧ୍ୟାର ଉତ୍ସବରେ  ମୁଖ୍ୟ ଅତିଥି ଭାବେ ଯୋଗ ଦେଇ ଏହା କହିଛନ୍ତି କଟକ ବାରବାଟୀ ବିଧାୟିକା ସୋଫିଆ ଫିରଦୋସ l ସମ୍ମାନିତ ଅତିଥି ଭାବେ ଶିକ୍ଷାବିତ୍ ତଥା ନାଟ୍ୟକାର ସନାତନ ଠାକୁର ଯୋଗଦେଇ ନିଜ ଅଭିଭାଷଣରେ ନାଟକ  ବୌଦ୍ଧିକଯୁକ୍ତ ମନୋରଞ୍ଜନ ଧର୍ମୀ ହେବା ଉଚିତ ଆଉ ଏହି ପରିପ୍ରେକ୍ଷୀରେ ମଠଖାଇ ମହୋତ୍ସବ ଏକ ଆନ୍ଦୋଳନ କହିଲେ ଭୁଲ ହେବ ନାହିଁ  ବୋଲି କହିଥିଲେ | ମଠଖାଇ ମହୋତ୍ସବର ଅଧ୍ୟକ୍ଷ ତଥା ବଲାଙ୍ଗୀରର ପୂର୍ବତନ ବିଧାୟକ ନରସିଂହ ମିଶ୍ର ମଞ୍ଚାସୀନ ରହି  ସମାଜକୁ ଏକ କରିବାକୁ ହେଲେ ନାଟ୍ୟ ଆନ୍ଦୋଳନକୁ ଆଗକୁ ନେବାକୁ ହେବ ବୋଲି ଦୃଢୋକ୍ତି ପ୍ରକାଶ କରିଥିଲେ  l  ସମାଜିକ ଆନ୍ଦୋଳନର ନାଟକ ଏକ ମାଧ୍ୟମ ବୋଲି ଶ୍ରୀ ମିଶ୍ର କହିଥିଲେ l ଭୂମିକାର ସଭ୍ୟ ତଥା ଅଶୋକ ଦାସ ଙ୍କ ସଭାପତିତ୍ବରେ ଅନୁଷ୍ଠିତ ଉଦଘାଟନୀ ଦିବସରେ ଭୂମିକାର ସମ୍ପାଦକ ବ୍ୟାସଦେବ ନନ୍ଦ ପ୍ରାରମ୍ଭିକ ଭାଷଣ ଦେଇଥିଲେ  l ଦ୍ଵିତୀୟ ଦିନରେ ମଞ୍ଚକୁ ମନୋଜ ମିତ୍ର ଙ୍କ ନାମରେ ସମର୍ପିତ କରାଯାଇଥିଲା l ଏହି ଅବସରରେ ପ୍ରଫେସର ଦତ୍ତେଶ୍ୱର ହୋତାଙ୍କୁ ମାନପାତ୍ର  ଓ

ଉପଢୌକନ ପ୍ରଦାନ ପୂର୍ବକ ମଠଖାଇ ସମ୍ମାନ ପ୍ରଦାନ କରାଯାଇଥିଲା l ମାନପତ୍ର ପଠନ କରିଥିଲେ ସାମ୍ବାଦିକ ମୁକେଶ ବହିଦାର l 
 ନାଟ୍ୟକଳାକାର ବିଜୟ କୁମାର ତ୍ରିପାଠୀ ସଭା ଶେଷରେ ଧନ୍ୟବାଦ ଅର୍ପଣ କରିଥିଲେ| l ନଟରାଜ କଳା ପରିଷଦ ତରଫରୁ 'ଚୁରା ଫଗୁନ' ପରିବେଷିତ ହୋଇ ଦର୍ଶକଙ୍କର କରତାଳି ସାଉଁଟି ଥିଲା  l ପରେ  ରାୟପୁର ର ରଙ୍ଗ ଶୃଙ୍ଖଳା ନାଟ୍ୟ ମଂଚ ପକ୍ଷରୁ ହିନ୍ଦୀ ନାଟକ 'ଚାନ୍ଦ ଔର  ଚକୋର'  ପରିବେଷିତ ହୋଇଥିଲା l ପୂର୍ବାହ୍ନରେ 'ନାଟକ ଯୋଗାଯୋଗର ସଶକ୍ତ ମାଧ୍ୟମ' ଶୀର୍ଷକ ଆଲୋଚନାଚକ୍ର ଅନୁଷ୍ଠିତ ହୋଇଥିଲା l