18-Dec-2024

ବଲାଙ୍ଗୀର(ପ୍ରେରଣା ଖବର): ଆସନ୍ତା ୨୦୨୫ ମସିହା ଜାନୁୟାରୀ ୫ ତାରିଖଠାରୁ ୯ତାରିଖ ପର୍ଯ୍ୟନ୍ତ ବଲାଙ୍ଗୀର କୋସଲକଳାମଣ୍ଡଳ ପଡିଆଠାରେ ୧୬ତମ ସର୍ବଭାରତୀୟ ମଠଖାଈ ନାଟ୍ୟମହୋତ୍ସବ ଅନୁଷ୍ଠିତ ହେବାକୁ ଯାଉଛି। ଆଜି ମହୋତ୍ସବର ପ୍ରଚାରପ୍ରସାର କମିଟିର ଏକ ବୈଠକ ବସି ଗଣମାଧ୍ୟମକୁ ଏହି ସୂଚନା ଦିଆଯାଇଛି। ପ୍ରଚାରପ୍ରସାର କମିଟିର ମୁଖ୍ୟ ଧର୍ମେନ୍ଦ୍ର ପ୍ରସାଦ ନନ୍ଦଙ୍କ ସଭାପତିତ୍ୱରେ ଅନୁଷ୍ଠିତ ଆଜିର ଏହି ବୈଠକରେ ମହୋତ୍ସବର କାର୍ଯ୍ୟକ୍ରମ ଓ ଯୋଗଦେବାକୁ ଥିବା ଅତିଥିଗଣଙ୍କ ବିଷୟରେ ସୂଚନା ଦିଆ ଯାଇଥିଲା। ୫ଦିନ ଧରି ହେବାକୁ ଥିବା ଏହି ମହୋତ୍ସବରେ ରାଜନେତାଙ୍କ ମଧ୍ୟରେ ରାଜ୍ୟର ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂଦେଓ, ଭାଷା,ସାହିତ୍ୟ ଓ ସଂସ୍କୃତିବିଭାଗ ମନ୍ତ୍ରୀ ସୂର୍ଯ୍ୟବଂଶୀ ସୂରଜ,ସୋନପୁର ବିଧାୟକ ନୀରଞ୍ଜନ ପୂଜାହାରୀ,କଟକ ବାରବାଟି ବିଧାୟିକା ସୋଫିଆ ଫିରଦୋସ,ବରିଷ୍ଠ ସାମ୍ବାଦିକଙ୍କ ମଧ୍ୟରେ ଧରୀତ୍ରୀର ସଂପାଦକ ତଥାଗତ ଶତପଥି,ପ୍ରମେୟର ଗ୍ରୁପଏଡିଟର ଗୋପାଳକୃଷ୍ଣ ମହାପାତ୍ର, ସମ୍ବାଦର ବାର୍ତ୍ତା ସଂପାଦକ ଭବାନୀଶଙ୍କର ତ୍ରୀପାଠୀ ଓ ପ୍ରଗତିବାଦୀ ଖବର କାଗଜର କାର୍ଯ୍ୟନିର୍ବାହୀ ସଂପାଦକ ବିରୁପାକ୍ଷ ତ୍ରୀପାଠୀ ଯୋଗ ଦେବାକୁ ସ୍ୱୀକୃତୀ ପ୍ରଦାନ କରିଥିବା ସୂଚନା ଦିଆଯାଇଛି। ପ୍ରତ୍ୟେକ ଦିନ ଜଣେ ଜଣେ ବର୍ଷିୟାନ କଳାକାରଙ୍କୁ ମଧ୍ୟ ଅତିଥି କରାଯିବ। ଉଦଘାଟନୀ ଦିବସରେ ପଥୋତ୍ସବ କରାଯିବା ସହିତ ପ୍ରତ୍ୟହ ସଂଧ୍ୟାରେ ସାଂସ୍କୃତିକ ସଭା,ସାଂସ୍କୃତିକ କାର୍ଯ୍ୟକ୍ରମ କରାଯିବ ଓ ଶେଷରେ ନାଟକ ପ୍ରଦର୍ଶିତ ହେବ  ବୋଲି କମିଟିର ଧର୍ମେନ୍ଦ୍ର ନନ୍ଦ ସୂଚନା ଦେଇଥିଲେ। ଆଜିର ଏହି କାର୍ଯ୍ୟକ୍ରମରେ ଆୟୋଜକ ଭୂମିକା ସାଂସ୍କୃତିକ ଅନୁଷ୍ଠାନର ଡ.ପ୍ରକାଶ ଦାସ, ରୂଦ୍ରଦେବ ପଧାନ, ବୀରେନ୍ଦ୍ର କୁମାର ବନଛୋର, ଶିରୀଶ ଚନ୍ଦ୍ର ହୋତା, ଶିବକୁମାର ମେହେର, ମୁକେଶ ବହିଦାର ପ୍ରମୁଖଙ୍କ ସହ ସମସ୍ତ ଗଣମାଧ୍ୟମ ପ୍ରତିନିଧିମାନେ ଉପସ୍ଥିତ ଥିଲେ ।