20-Sep-2024

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ): ରାଜ୍ୟରେ ସରକାର ବଦଳି ନୂଆ ସରକାର ଗଠନ ପରେ ବି ସରକାରୀ ବିଭାଗରେ ବିଭାଗୀୟ ଲାଞ୍ଚ ବା ପିସି ବ୍ୟବସ୍ଥାରେ କୌଣସି ରୋକ୍ ଲାଗି ନାହିଁ  l ଗତ ୧୮ ତାରିଖରେ ବଲାଙ୍ଗୀର ସିଲଭି କଲଚର୍ ବିଭାଗକୁ କିଛିଦିନ ତଳେ ବଦଳି ହୋଇ ଆସିଥିବା ଜଣେ ଫରେଷ୍ଟର ରାୟଗଡାର ସଞ୍ଜୟ ନାୟକ(୩୩)ଙ୍କ ଭବାନୀପାଟଣାର  ସରକାରୀ କ୍ବାର୍ଟର ଭିତରେ ବେକରେ ଫାଶୀ ଲଗାଇ ଆତ୍ମହତ୍ୟା କରିଥିବା ଘଟଣା ଏହାର ଏକ ଜ୍ବଳନ୍ତ ଉଦାହରଣ । ମୃତଦେହ ନିକଟରୁ ପୁଲିସ୍ ଜବତ କରିଥିବା ତାଙ୍କର ସୁଇସାଇଡ୍ ନୋଟ୍ ରେ ସେ ଉଲ୍ଲେଖ କରିଥିବା ରାୟଗଡା ସିଲଭିକଲଚର୍ ଡିଭିଜନର ଡିଏଫଓ ବନାମ ସିଲଭିକଲଚରିଷ୍ଟ (ରିସର୍ଚ୍ଚ ଉଇଙ୍ଗ୍) ଦେବେନ୍ଦ୍ର ବେହେରା ଆଇ ଏଫ ଏସ ଙ୍କ ନାଁ' ରେ ତାଙ୍କଠାରୁ ଲକ୍ଷ ଲକ୍ଷ ଟଙ୍କା ପିସି ନେଲାପରେ ବି  ଚାକିରୀ ଯିବାର ଭୟ ଦେଖାଇ ସେ ଗତବର୍ଷେ ହେଲା ବାରମ୍ବାର ଚାପ ଓ ମାନସିକ ନିର୍ଯାତନା ଦେଇ ଆସୁଥିବା ଅଭିଯୋଗ କରାଯାଇଛି । ଏ ସମ୍ପର୍କରେ ମୃତକଙ୍କ ଭାଇ ରବି ନାରାୟଣଙ୍କ ପକ୍ଷରୁ ସ୍ଥାନୀୟ ଭବାନୀପାଟଣା ଟାଉନ ଥାନାରେ ଏକ ଏତଲା ଦିଆଯାଇଛି । ଶବ ବ୍ୟବଚ୍ଛେଦ କରି ପୁଲିସ୍ ମୃତଦେହକୁ ପରିବାର ବର୍ଗକୁ ହସ୍ତାନ୍ତର କରିଛି । କଳାହାଣ୍ଡି ଏସ ପି ଅଭିଳାଷ ଜି ଙ୍କ ନିର୍ଦ୍ଦେଶକ୍ରମେ ଏକ ମାମଲା ଋଜୁ ପୂର୍ବକ ତଦନ୍ତ ଚାଲିଛି । ଥାନାର ଆଇ ଆଇ ସି ଯଶୋବନ୍ତ ହିଆଲ ଅଭିଯୁକ୍ତ ଡିଏଫଓଙ୍କୁ ତଦନ୍ତର ପରିସରଭୁକ୍ତ କରାଯିବ ବୋଲି ପ୍ରକାଶ କରିଛନ୍ତି । ମୃତକଙ୍କ ପରିବାର ପକ୍ଷରୁ ତୁରନ୍ତ ଅଭିଯୁକ୍ତ ଡିଏଫଓଙ୍କୁ ଗିରଫ କରାଯିବାକୁ ଓ ତାଙ୍କ ପତ୍ନୀ ପ୍ରିୟଙ୍କା ସୁବୁଦ୍ଧି ଅଭିଯୁକ୍ତକୁ ଫାଶୀ ଦିଆଯିବାକୁ ଦାବି କରିଛନ୍ତି । ଅଭିଯୁକ୍ତ ବିରୁଦ୍ଧରେ ଓଡ଼ିଶା ନନ୍ ଗେଜେଟେଡ୍ ଫରେଷ୍ଟ ସର୍ଭିସ୍ ଆସୋସିଏସନ ପକ୍ଷରୁ ତୁରନ୍ତ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କଳାହାଣ୍ଡି ପୁଲିସ୍ ଏସ ପି , ଜିଲ୍ଲାପାଳଙ୍କ ଠାରୁ ଆରମ୍ଭ କରି ଡିଜି ପୁଲିସ୍ , ବିଭାଗୀୟ ଅଧିକାରୀ ପିସିସିଏଫ୍ , ବିଭିନ୍ନ ଉଚ୍ଚ ପଦାଧିକାରୀ ତଥା ମୁଖ୍ୟମନ୍ତ୍ରୀଙ୍କ ନିକଟରେ ଦୃଢ ଦାବି କରିଛନ୍ତି । ଗୁରୁତ୍ୱପୂର୍ଣ୍ଣ ଯେ , ମୃତ ଫରେଷ୍ଟରଙ୍କ ସୁଇସାଇଡ୍ ନୋଟ୍ ରେ ସେ ମୃତ୍ୟୁପୂର୍ବରୁ କରିଯାଇଥିବା ଗୁରୁତର ଅଭିଯୋଗ ଅନୁଯାୟୀ,  ଚାକିରୀ ଓ ବଦଳି ଭୟ ଦେଖାଇ ଅଭିଯୁକ୍ତ ଡିଏଫଓ ଗତବର୍ଷ ତାଙ୍କଠାରୁ ୭ ଲକ୍ଷ , ଚଳିତବର୍ଷ ଗଣେଶପୂଜା ବେଳେ ଅଢେଇ ଲକ୍ଷ , ତାଙ୍କ ବାସଭବନରେ ଏକ ଏସି , ତାଙ୍କ ଘରେ ଏକ ନଳକୂପ ଖନନ ଓ ଏକ ମନ୍ଦିର ପାଇଁ ୪୦ ହଜାର ଟଙ୍କା ପିସି ନେଲା ପରେ ବି  ଆହୁରି ମାନସିକ ନିର୍ଯାତନା ଦେଇ ଚାପ ପକାଇ ଆସୁଥିଲେ ।  ଅନ୍ୟାନ୍ୟ ସମସ୍ତ ରେଞ୍ଜରଙ୍କ ପରି ଆଉ ଅଧିକ ପିସି ଦେବାକୁ ଦାବି କରୁଥିଲେ ।  ସେ ବିଗତ ପ୍ରାୟ ୪ ବର୍ଷହେଲା

ଭବାନୀପାଟଣାର ଜାରିଙ୍ଗ ସ୍ଥିତ ନର୍ସରୀର ଦାୟିତ୍ୱ ଓ  ସିଲଭିକଲଚର୍ ର ଭାରପ୍ରାପ୍ତ ରେଞ୍ଜ ଅଧିକାରୀ ରହିଥିଲେ । କିଛିଦିନତଳେ ତାଙ୍କୁ ବଲାଙ୍ଗୀରକୁ ବଦଳି କରିଦିଆଯାଇଥିଲା । ତେଣୁ ଶେଷରେ ସେ ଅତିଷ୍ଠ ହୋଇ ଏପରି ଚରମ ପଦକ୍ଷେପ ନେଲେ । ଉଲ୍ଲେଖନୀୟ ଯେ ବଲାଙ୍ଗୀର ସିଲଭିକଲଚର୍ ନର୍ସରୀଟି ରାୟଗଡା ସିଲଭିକଲଚର୍ (ରିସର୍ଚଶାଖା ) ଡିଭିଜନ ଅଧୀନରେ ରହିଛି । 

ମୃତ ବନ ଅଧିକାରୀ ଜଣକ ଯୁବବିଧବାପତ୍ନୀ ଓ ଦୁଇଟି ଛୋଟ ଛୋଟ ଛୁଆଙ୍କୁ ଛାଡି ଯାଇଛନ୍ତି ।  ଅଭିଯୁକ୍ତ ଡିଏଫଓ ଫେରାର୍ ଥିବାରୁ ତାଙ୍କ ମତାମତ ନିଆଯାଇ ପାରିନାହିଁ । 

ଏଇ ଘଟଣାରୁ କଳହାଣ୍ଡିର ଜାରିଂ ବା ବଲାଙ୍ଗୀର ସିଲଭି କଲଚର୍ ନର୍ସରୀରେ କ'ଣ ଚାଲିଛି, ଏହାର ଏକ ପୁଙ୍ଖାନୁପୁଙ୍ଖ ତଦନ୍ତ କରାଗଲେ, ବହୁକଥା ଜଣାପଡିବ । 
ତେବେ ଏଠି କଥାହେଲା, ଗତ ସରକାରଙ୍କ ଅମଳରରୁ ଏଇ ବିଭାଗ ସମେତ ବିଭିନ୍ନ ସରକାରୀ ବିଭାଗରରେ ପିସି ପରମ୍ପରା ଚାଲି ଆସୁଛି ।  ଶେଷରେ ଏଇ ଘଟଣାର ଫଳାଫଳ କ'ଣ ହେବ , ଭବିଷ୍ୟତରେ ଜଣାପଡିବ ବୋଲି କୁହାଯାଉଛି । ଯଦି ଜଣେ ସର୍ବ ଭାରତୀୟ ସେବାର ଅଧିକାରୀ ବା ଆଇଏଫଏସ ଅଧିକାରୀ ଏଭଳି ଖୋଲାଖୋଲି ପିସି ନେଇ ଆହୁରି ଲାଞ୍ଚ ଦେବାକୁ ଏତେ ଚାପ ପକାନ୍ତି ଓ ପରିଣାମ ଜଣେ ସରକାରୀ ଅଧିକାରୀଙ୍କ ପ୍ରାଣହାନୀ ହୁଏ , ସରକାର କେତେ ନିର୍ମଳ ସମୀକ୍ଷା ସାପେକ୍ଷ ।