21-Aug-2024

ବଲାଙ୍ଗିର(ପ୍ରେରଣା ଖବର): ବଲାଙ୍ଗିର ମୁନିସିପାଲିଟି ଅଞ୍ଚଳରେ ଅନେକ ଜନଗହଳି ପୂର୍ଣ୍ଣ ରାସ୍ତା ଗୁଡାକ ଅତି କଦର୍ଯ୍ୟ ହୋଇଥିବା ବେଳେ ସୌନ୍ଦର୍ଯ୍ୟକରଣ ନାମରେ ଲକ୍ଷାଧିକ ଟଙ୍କା ଖର୍ଚ୍ଚ କରାଯାଉଥିବା ଦେଖିବାକୁ ମିଲୁଛି I ବଲାଙ୍ଗିର ସହରର ଏକ ମୁଖ୍ୟରାସ୍ତା ରମାଇ ଟକିଜ୍ ରୁ ଦୈନିକ ବଜାର କୁ ଯାଇଥିବା ରାସ୍ତାରେ ନାଳ ନର୍ଦ୍ଦମା ଜଳ ପ୍ରବାହିତ ହୋଇ କଦର୍ଯ୍ୟ ହୋଇ ପଡ଼ିରହିଛି।ଏହି ମୁଖ୍ୟ ରାସ୍ତାଠାରୁ ମ୍ୟୁନିସିପାଲିଟି ମାତ୍ର ୫୦ ମିଟର ଦୂରରେ ଅବସ୍ଥିତ।ପ୍ରତିଦିନ ଏହି ରାସ୍ତାଦେଇ ପୌରପରିଷଦର ଅଧିକାରୀ, କର୍ମଚାରୀ ବିଭିନ୍ନ କାର୍ଯ୍ୟାଳୟର ଅଫିସର ଏବଂ ହାଜର ହାଜର ଜନସାଧାରଣ ଯାତାୟାତ କରୁଛନ୍ତି I ସମସ୍ତଙ୍କ ଦୃଷ୍ଟିରେ ଅଛି ଏହି କଦର୍ଯ୍ୟ ରାସ୍ତା I ସେହିପରି ସିଭିଲ କୋର୍ଟ ସାମନା ହାତୀଶାଳ ପଡାକୁ ଯାଇଥିବା ରାସ୍ତା, ଜଲାରାମ ମନ୍ଦିର ରାସ୍ତା ଅତି ଶୋଚନୀୟ ଭାବେ କଦର୍ଯ୍ୟ ହୋଇଯାଇ ଥିବା ବେଳେ ଦୀର୍ଘବର୍ଷ ହେଲା ମରାମତି ମଧ୍ୟ କରାଯାଉ ନାହିଁ I

  ପୂର୍ବ ସରକାର ସୌନ୍ଦର୍ଯ୍ୟକରଣ କରିବା ପାଇଁ ମୁଖ୍ୟମନ୍ତ୍ରୀ କର୍ମତତ୍ପର ଅଭିଯାନରେ ବଲାଙ୍ଗିର ପୌର ପରିଷଦକୁ କୋଟି କୋଟି ଟଙ୍କା ପ୍ରଦାନ କରିଛନ୍ତି I କିନ୍ତୁ ପୌର ପରିଷଦ ସୌନ୍ଦର୍ଯ୍ୟକରଣ ନାମରେ ବଲାଙ୍ଗିରକୁ ଅସୁନ୍ଦର କରିବାରେ ଲାଗିରହିଥିବା ଅଭିଯୋଗ ହେଉଛି I ଏହି ଯୋଜନାରେ ତିଆରି ହୋଇଥିବା ବିଭିନ୍ନ ସ୍ଥାନରେ କେତେକ ପାର୍କ ବର୍ତ୍ତମାନ ରକ୍ଷଣା ବେକ୍ଷଣା ଅଭାବରୁ ପରିତ୍ୟକ୍ତ ଅବସ୍ଥାରେ ପଡିରହିଛି I ଉଦାହରଣ ସ୍ବରୂପ ବଲାଙ୍ଗିର ଉପ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ କିଛିମାସ ପୂର୍ବରୁ ଏକ ଛୋଟ ଜାଗାରେ ବସିବା ପାଇଁ କିଛି ବେଞ୍ଚ, କିଛି ଫୁଲଗଛ ଏବଂ ଚାରିପଟେ ବାଡଦେଇ ଏକ ସୁନ୍ଦର ବଗିଚା ତିଆରି ହୋଇଥିଲା, କିନ୍ତୁ ସେହି ବଗିଚାକୁ ଦେଖାରେଖା କରିବା ବା ଯତ୍ନ ନେବାପାଇଁ କେହି ନଥିବାରୁ ସେଠାରେ ଏବେ ଅନାବନା ଗଛ ସହ ଲଟା ବୁଦା ଚାରି ପଟେ ମାଡି ଗଲାଣି I ସେହି ବଗିଚାର ଗେଟ୍ ରେ ମଧ୍ୟ ଏକ ତାଲା ଝୁଲୁଥିବାର ଦେଖାଯାଉଛି I ସେହିପରି ବଲାଙ୍ଗିର ଭୀମଭୋଇ ମେଡିକାଲ କଲେଜ ମୁଖ୍ୟ ଗେଟ୍ ସମ୍ମୁଖରେ ଆମର ବଲାଙ୍ଗିର ନାମରେ ପୌର ପରିଷଦ ପକ୍ଷରୁ ତା.୨୦/୦୬/୨୦୨୧ ରେ ତତ୍କାଳୀନ ବିଧାୟକ ନରସିଂହ ମିଶ୍ର, ଜିଲ୍ଲାପାଳ ଚଞ୍ଚଳ ରାଣାଙ୍କ ଉଦଘାଟିତ ରାସ୍ତା କଡରେ ଏକ ଛୋଟିଆ ବଗିଚାର ଅବସ୍ଥା ମଧ୍ୟ ସମାନ ।ବଗିଚା ଭିତରେ ଅନା ବନା ଗଛ ଗୁଡିକ ବଡ ବଡ ହୋଇଗଲାଣି I ଏହା ଉପରେ ପୌରପରିଷଦର ଧ୍ୟାନ ଥିବାପରି ଜଣା ପଡୁନାହିଁ I ଏହିପରି ସହର ମଧ୍ୟରେ ଆଉ ଦୁଇ ତିନୋଟି ସ୍ଥାନରେ ସୌନ୍ଦର୍ଯ୍ୟକରଣ ନାମର ଲକ୍ଷାଧିକ ଟଙ୍କା ଖର୍ଚ୍ଚକରି ପାର୍କ ନିର୍ମାଣକରି ପୌରପରିଷଦ ଏହାର ରକ୍ଷଣାବେକ୍ଷଣ ଦିଗରେ ଆଉ ଧ୍ୟାନ ଦେଉନଥିବାରୁ ଲକ୍ଷାଧିକ ଟଙ୍କା ପାଣିରେ ପଡୁଛି I ସୌନ୍ଦର୍ଯ୍ୟକରଣ ନାମରେ ଲକ୍ଷାଧିକ ଟଙ୍କା ବାଟମାରଣା ହେଉଥିବା ଅଭିଯୋଗ ହେଉଛି I ଏଥି ପ୍ରତି ଜିଲ୍ଲାପାଳ ଧ୍ୟାନ ଦେବାପାଇଁ ଦାବି ହେଉଛି I