16-Aug-2024

ସୁବର୍ଣ୍ଣପୁର, (ମନୋରଞ୍ଜନ ତ୍ରିପାଠୀ)
 ବିଦେଶ ମାଟିରେ ପୁଣି କମାଲ ଦେଖାଇଲେ ଓଡିଆ ଖେଳାଳୀ । ସୁବର୍ଣ୍ଣପୁର ଜିଲ୍ଲା ଏହେସାସ ତାଇକଣ୍ଡୋ ଖେଳାଳୀଙ୍କୁ ଦେଶ ବାହାରେ ମିଳିଛି ଏହି ସଫଳତା । ଗତ ୧୦ ତାରିଖରୁ ୧୨ ତାରିଖ ପର୍ଯ୍ୟନ୍ତ ଥାଇଲାଣ୍ଡ ଆସୁମସନ ବିଶ୍ୱବିଦ୍ୟାଳୟ ବେଙ୍କକ ଷ୍ଟାଡିଅମରେ ଅନୁଷ୍ଠିତ ହୋଇଯାଇଥିବା ୭ମ ହିରୋସ କପ ତାଇକଣ୍ଡୋ ଚମ୍ପିଆନସିପରେ ଖେଳାଳୀଙ୍କୁ ମିଳିଛି ଏହି ସଫଳତା । ଓଡଶା ତାଇକଣ୍ଡୋ ସଂଘ ପକ୍ଷରୁ ଏବଂ ଭାରତୀୟ ଦଳର କୋଚ ତଥା ଆନ୍ତର୍ଜାତୀୟ ତାଇକଣ୍ଡୋ କ୍ରୀଡାବିତ ଏହେସାସ ହୋତାଙ୍କ ନେତୃତ୍ୱରେ ଓଡିଶାର ୪ ଜଣ ଖେଳାଳୀ ଥାଇଲାଣ୍ଡ ଗସ୍ତ କରିଥିଲେ । ସେହି ଚମ୍ପିଆନସିପରେ ୩୦ ଗୋଟି ଦେଶର ୩୫ଶହ ଖେଳାଳୀ ଅଂଶଗ୍ରହଣ କରିଥିଲେ । ତେବେ ସେଠାରେ ଅନୁଷ୍ଠିତ ସବ ଜୁନିଅର (ମହିଳା-କୌରଗୀ) ବର୍ଗରେ ତନୟା ଦାଶେପଟ୍ଟନାୟକଙ୍କୁ ରୌପ୍ୟ ପଦକ,ଅନୁସ୍କା ଦାଶଙ୍କୁ ରୋପ୍ୟ ପଦକ,ତାସା ନାୟକଙ୍କୁ କାଂସ୍ୟ ପଦକ ମିଳିଥିବାବେଳେ ସିନିଅର(ପୁରୁଷ) ବର୍ଗରେ ବିଶ୍ୱରଂଜନ ସାହୁଙ୍କୁ ମଦ୍ୟ ରୌପ୍ୟ ପଦକ ମିଳିଥିବା ଜଣାପଡିଛି । ଏହି ଟିମ ଆଜି ବିଦେଶ ମାଟିରୁ ମେଡାଲ ଧରି ସୁବର୍ଣ୍ଣପୁର ଜିଲ୍ଲାରେ ପହଂଚିଲା ପରେ ବିଭିନ୍ନ ମହଲରେ ସେମାନଙ୍କୁ ସ୍ୱାଗତ କରାଯାଇଛି । ଖେଳାଳୀଙ୍କ ଏହି ସଫଳତା ପାଇଁ ବୀରମହାରାଜପୁର ବ୍ଲକ ଅଧ୍ୟକ୍ଷା ଶାନ୍ତି ଲୁହା,ଉପାଧ୍ୟକ୍ଷ ନାରାୟଣ ଲୁହା,ଜିଲ୍ଲା କ୍ରୀଡା ଅଧିକାରୀ ଚିତରଂଜନ ମିଶ୍ର,ରାଜ୍ୟ ତାଇକଣ୍ଡୋ ସଂଘର ସଭାପତି ମନମୋହନ ଭଂଜ,ଜିଲ୍ଲା ତାଇକଣ୍ଡୋ ସଂଘର ସଭାପତି ରବୀନ୍ଦ୍ର ହୋତା ଏବଂ ଜିଲ୍ଲା ତାଇକଣ୍ଡୋ ସଂଘର ଆଇନ ପରାମର୍ଶଦାତା ଶେଷଦେବ ବାରିକ ପ୍ରମୁଖ ଶୁଭେଚ୍ଛା ଜଣାଇଛନ୍ତି ।