23-Jul-2024

କଣ୍ଟାମାଳ(ଜୟ କୁମାର ମହାରଣାଙ୍କ ରିପୋର୍ଟ) :ସରକାର ବୃଦ୍ଧ ବୃଦ୍ଧା,ବିଧବା, ଦିବ୍ୟାଙ୍ଗ ମାନଙ୍କ ପାଇଁ ପ୍ରତି ମାସ ୧୫ ତାରିଖ ଦିନ ଭତ୍ତା ପ୍ରଦାନ କରିବାର ବ୍ୟବସ୍ଥା କରିଛନ୍ତି ।ଏହି ଯୋଜନାରେ କାହାକୁ ଏକ ହଜାର ଟଙ୍କା ମିଳିଥାଏ ତ କାହାକୁ ୧୨ଶହ ଟଙ୍କା ମିଳିଥାଏ ।ଏହି ଭତ୍ତା ଟଙ୍କା ହିଁ ଏମାନଙ୍କ ପାଇଁ ଏକମାତ୍ର ଭରସା ।ଅଭିଯୋଗ ଅନୁସାରେ,କଣ୍ଟାମାଳ ବ୍ଲକ ଶିମିଳିପଦର ପଞ୍ଚାୟତରେ ଗତ ଦୁଇ ମାସ ହେଲା ହିତାଧିକାରୀ ମାନଙ୍କୁ ଭତ୍ତା ପ୍ରଦାନ କରାଯାଇ ନ ଥିବା ଅଭିଯୋଗ ହୋଇଛି।ଯାହାକି ସରକାରୀ ନିୟମର ଖୋଲାଖୋଲି ଉଲ୍ଲଂଘନ ହେଉଥିବା ଅଭିଯୋଗ ହେଉଛି ।ଭତ୍ତା ଟଙ୍କା ଆଗୁଆ ବ୍ୟାଙ୍କରୁ ଉଠାଇ ଆଣି ପଞ୍ଚାୟତ ନିର୍ବାହୀ ଅଧିକାରୀ ଜଣକ ଚଳୁ କରିଦେଇ ହିତାଧିକାରୀ ମାନଙ୍କୁ ଆଜିକାଲି ଭତ୍ତା ଦିଆଯିବ ବୋଲି କହୁଥିବା ଅଞ୍ଚଳରେ ଚର୍ଚ୍ଚା ଚାଲିଛି । ପ୍ରକାଶ ଥାଉକି,ଉକ୍ତ ପଞ୍ଚାୟତରେ ଏହି ଭତ୍ତା ବଣ୍ଟନରେ ବାରମ୍ବାର ଅନିୟମିତତା ହେତୁ ହିତାଧିକାରୀଙ୍କ ମନରେ ଅସନ୍ତୋଷ ପ୍ରକାଶ ପାଇଛି ।ସେଥିପାଇଁ ଉକ୍ତ ଭତ୍ତା ହିତାଧିକାରୀମାନେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି ।ସୂଚନା ଅନୁସାରେ, ଶିମିଳିପଦର ପଞ୍ଚାୟତ ଦାୟିତ୍ୱରେ ଥିବା ପଞ୍ଚାୟତ ନିର୍ବାହୀ ଅଧିକାରୀ  ଦୁଇମାସ ହେଲା ଭତ୍ତା ଦେଉନାହାନ୍ତି କି ତାଙ୍କ ସହ ଯୋଗାଯୋଗ କଲେ ମଧ୍ୟ ଯୋଗାଯୋଗ ହୋଇପାରୁନାହିଁ ।ତେଣୁ ଏସଂପର୍କରେ କଣ୍ଟାମାଳ ବିଡ଼ିଓ ଶ୍ରୀମତୀ ସାମି ଜୟଶ୍ରୀ ରେଡ୍ଡୀଙ୍କୁ ପଚାରିବାରୁ ଉକ୍ତ ପଞ୍ଚାୟତ ନିର୍ବାହୀ ଅଧିକାରୀ କାହାରି ଫୋନ ଉଠାଉ ନାହାନ୍ତି ଓ  ସରକାରୀ ନିର୍ଦ୍ଦେଶକୁ ଅବମାନନା କରୁଥିବାରୁ ତାଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ଉକ୍ତ ହିତାଧିକାରୀମାନଙ୍କୁ ଖୁବ୍ ଶୀଘ୍ର ଭତ୍ତା ପ୍ରଦାନ କରାଯିବ ବୋଲି କହିଛନ୍ତି ।