20-Jun-2024

ପାଟଣାଗଡ଼(ପୁର୍ଣ୍ଣ ଶଶୀ ଶେଖର ରାଓ) ଛୋଟ ଛୋଟ ଦୁଇ ଭଉଣୀ ଓ ମାଁବାପାଙ୍କ ଜୀବନରେ ଆଲୋକିତ କରିବା ପାଇଁ ଘରଛାଡ଼ି ରୋଜଗାରେ ବାହାରିଥିଲେ ଘରର ବଡ଼ ପୁଅ ଆଲୋକ। କିନ୍ତୁ ଆଜି ଆଲୋକ ଟି ସବୁଦିନ ପାଇଁ ଅନ୍ଧାରରେ ରହିଯାଇଛି। ସୂଚନା ଅନୁସାରେ ବଲାଙ୍ଗିର ଜିଲ୍ଲା ପାଟଣାଗଡ଼ ଥାନା କେରବେଡା ଗ୍ରାମ ପଞ୍ଚାୟତ ବାଞ୍ଜିଝାଲ ଗାଁ ର ଆଲୋକ ବରିହା( ୧୬)ପିତା, କଦମ୍ବ ବରିହା ବେଲପଡା ଥାନା ମଣ୍ଡଳ ଗାଁ ରୁ ମଣ୍ଡଦର୍ହ ଛକ ପର୍ଯ୍ୟନ୍ତ ପି, ଡବ୍ଳୁ ଡି ରାସ୍ତା ନିର୍ମାଣ ହେଉଥିବା  ବେଳେ ସେଥିରେ ଶ୍ରମିକ ଭାବେ ନିଯୁକ୍ତି ଥିଲେ। ସବୁଦିନ ଭଳି ସେ ଆଜି କାମ କରୁଥିବାବେଳେ ଡେବ୍ରିପାଲି ଛକଠାରେ ଅପରାହ୍ନ ୧୨ ଟା ବେଳେ ରୋଲର ମେସିନ୍ ଚାଲକ ଶୁଶାନ୍ତ ବେହେରା ଜୋରରେ ମେସିନ ଚଲାଇ ଆଲୋକକୁ ଧକ୍କା ଦେଇଥିଲେ। ଫଳରେ ଆଲୋକର ବାମ ଗୋଡ଼ରେ ଶକ୍ତ ଆଘାତ ଲାଗିଥିବାରୁ ତାଙ୍କୁ ବେଲପଡା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ଅଣାଯାଇଥିଲା କିନ୍ତୁ ସେଠାରେ ଡାକ୍ତର ସୁମନ୍ତ କୁମାର ପାଢ଼ୀ ତାଙ୍କୁ ମୃତ ଘୋଷଣା କରିଥିଲେ। ଏ ବିଷୟରେ ଖବର ପାଇ ପରିବାର ଲୋକେ ଆସି ଅପରାହ୍ନ ୨:୩୦ ଟାରେ ବେଲପଡା ଥାନା ରେ ଏତଲା ଦେଇଥିଲେ । ଏତଲାରେ ମୃତକଙ୍କ ବୟସ ୧୯ ବର୍ଷ ଦର୍ଶାଯାଇଥିବା ବେଳେ ପ୍ରକୃତରେ ମୃତକଙ୍କୁ ୧୬ ବର୍ଷ ହେଉଥିବା ଆଧାର କାର୍ଡ ପ୍ରମାଣିତ କରୁଛି। କିନ୍ତୁ ଅଭିଯୋଗ ପତ୍ର ଲେଖିବା ସମୟରେ ଆଲୋକର ବୟସ କାହିଁକି ବୃଦ୍ଧି କରାଯାଇଛି ତାହା ସନ୍ଦେହ ଘେରରେ। ସରକାର ବାହାଦୂର ବାରମ୍ବାର ଶିଶୁ ଶ୍ରମିକ ଆଇନକୁ ବଳବତ୍ତର ରଖିଥିଲେ ସୁଦ୍ଧା ପ୍ରଶାସନିକ ଅଧିକାରୀ ମାନେ ତାକୁ ଫୁ କରିଦେଉଛନ୍ତି। ବିଭିନ୍ନ ସ୍ଥାନର ବିଭିନ୍ନ କାର୍ଯ୍ୟରେ ଶିଶୁ ଶ୍ରମିକମାନେ ନିଯୁକ୍ତ ରହୁଥିବା ଦେଖିବାକୁ ମିଳୁଛି। ଏହା ଜାଣିଶୁଣି ପ୍ରଶାସନିକ ଅଧିକାରୀ ମାନେ ଚୁପ୍ ରହୁଛନ୍ତି କାହିଁକି ବୋଲି ଜନସାଧାରଣରେ ପ୍ରଶ୍ନବାଚୀ ସୃଷ୍ଟି କରୁଛି। ଏତଲାକୁ ଭିତ୍ତି କରି ବେଲପଡା ଥାନା କେଶ୍ ନମ୍ବର ୟୁ, ଏସ୍ ୨୭୯, ୨୮୭, ୩୦୪ ଏ ମାମଲା ରୁଜୁ କରିଥିବା ସତ୍ବେ ବେଲପଡା ଥାନାର ମହାନ ଥାନା ଅଧିକାରୀ ଶୁଶାନ୍ତ ଦାସ ଘଟଣା ଘଟିବାର ୬ ଘଣ୍ଟା ବିତିଯାଇଥିଲେ ସୁଦ୍ଧା ଅପରାଧୀ ଶୁଶାନ୍ତ ବେହେରାକୁ ଥାନାକୁ ଆଣି ନାହାନ୍ତି କାହିଁକି ବୋଲି ଜନସାଧାରଣରେ ମତ ପ୍ରକାଶ ପାଉଛି। ଉକ୍ତ ଘଟଣା ଉପରେ ଜିଲ୍ଲା ଆରକ୍ଷୀ ଅଧିକ୍ଷକ ସ୍ବତନ୍ତ୍ର ଦୃଷ୍ଟି ଆକର୍ଷଣ କରି ଉଚିତ ପଦକ୍ଷେପ ନେବାକୁ ଅଞ୍ଚଳବାସୀ ଦାବି କରୁଛନ୍ତି।