18-Jun-2024

ଲୋଇସିଂହା, (ବିନୋଦ କୁମାର ଦୀପ) ଲୋଇସିଂହା ରେ ସ୍ୱାସ୍ଥ୍ୟମନ୍ତ୍ରୀ ଡ଼. ମୁକେଶ ମହାଲିଙ୍ଗ ଙ୍କୁ ଭବ୍ୟ ସ୍ବାଗତ ସମ୍ବର୍ଦ୍ଧନା କରାଯିବା ସହ ରୋଡ ସୋ କରାଯାଇଥିଲା l ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ, ସଂସଦୀୟ ବ୍ୟାପାର, ବୈଦ୍ୟୁତିକ ଓ ପ୍ରଯୁକ୍ତି ସୁଚନା ମନ୍ତ୍ରୀ ଡ. ମୁକେଶ ମହାଲିଙ୍ଗ ନୂତନ ଭାବେ ଦାୟିତ୍ୱ ପାଇବା ପରେ ଲୋଇସିଂହା କୁ ପ୍ରଥମ ଗସ୍ତ କରିଛନ୍ତି l ଏହି ଅବସର ରେ ସ୍ଥାନୀୟ କଲେଜ୍ ଛକ ଠାରେ ବାଣ ଓ  ବାଜା ବଜାଇ ସ୍ବାଗତ ସମ୍ବର୍ଦ୍ଧନା କରାଗଲା l ଏହି ସମୟରେ ସାହସ୍ରାଧିକ ସଂଖ୍ୟାରେ ଦଳୀୟ କର୍ମୀ ସହ ଜନସାଧାରଣ ଉପସ୍ଥିତ ଥିଲେ l ପ୍ରଥମେ ଆଦିବାସୀ ସଙ୍ଘ ପକ୍ଷରୁ ଫୁଲମାଳ, ପୁଷ୍ପଗୁଚ୍ଛ ଓ ଉପଢୌକନ ଦେଇ ମାନ୍ୟବର ସ୍ୱାସ୍ଥ୍ୟମନ୍ତ୍ରୀ ଙ୍କୁ ସମ୍ବର୍ଦ୍ଧିତ  କରାଗଲା l ଏହାସହ ଡ଼. ମୁକେଶ ମହାଲିଙ୍ଗ ଶ୍ରୀ ରଘୁନାଥ ମନ୍ଦିର ଦର୍ଶନ କରିଥିଲେ l

ପରେ ପରେ ବିଭିନ୍ନ ଅନୁଷ୍ଠାନ, ବୁଦ୍ଧିଜୀବୀ ଓ ବ୍ୟକ୍ତି ବିଶେଷ ଡ଼ ମୁକେଶ ମହାଲିଙ୍ଗ ଙ୍କୁ ସମ୍ବର୍ଦ୍ଧିତ କରିଥିଲେ l ଏହାପରେ ରୋଡ ସୋ ରେ  ଜାତୀୟ ରାଜପଥ ରେ ବ୍ଲକ ଛକ, ବସଷ୍ଟାଣ୍ଡ ହୋଇ ଲୋଇସିଂହା ଦୁର୍ଗା ମନ୍ଦିର, ଜଗନ୍ନାଥ ମନ୍ଦିର , ସମଲେଇ ମନ୍ଦିର ଦର୍ଶନ କରିବା ସହ ଲୋଇସିଂହା ବସ୍ତି ପରିକ୍ରମା କରିଥିଲେ l ଲୋଇସିଂହା ନିର୍ବାଚନ ମଣ୍ଡଳୀ ର ନବ ନିର୍ବାଚିତ ବିଧାୟକ ଡ. ମୁକେଶ ମହାଲିଙ୍ଗ ରାଜ୍ୟରେ ନୂତନ ଭାବେ ଗଠିତ ବିଜେପି ସରକାର ରେ କ୍ୟାବିନେଟ ମନ୍ତ୍ରୀ ଭାବେ ସ୍ଥାନ ପାଇ ଆଜି ପ୍ରଥମ କରି ଲୋଇସିଂହା ଗସ୍ତ ରେ ପହଞ୍ଚିଛନ୍ତି l ଚଳିତ ମାସ ୧୨ ତାରିଖରେ ଓଡ଼ିଶାରେ ପ୍ରଥମ କରି ବିଜେପି ସରକାର ଗଠନ କରିଥିବା ବେଳେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଙ୍କ ସରକାର ଆରମ୍ଭ ହୋଇଛି l ଏଥିରେ କ୍ୟାବିନେଟ୍ ମନ୍ତ୍ରୀ ଭାବେ ଡ. ମୁକେଶ ମହାଲିଙ୍ଗ ଶପଥ ଗ୍ରହଣ କରିଥିବା ବେଳେ ଶନିବାର ସନ୍ଧ୍ୟାରେ ତାଙ୍କୁ ଗୁରୁତ୍ୱପୂର୍ଣ୍ଣ ସ୍ବାସ୍ଥ୍ୟ ଓ ପରିବାର କଲ୍ୟାଣ, ସଂସଦୀୟ ବ୍ୟାପାର, ବୈଦ୍ୟୁତିକ ଓ ସୂଚନା ପ୍ରଯୁକ୍ତି ବିଭାଗ ଭଳି ଦାୟିତ୍ୱ ପ୍ରଦାନ କରାଯାଇଛି l ପ୍ରଥମେ ରବିବାର ଲୋଇସିଂହା ନିର୍ବାଚନ ମଣ୍ଡଳୀ ପୁଇଁତଳା  ବ୍ଲକ ର  ବିଭିନ୍ନ ଗ୍ରାମରେ ସ୍ବାଗତ ସମ୍ବର୍ଦ୍ଧନା ସହ ସେଠାରୁ ମନ୍ତ୍ରୀ ପାଟଣେଶ୍ୱରୀ ଓ ସମଲେଶ୍ୱରୀ ମନ୍ଦିର ପହଞ୍ଚି ଦେବୀମାଁଙ୍କ ଦର୍ଶନ କରି ପୂଜାର୍ଚ୍ଚନା କରିଥିଲେ l ଏହାପରେ ସ୍ଥାନୀୟ ସାମ୍ବାଦିକ ଭବନଠାରେ ଦୁଲଦୁଲୀ କଳାପରିଷଦ ପକ୍ଷରୁ ଆୟୋଜିତ ନାଗରିକ ସମ୍ବର୍ଦ୍ଧନା କାର୍ଯ୍ୟକ୍ରମରେ ଯୋଗଦେଇ ମନ୍ତ୍ରୀ ପ୍ରକାଶ କଲେ ଯେ, ଆମେ ଲୋକଙ୍କୁ ଯେଉଁ ନିର୍ବାଚନ ପ୍ରତିଶୃତି ଦେଇଛୁ ତାକୁ ନିଶ୍ଚୟ ପୂରଣ କରିବୁ l ପରେ ପରେ ବଲାଙ୍ଗୀର ସ୍ଥିତ ସର୍କିଟ ହାଉସ ରେ ରାତ୍ରୀ ରହଣୀ କରିଥିଲେ l ସୋମବାର ପ୍ରାତଃ ପ୍ରଥମେ   ଲୋଇସିଂହା ଗସ୍ତ କରି ଲୋଇସିଂହା,  କୁଟେନ୍ ପାଲି, କର୍କଚିଆ ଛକ, ଝାରମୁଣ୍ଡା ରେ ସ୍ବାଗତ ସମ୍ବର୍ଦ୍ଧନା  ପାଇ କୁଶଙ୍ଗ ସ୍ଥିତ ମା କୁଶଙ୍ଗାଇ ଙ୍କୁ ଦର୍ଶନ କରିଥିଲେ l ପରେ ତଳିଉଡାର, ବୁରୋମୁଣ୍ଡା , ସରଗାଡ, ମାହାରପାଲି ଛକ, ଭରସୁଜା, ନଅଗାଁ(କ) , ଆଗଲପୁର,  ଡୁଡୁକା, ସାଲେଭଟା, ରୁଗୁଡ଼ିଖାଲ ରେ ସ୍ୱାସ୍ଥ୍ୟମନ୍ତ୍ରୀ ଡ଼ ମୁକେଶ ମହାଲିଙ୍ଗ ଙ୍କୁ  ଭବ୍ୟ ସ୍ଵାଗତ କରାଯିବା ସହ  ମନ୍ତ୍ରୀ ଙ୍କ ନିଜ ଗାଁ ନଅଗାଁ (ଖ) ରେ ବିପୁଳ ସ୍ବାଗତ ସମ୍ୱର୍ଦ୍ଧନା କରାଯିବା ଦେଖିବାକୁ ମିଳିଥିଲା l ଏହି କାର୍ଯ୍ୟକ୍ରମ ରେ ଦଳୀୟ କର୍ମୀ, ସ୍ବାସ୍ଥ୍ୟ ବିଭାଗ କର୍ମଚାରୀ ସହିତ ଅନେକ ଅନୁଷ୍ଠାନ ର କର୍ମକର୍ତ୍ତା ଓ ଜନସାଧାରଣ ସାମିଲ ଥିଲେ l