03-Jun-2024

ବଲାଙ୍ଗୀର (ପ୍ରେରଣା ଖବର ): ବଲାଙ୍ଗୀର ସହରର ରୁଗୁଡିପଡାରେ ଏକ ଲାଇନକେବୁଲ ମରାମତି ବେଳେ ବିତ୍ୟୁତ ସଂସ୍ପର୍ଷରେ ଆଜି ଜଣେ ଠିକାକର୍ମଚାରୀଙ୍କ ମୃତ୍ୟୁ ହୋଇଯାଇଛି । ମୃତ କର୍ମଚାରୀ ଜଣକ ମେହେରମୁଣ୍ଡା ଗ୍ରାମର ଅନୁପ ସିଂ(୨୮) ବୋଲି ଜଣାଯାଇଛି । ଘଟଣାକୁ ନେଇ ସହରରେ ଉତ୍ତେଜନା ପ୍ରକାଶ ପାଇବା ସହିତ କ୍ଷତିପୂରଣ ଦାବିରେ ମେହେରମୁଣ୍ଡା ଗ୍ରାମବାସୀ ଓ ଠିକାକର୍ମଚାରୀ କଚେରୀଛକରେ ଦୀର୍ଘସମୟ ପର୍ଯ୍ୟନ୍ତ ଧାରଣା ଦେଇଥିଲେ । ପରେ ବିଦ୍ୟୁତବିଭାଗର ଅଧିକ୍ଷଣଯନ୍ତ୍ରୀ ଇଂ.ଅଶିଷ ପଣ୍ଡା ତାଙ୍କ ସହ ଯୋଗୀ ଅଧିକାରୀମାନଙ୍କ ସହିତ ଆସି ଆଲୋଚନା କଲାପରେ ଧାରଣା ପ୍ରତ୍ୟାହୃତ ହୋଇଥିଲା । ମୃତକଙ୍କ ପରିବାରକୁ ୧ଲକ୍ଷ ଟଙ୍କା ନଗତ ଦେଇ କ୍ଷତିପୂରଣ ବାବଦକୁ ପରେ ୧୫ଲକ୍ଷ ଟଙ୍କା ସହିତ କମ୍ପାନୀର ବୀମାଇତ୍ୟାଦି ଦିଆଯିବ ବୋଲି ପ୍ରତିଶୃତି ଦେଲାପରେ ଆନ୍ଦୋଳନ ପ୍ରତ୍ୟାହୃତ ହୋଇଥିଲା । ଟାଉନଥାନାରେ ଏହି ଘଟଣାକୁ ନେଇ ଏକ ମାମଲା ରୁଜୁ ହୋଇ ଶବର ବ୍ୟବଚ୍ଛେଦ କରାଯାଇ ତାଙ୍କ ପରିବାର ବର୍ଗଙ୍କୁ ହସ୍ତାନ୍ତର କରାଯାଇଛି । ମିଳିଥିବା ସୂଚନାରୁ ଜଣାଯାଇଛି ଯେ,ଆଜି ସଂଧ୍ୟାରେ ରୁଗୁଡିପଡାର ବିଦ୍ୟୁତ ସରବରାହରେ ବ୍ୟତିକ୍ରମ ଥିବା ନେଇ ଅଭିଯୋଗ ଆସିଥିଲା । ସାଥିମାନଙ୍କ ସହିତ ଅନୁପ ସିଂ ଯାଇ ବିତ୍ୟୁ ଖମ୍ବକୁ ଚଢି କେବୁଲ ସଜାଡୁଥିଲେ । ଦୁଃର୍ଭାଗ୍ୟ ବଶତଃ ତାଙ୍କ ହାତରେ ୧୧କେଭି ତାର ଲାଗିଯାଇଥିଲା । ଫଳରେ ସେ ବିଦ୍ୟୁତ ଖମ୍ବରୁ ତଳକୁ ପଡିଯାଇଥିଲେ । ସାଙ୍ଗେ ସାଙ୍ଗେ ତାଙ୍କୁ ଭୀମଭୋଇ ମେଡିକାଲ କଲେଜକୁ ନିଆଯାଇଥିଲା ଓ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ତେବେ କୁଆଡେ ସେ ସର୍ଟଡାଉନ କରି କାମ କରୁଥିବା ବେଳେ କେହି ବିଦ୍ୟୁତ ଦେଇଦେଇଥିବା ଆଲୋଚନା ହେଉଛି । ଆଉ କିଛି ଲୋକ ବିଦ୍ୟୁତ ଖମ୍ବରୁ ଘରକୁ ଯାଇଥିବା ଡୋମେଷ୍ଟିକ ତାରରେ ଅସୁବିଧା ଥିଲା ତାକୁ ସଜାଡିବାକୁ କୌଣସି ସର୍ଟଡାଉନ କରାଯାଇନଥିଲା । ସେହି କାରଣରୁ କୌଣସି ପ୍ରକାରେ ତାଙ୍କ ଦେହରେ ତାର ଲାଗିଯାଇଥିଲା ଓ ଦୁର୍ଘଟଣା ଘଟିଥିଲା । ତେବେ ଏହି ଘଟଣା ପରେ ଅନେକଥର ଫୋନକଲ ପାଇ ସୁଦ୍ଧା ବିଦ୍ୟୁତ ବିଭାଗର କୌଣସି ଅଧିକାରୀ ଘଟଣାସ୍ଥଳୁକୁ ଆସିନଥିଲେ । ତେଣୁ କର୍ମଚାରୀମାନଙ୍କ ତଥା ମେହେରମୁଣ୍ଡା ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇ ଉତ୍ତେଜନା ପ୍ରକାଶ ପାଇଥିଲା । ଠିକାକର୍ମଚାରୀ ମାନେ ଅନୁପ ମୃତ୍ୟୁର କ୍ଷତିପୂରଣ ଦାବିରେ ଶବକୁ ଧରି କଚେରୀଛକରେ ଧାରଣାରେ ବସିଥିଲେ । ପରେ ଆଇଆଇସି ବିଶ୍ୱଜିତ ମନବୋଧଙ୍କ ହସ୍ତକ୍ଷେପ ପରେ ବିତ୍ୟୁତବିଭାଗର ଅଧିକ୍ଷଣ ଯନ୍ତ୍ରୀ ଇଂ.ଆଶିଷ ପଣ୍ଡା ତାଙ୍କ ନିର୍ବାହୀଯନ୍ତ୍ରୀ,ଏସଡିଓ,କନିଷ୍ଠଯନ୍ତ୍ରୀ ପ୍ରମୁଖଙ୍କୁ ଧରି ଧାରଣାସ୍ଥଳୁକୁ ପହଞ୍ଚି ଆଲୋଚନା କରିଥିଲେ । ମୃତକର ପରିବାରକୁ ନଗତ ୧ଲକ୍ଷ ଟଙ୍କା ଦିଆଯାଇଥିଲା ଓ ପରେ କ୍ଷତିପୂରଣ ବାବଦକୁ ୧୫ଲକ୍ଷ ଓ ବୀମାଇତ୍ୟାଦିର ଅର୍ଥରାଶି ପାଇବେ ବୋଲି ପ୍ରତିଶୃତି ଦିଆଯାଇଥିଲା । ଶେଷରେ ଜିଲ୍ଲାପାଳଙ୍କ ନିର୍ଦ୍ଦେଶରେ ଭୀମଭୋଇ ମେଡିକାଲ କଲେଜ ହସପିଟାଲରେ ରାତି ୯.୩୦ରେ ପୋଷ୍ଟମର୍ଟମ କରାଯାଇ ଶବକୁ ତାଙ୍କ ପରିବାରବର୍ଗଙ୍କୁ ହସ୍ତାନ୍ତର କରାଯାଇଥିଲା । ଖବର ନେବାରୁ ଜଣାଯାଇଛି ଯେ,ରାଜ୍ୟସରକାରଙ୍କ ପାଖରୁ ବିତ୍ୟୁତ ବଣ୍ଟନ ଓ ମେଣ୍ଟେନାନ୍ସ କାମ ଟାଟାପାୱାର କମ୍ପାନୀ ନେଇଛି । କିନ୍ତୁ ଟାଟାପାୱାର ପୁଣି ମେଣ୍ଟେନାନ୍ସ କାମ ଆଉ ଏକ ଠିକାସଂସ୍ଥା ସୂର୍ଯ୍ୟା କମ୍ପାନୀକୁ ଦେଇଛି । ସେହି ସୂର୍ଯ୍ୟାକମ୍ପାନୀ ଅଧିନରେ ଠିକାକର୍ମଚାରୀମାନେ କାମ କରୁଛନ୍ତି । ଏହି କର୍ମଚାରୀମାନଙ୍କୁ ଆବଶ୍ୟକ ସୁରକ୍ଷା ସରଞ୍ଜାମ ଦିଆଯାଉନଥିବା ମଧ୍ୟ ଅଭିଯୋଗ ହେଉଛି । ଯାହାଫଳରେ ବହୁ ସମୟରେ ଠିକାକର୍ମଚାରୀମାନେ ମୃତ୍ୟୁବରଣ କରୁଛନ୍ତି । ଏଦିଗରେ ମଧ୍ୟ କମ୍ପାନୀ ପଦକ୍ଷେପ ନେବାର ଆବଶ୍ୟକତା ରହିଛି ।