08-May-2024

କଣ୍ଟାମାଳ(ଜୟ କୁମାର ମହାରଣାଙ୍କ ରିପୋର୍ଟ ):  ବୌଦ୍ଧ ଜିଲା ପୋଲିସ ନିକଟରେ କେକେବିଏନ୍‌ ମାଓ ଡିଭିଜନର ବରିଷ୍ଠ କ୍ୟାଡର୍‌ ର ଦୁଇ ଦୁର୍ଦ୍ଦାନ୍ତ ମହିଳା ମାଓବାଦୀ ଏବଂ ୭ମାଓ ସଦସ୍ୟ ଆତ୍ମସମର୍ପଣ କରିଛନ୍ତି l ଦୁଇ ଦୁର୍ଦ୍ଦାନ୍ତ ମହିଳା ମାଓବାଦୀ ଯୋଗୀ ମାଡଭି @ ଜ୍ୟୋତି (ବୟସ -୨୦), ପୋଜେ ମାଡଭି (ବୟସ-୨୮) ବୁଧବାର ଦିନ ପୋଲିସ୍ ସାଉଥ୍ ରେଞ୍ଜର ଇନ୍ସପେକ୍ଟର ଜେନେରାଲ୍  ଜୟ ନାରାୟଣ ପଙ୍କଜ ଓ ଏସପି ରାଜ ପ୍ରସାଦ ଙ୍କ ଉପସ୍ଥିତିରେ ଆତ୍ମସମର୍ପଣ କରିଛନ୍ତି। ଯାହା ଏହି ଅଞ୍ଚଳରେ ବୃଦ୍ଧି ପାଇଥିବା ନକ୍ସଲ ଏବଂ ମାଓବାଦୀ ଘଟଣାକୁ ରୋକିବା ଦିଗରେ ପୋଲିସ କୁ ଗୁରୁତ୍ୱପୂର୍ଣ୍ଣ ସଫଳତା ମିଳିଛି | ସଂଗଠନର ଅନ୍ୟ ୭ପୁରୁଷ ସଦସ୍ୟ ହେଲେ  ଭୀମା କାଡ଼ଟି , ଭୀମା ବଞ୍ଜାମ , ବାଣ୍ଡି ବଞ୍ଜାମ , ଆର୍ମା ରାବା, ମାଳ ମାଡଭି , ଦେବା କାଡ଼ଟି ଏବଂ ଆୟତା ମାଡଭି | ସମସ୍ତେ ଛତିଶଗଡର ଦନ୍ତେୱାଡା ଜିଲା ମୁଲେର ଗାଁର ବାସିନ୍ଦା ଅଟନ୍ତି  | କେକେବିଏନ୍ (କାଲାହାଣ୍ଡି-କନ୍ଧମାଳ-ବୌଦ୍ଧ -ନୟାଗଡ଼) ଡିଭିଜନର ଅଷ୍ଟମ କମ୍ପାନୀର ପ୍ରଥମ ପ୍ଲାଟୁନର ଉଭୟ ମହିଳା ମାଓବାଦୀ ହିଂସାତ୍ମକ  କାର୍ଯ୍ୟକଳାପରେ ଜଡିତ ଥିଲେ। ସାଧାରଣ ଜୀବନଯାପନ କରିବାକୁ ସେମାନେ ଆତ୍ମସମର୍ପଣ କରିଛନ୍ତି। ସେମାନଙ୍କ କହିବାନୁସାରେ, ନକ୍ସଲ ସଂଗଠନରେ ମହିଳା କ୍ୟାଡରକୁ ଯୌନ ଉତ୍ପୀଡ଼ନ କରାଯିବା , ଅନ୍ୟକୁ ଭୟଭୀତ କରି ପାଣ୍ଠି ସଂଗ୍ରହ କରିବା , ମାଓବାଦୀମାନେ ବେଆଇନ ଗଞ୍ଜେଇ ଚାଷକୁ ପ୍ରୋତ୍ସାହନ ଦେବା , ଗଞ୍ଜାଇ ଚାଷ ଏବଂ ଚୋରା ଚାଲାଣ କରିବା , ଗଞ୍ଜାଇ ମାଫିଆଙ୍କ ଠାରୁ ଚାନ୍ଦା ଆଦାୟ ଏବଂ ଯୁବକ ଯୁବତୀ ମାନଙ୍କୁ ମିଥ୍ୟା ପ୍ରତିଶୃତି ଏବଂ ପ୍ରଚାର ଦ୍ୱାରା ସଂଗଠନ ରେ ସାମିଲ କରାଯାଉଛି l ନୂତନ ଓ କନିଷ୍ଠ କ୍ୟାଡର ପ୍ରତି ବରିଷ୍ଠ ନେତାଙ୍କ ଅନୈତିକ କାର୍ଯ୍ୟକଳାପ ଏବଂ ଅଭଦ୍ର ବ୍ୟବହାର ଦ୍ୱାରା ସେମାନେ ନିରାଶ ହୋଇଛନ୍ତି। ମାଓବାଦୀଙ୍କ ଅନୈତିକ  କାର୍ଯ୍ୟକଳାପ ଦ୍ୱାରା ସେମାନେ ବିବ୍ରତ ଓ ନିରାଶ ହୋଇଥିଲେ ବୋଲି ଆତ୍ମସମର୍ପଣ କରିଥିବା ମାଓବାଦୀମାନେ ପ୍ରକାଶ କରିଛନ୍ତି |  ଦକ୍ଷିଣାଞ୍ଚଳ ପୁଲିସ ଆଇଜି ଜୟନାରାୟଣ ପଙ୍କଜ ଏବଂ ଏସପି ରାଜ ପ୍ରସାଦ ଆଜି ଏକ ସାମ୍ବାଦିକ ସମ୍ମିଳନୀରେ ସରକାରଙ୍କ ଆତ୍ମସମର୍ପଣ ଏବଂ ଥଇଥାନ ଯୋଜନା ଅନୁସାରେ ସେମାନଙ୍କୁ ସମସ୍ତ ପ୍ରକାର ଆର୍ଥିକ ସହାୟତା ଯୋଗେଇ ଦିଆଯିବ ବୋଲି ସୂଚନା ଦେଇଛନ୍ତି।  ଗତ କିଛିଦିନ ତଳେ ପୁଲିସ ସହ ସଂଘର୍ଷରେ ଦୁଇ ମାଓବାଦୀଙ୍କ ମୃତ୍ୟୁ ହୋଇଥିବା ବେଳେ ଆଜି ୯ ଜଣ ମାଓବାଦୀ ଆତ୍ମସମର୍ପଣ କରିବା ପରେ ମାଓବାଦୀଙ୍କ ମନୋବଳ ଦୁର୍ବଳ ହୋଇ ପଡ଼ିଛି ବୋଲି ଏସ୍‌ପି ସୂଚନା ଦେଇଛନ୍ତି। ଚଳିତ ସାଧାରଣ ନିର୍ବାଚନ ସମୟରେ ମାଓବାଦୀଙ୍କ ଆତ୍ମସମର୍ପଣ କରିବା ପୁଲିସର ମନୋବଳକୁ ବଢ଼ାଇଛି ବୋଲି ସେ କହିଛନ୍ତି। ଆତ୍ମସମର୍ପଣ କରିଥିବା ମାଓବାଦୀଙ୍କ ନାମରେ ବୌଦ୍ଧ ସମତେ ଅନ୍ୟ ଜିଲ୍ଲାର ବିଭିନ୍ନ ଥାନାରେ ମାମଲା ଥିବାବେଳେ ସେମାନଙ୍କୁ ଧରିବା ପାଇଁ ପୁରସ୍କାର ରାଶି ମଧ୍ୟ ଘୋଷଣା ହୋଇଥିଲା।