25-Apr-2024

ବାଲାଙ୍ଗୀର(ପ୍ରେରଣା ଖବର ): ଓଡିଶା କଂଗ୍ରେସରେ ବ୍ୟକ୍ତିକୈନ୍ଦ୍ରିକ କାର୍ଯ୍ୟକଳାପ ଚାଲିଛି । ସେହି କାରଣରୁ କଂଗ୍ରେସ ପ୍ରତି ଜନସାଧାରଣ ବିମୁଖ ହେଉଛନ୍ତି । ପଶ୍ଚିମଓଡିଶାରେ ପିସିସି ସଭାପତି ଶରତ ପଟ୍ଟନାୟକ, ବିଧାୟକଦଳର ନେତା ନରସିଂହ ମିଶ୍ର ଓ କଂଗ୍ରେସପ୍ରଚାର କମିଟିର ମୁଖ୍ୟ ଭକ୍ତଚରଣ ଦାସଙ୍କ ଦଳରେ ମନମାନୀ କାରଣରୁ ଦଳ ତଳିତଳାନ୍ତ ହୋଇଛି ବୋଲି କଂଗ୍ରେସଦଳରୁ ଇସ୍ତଫା ଦେଇଥିବା ପିସିସି ସାଧାରଣସଂପାଦକ ତଥା ଏଆଇସିସି ସଭ୍ୟ ବିଧୁଭୂଷଣ ତ୍ରୀପାଠୀ ଅଭିଯୋଗ କରିଛନ୍ତି । ଆଜି ବଲାଙ୍ଗୀର ସାମ୍ବାଦିକ ଭବନଠାରେ ଆୟୋଜିତ ଏକ ସାମ୍ବାଦିକ ସମ୍ବିଳନୀରେ ବିଧୁଭୂଷଣ ତ୍ରୀପାଠୀ ଆହୁରୀ ଅଭିଯୋଗ କରିଛନ୍ତି ଯେ,କଂଗ୍ରେସଦଳ ଚଳିତ ନିର୍ବାଚନ ପାଇଁ ପ୍ରାର୍ଥିଚୟନ ପାଇଁ ପ୍ରଗମନ ଆପ ଜରିଆରେ ଆବେଦନ ଆହ୍ୱାନ କରିଥିଲେ । କିନ୍ତୁ ଏହାକୁ ଏକ ଫାର୍ସକରି ନିଜର ମନମୁତାବକ ବିଧାୟକ ଦଳ ନେତା ନରସିଂହ ମିଶ୍ର ବଲାଙ୍ଗୀର ଲୋକସଭା ପାଇଁ ବାହାର ଜିଲ୍ଲାରୁ ଜଣେ ଅଣରାଜନୈତିକ ବ୍ୟକ୍ତିକୁ ଡାକି ଆଣି ପ୍ରାର୍ଥି କରିଛନ୍ତି । ସେ ବଲାଙ୍ଗୀର ବିଧାୟକ ପ୍ରାର୍ଥି ସମରେନ୍ଦ୍ରଙ୍କୁ ମଧ୍ୟ ସମାଲୋଚନା କରି କହିଛନ୍ତି ଯେ, ସମରେନ୍ଦ୍ର ନିଜକୁ ପକ୍କା ବଲାଙ୍ଗୀରିଆ କହି ପ୍ରଚାର କରୁଥିବା ବେଳେ ସମ୍ବଲପୁରରୁ ଜଣେ ଅଣରାଜନୈତିକ ବ୍ୟକ୍ତିକୁ ଡାକିଆଣି ଲୋକସଭା ପ୍ରାର୍ଥି କରାଇଛନ୍ତି । ଏହାକୁ ସେବ ଦୃଢବିରୋଧ କରୁଛନ୍ତି ଓ କଂଗ୍ରେସଦଳର ପଦପଦବୀ ସହ ପ୍ରାଥମିକ ସଦସ୍ୟରୁ ଇସ୍ତଫା ଦେଉଥିବା ବିଷୟରେ ଗଣମାଧ୍ୟମ ଆଗରେ ବିଧୁଭୂଷଣ ତ୍ରୀପାଠୀ କହିଛନ୍ତି । ପ୍ରକାଶ ଯେ, ବିଧୁଭୂଷଣ ଛାତ୍ରଜୀବନରୁ କଂଗ୍ରେସଦଳରେ ରାଜନୀତି ଆରମ୍ଭ କରି ସମ୍ବଲପୁର ବିଶ୍ୱବିଦ୍ୟାଳୟର ଛାତ୍ରସଂସଦ ସଭାପତି ହୋଇଥିଲେ । ଏହାପରେ ସେ ଜିଲ୍ଲା ଯୁବକଂଗ୍ରେସରେ ୧୦ବର୍ଷ ଜିଲ୍ଲାସଭାପତି ରହିଥିଲେ । ପରେ ପୁଣି ପିସିସିର ନିର୍ବାଚିତ ସଭ୍ୟ ଓ ଏଆଇସିସିର ନିର୍ବାଚିତ ସଭ୍ୟ ରହିବା ସହିତ ବିଭିନ୍ନ ରାଜ୍ୟର ପର୍ଯ୍ୟବେକ୍ଷକ ରହିଆସିଥିଲେ । ଚଳିତଥର ସେ ବଲାଙ୍ଗୀର ଲୋକସଭାରେ କଂଗ୍ରେସଦଳରୁ ପ୍ରାର୍ଥି ହେବାକୁ ଆବେଦନ କରିଥିଲେ । କିନ୍ତୁ ଦଳ ବଲାଙ୍ଗୀର କିମ୍ବା ସୋନପୁର ଜିଲ୍ଲାର କାହାକୁ ପ୍ରାର୍ଥି ନକରି ସମ୍ବଲପୁର ଜିଲ୍ଲାର ଅଭିନେତାରୁ ରାଜନେତା ହୋଇଥିବା ମନୋଜ ମିଶ୍ରଙ୍କୁ ପ୍ରାର୍ଥି କରିଥିଲା । ଫଳରେ ଏହାକୁ ବିରୋଧ କରି ବହୁସଂଖ୍ୟାରେ କଂଗ୍ରେସନେତା ଦଳ ଛାଡୁଛନ୍ତି । ଆଜି କଂଗ୍ରେସଦଳର ବିଧୁଭୂଷଣଙ୍କ ସହିତ କଂଗ୍ରେସଦଳର ଜିଲ୍ଲା ଉପସଭାପତି ଗ୍ଲେଡଷ୍ଟୋନ ତାଣ୍ଡି, ଲୋଇସିଂହା ନିର୍ବାଚନମଣ୍ଡଳିରୁ ଆଶାୟୀ ଥିବା ଅର୍ଜୁନ ମୁଗ୍ରୀ, ପୁଇଁତଳାର ଦୟାନିଧି ବିଶି, ସୁରେଶ ମିଶ୍ର ଓ ଜିତେନ୍ଦ୍ର ନାଗ କଂଗ୍ରେସଦଳ ଛାଡିଛନ୍ତି ।