10-Apr-2024

ବାଲାଙ୍ଗୀର(ପ୍ରେରଣା ଖବର ): ବଲାଙ୍ଗୀର ଜିଲ୍ଲାରେ ବିଜେପି ଶିବିରରେ କଳାଛାଇ । ସଂଗୀତାଙ୍କ ଟିକେଟ ଘୋଷଣା ପରେ ଅନେକ ଭାଜପା ନେତା ଅସନ୍ତୋଷ ପ୍ରକାଶ କରି ଦଳ ଛାଡୁଛନ୍ତି । ଗତକାଲି ବଲାଙ୍ଗୀରର ଜଣାଶୁଣା ଭାଜପା ନେତା  ତଥା ପୂର୍ବତନ ଜିଲ୍ଲା ସଭାପତି ପ୍ରଭାସ ପାଣିଗ୍ରାହୀ ଦଳ ଛାଡିଥିଲେ । ସେହିପରି ଜିଲ୍ଲା ମହିଳାମୋର୍ଚ୍ଚା ସଭାନେତ୍ରୀ ପଙ୍କଜିନୀ ପଣ୍ଡା ମଧ୍ୟ ଭାଜପା ଛାଡିଥିଲେ । ସେହିପରି ଭାଜପାର ଯୁବନେତା ସୁରମ୍ୟ ମିଶ୍ର(ବବି ମିଶ୍ର) ମଧ୍ୟ ଭାଜପା ଦଳ ଛାଡିଥିଲେ । ଆଜି ଭୁବନେଶ୍ୱର ଶଙ୍ଖ ଭବନଠାରେ ପ୍ରଭାସ ପାଣିଗ୍ରାହୀ,ସୁରମ୍ୟ ମିଶ୍ର(ବବି) ଓ ବିନୋଦ ନାଗ(ନାଗା) ଆନୁଷ୍ଠାନିକ ଭାବରେ ବିଜେଡି ଦଳରେ ଯୋଗ ଦେଇଛନ୍ତି । ରାଜ୍ୟସଭା ସାଂସଦ ତଥା ରାଷ୍ଟ୍ରୀୟ ପ୍ରବକ୍ତା ଡ.ସମ୍ବିତ ପାତ୍ର, ବିଜେଡି ରାଜ୍ୟ ସାଧାରଣ ସଂପାଦକ ତଥା ବଲାଙ୍ଗୀର ବିଜେଡି ବିଧାୟକ ପ୍ରାର୍ଥି କଳିକେଶନାରାୟଣ ସିଂଦେଓ ଓ ପ୍ରବକ୍ତା ପ୍ରୀୟବ୍ରତ ମାଝୀଙ୍କ ଉପସ୍ଥ୍ରିତିରେ ଏମାନଙ୍କୁ ବିଜେଡି ଉତ୍ତରିୟ ଦେଇ ଆନୁଷ୍ଠାନିକ ଭାବରେ ବିଜେଡିରେ ସାମିଲ କରାଇଛନ୍ତି । 

ବଲାଙ୍ଗୀରରେ ଭାଜପା ଦଳକୁ ସଂଗୀତା ଓ କନକଙ୍କ ଏକଛତ୍ରବାଦ ହିସାବରେ ଚଳାଇଛନ୍ତି । ଦେଶରେ ନରେନ୍ଦ୍ର ମୋଦୀ କଂଗ୍ରେସମୁକ୍ତ ଭାରତ ନାରା ଦେଉଥିବା ବେଳେ ଭାଜପା ସାଂସଦ ସଂଗୀତା ବଲାଙ୍ଗୀରରେ କଂଗ୍ରେସଯୁକ୍ତ କାର୍ଯ୍ୟକଳାପ କରୁଥିବାରୁ ପ୍ରଭାସ ଦଳ ଛାଡିଲେ ବୋଲି ଗଣମାଧ୍ୟମକୁ ଗତକାଲି କହିଥିଲେ । ରାଜ୍ୟରେ ନବୀନ ସରକାର ଅମଳରେ ଅନେକଗୁଡିଏ ବିକାଶମୂଳକ ପ୍ରକଲ୍ପ କାମ ହୋଇଛି ତେଣୁ ନବୀନ ପଟ୍ଟନାୟକଙ୍କ ଆଦର୍ଶ ତଥା ବଲାଙ୍ଗୀର ବିକାଶରେ ସହଭାଗୀ ହେବାକୁ ବିଜେଡିରେ ଯୋଗ ଦେଇଥିବା ପ୍ରଭାସ ଓ ବବି ଆଜି କହିଛନ୍ତି । ପ୍ରଭାସ ଓ ବବିଙ୍କ ଯୋଗଦାନ ପରେ ବଲାଙ୍ଗୀର ବିଜେଡି ଦଳ ଆହୁରି ମଜବୁତ ହେବ ବୋଲି ବଲାଙ୍ଗୀର ବିଜେଡି ପକ୍ଷରୁ କୁହାଯାଇଛି ।