07-Feb-2024

ବଲାଙ୍ଗୀର- କୋସଲ ଆନ୍ଦୋଳନକୁ ଶାଣିତ କରିବାକୁ ତଥା କୋଶଳାଞ୍ଚଳରେ ବିଶେଷ କରରି ଅବିଭକ୍ତ ବଲାଙ୍ଗିର ଜିଲ୍ଲାରେ ପରିବାରବାଦ ରାଜନୀତିକୁ ପ୍ରତିହତ କରିବା ପାଇଁ ବିଶିଷ୍ଟ କୋସଲବାଦୀ ନେତା ପ୍ରମୋଦ ମିଶ୍ର ବିଭିନ୍ନ ଅଂଚଳକୁ ଗସ୍ତ କରି ସଭା, ସମିତିମାନ କରୁଛନ୍ତି । ଏହି କ୍ରମରେ ଗତକାଲି ବିଳମ୍ବିତ ସନ୍ଧ୍ୟା ପର୍ଯ୍ୟନ୍ତ ଶ୍ରୀ ମିଶ୍ର ଦେଓଗାଁ ବ୍ଲକର ବନ୍ଧପଡା ଠାରେ ଏକ ଯୁବ ସମ୍ମିଳନୀରେ ଯୋଗ ଦେଇଥିଲେ । କୋସଲ ରାଜ୍ୟ ସମନ୍ୱୟ ସମିତି ଦେଓଗାଁ ବ୍ଲକ କମିଟି ତରଫରୁ ଆୟୋଜିତ ଏହି ଯୁବ ସମ୍ମିଳନୀରେ ଶତାଧିକ ଯୁବ ସଂଗଠକ ଯୋଗଦାନ କରିଥିଲେ । ଉପସ୍ଥିତ ଯୁବ ପ୍ରତିନିଧିମାନଙ୍କୁ ଉଦ୍‌ବୋଧନ ଦେଇ ଶ୍ରୀ ମିଶ୍ର କୋସଲ ଆନ୍ଦୋଳନକୁ ଜୋରଦାର କରିବା ପାଇଁ ଯୁବ ପ୍ରତିନିଧିମାନଙ୍କୁ ଆହ୍ୱାନ ଦେଇଥିଲେ । ଏଥି ସହିତ କୋସଲ ଆନ୍ଦୋଳନ, ଗଣତନ୍ତ୍ର ଓ ଅବିଭକ୍ତ ବଲାଙ୍ଗିର ଜିଲ୍ଲା (ବଲାଙ୍ଗିର - ସୋନପୁର)ର ବିକାଶ ଓ ସମୃଦ୍ଧି ପାଇଁ ପରିବାରବାଦ ରାଜନୀତିକୁ ପ୍ରତିହତ କରିବା ପାଇଁ ଯୁବ ସମାଜକୁ ଆହ୍ୱାନ ଦେଇଥିଲେ । ଗତ ୩୦ବର୍ଷ ମଧ୍ୟରେ ବଲାଙ୍ଗିର ଜିଲ୍ଲା ଓ ବଲାଙ୍ଗିର ଲୋକସଭା ନିର୍ବାଚନ ମଣ୍ଡଳୀର ରାଜନୀତି କିଛି  ନିର୍ଦ୍ଦିଷ୍ଟ ରାଜନୈତିକ ପରିବାର ହାତରେ କେନ୍ଦ୍ରୀଭୁତ ହୋଇ ରହି ଯିବାରୁ ଏ ଅଂଚଳର ବିକାଶ ହୋଇ ପାରୁ ନାହିଁ ବୋଲି ଶ୍ରୀ ମିଶ୍ର ମତ ଦେଇଥିଲେ । ଏଥି ସହିତ ଏ ଅଂଚଳର ସକ୍ଷମ ଓ ସଂଗ୍ରାମୀ ଯୁବ ସମାଜକୁ ରାଜନୈତିକ ନେତୃତ୍ୱ ପ୍ରଦାନ କରିବା ପରିବର୍ତ୍ତେ ନିଜ ପରିବାରର ସଂପତ୍ତି ଓ ପ୍ରତିପତ୍ତିର ସୁରକ୍ଷା ପାଇଁ କିଛି ରାଜନେତା ନିଜ ନିଜର ପୁଅ ମାନଙ୍କୁ ଧରି ରାଜନୌତିକ ମଇଦାନରେ ବୁଲୁଥିବାରୁ ଶ୍ରୀ ମିଶ୍ର ସେମାନଙ୍କୁ ସମଲୋଚନା କରିଥିଲେ । ଯେଉଁ ରାଜନୈତିକ ଦଳମାନେ ଏ ଅଂଚଳର ବାସ୍ତବିକ ବିକାଶ ଚାହାନ୍ତି, ସେମାନେ ଏଭଳି ପରିବାରବାଦୀ ରାଜନୈତିକ ପରିବାରମାନଙ୍କୁ ଛାଡି ସାଧାରଣ ପରିବାରର ଯୁବକମାନଙ୍କୁ ଟିକଟ ଦିଅନ୍ତୁ ବୋଲି ଶ୍ରୀ ମିଶ୍ର ଆହ୍ୱାନ ଦେଇଥିଲେ । ଯେଉଁ ରାଜନେତା କୋସଲକୁ ବିରୋଧ କରୁଛନ୍ତି କିମ୍ବା କୋସଲ ପ୍ରସଙ୍ଗକୁ ନେଇ ରାଜନୈତିକ ଫାଇଦା ନେବାକୁ ଚେଷ୍ଟା କରୁଛନ୍ତି ସେମାନଙ୍କୁ ଆଗାମୀ ନିର୍ବାଚନରେ ପ୍ରତ୍ୟାଖ୍ୟାନ କରିବାକୁ ଶ୍ରୀ ମିଶ୍ର ଆହ୍ୱାନ ଦେଇଥିଲେ । ଏହି ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ ଶିକ୍ଷାବିତ୍ ସଂକିର୍ତ୍ତନ୍ୟ ଦାଶ, ଶ୍ରମିକ ନେତା ରବି ମିଶ୍ର, ରଣରାଜ ସିଂଦେଓ, ଯୁବ ସଂଗଠକ ଡୋଳାମଣି ପ୍ରଧାନ, କୃତିବାସ ଚାନ୍ଦ, ବନ୍ଧପଡା ସରପଂଚ ଗୋପାଳ ମିଶ୍ର ଓ ସମାଜସେବୀ ଜୟଦୀପ ସିଂ ନିନା, ଅମିତ କୁମାର ପଲିତା ପ୍ରମୁଖ ଉଦ୍‌ବୋଧନ ଦେଇଥିଲେ ।