11-Jan-2024

ବଲାଙ୍ଗୀର,- ଆଜି ହେଉଛି ସର୍ବଭାରତୀୟ ମଠଖାଇ ମହୋତ୍ସବର ପଂଚମ ସଂଧ୍ୟା ଅର୍ଥାତ  ଶେଷ ଦିନ । ଦୀର୍ଘ ୪ ଦିନ ଧରି କୋଶଳ କଳାମଣ୍ଡଳ ପଡିଆରେ ନାଟ୍ୟପ୍ରେମୀ ଓ କଳାକାର ମାନଙ୍କ ସମାଗମ ହୋଇଥିଲା । ଆଜି ଶେଷ ସଂଧ୍ୟାରେ ମଧ୍ୟ ଦର୍ଶକଙ୍କ ପ୍ରବଳ ଉତ୍ସାହ ପରିଲକ୍ଷିତ ହୋଇଥିଲା । ମଠଖାଇ ମହୋତ୍ସବ କମିଟି ଓ ଭୂିମିକା ପରିବାର ସଦସ୍ୟ ମାନଙ୍କ ଅକ୍ଲାନ୍ତ ଉଦ୍ୟମ ଓ ନିଷ୍ଟା ବଳରେ ନାଟ୍ୟମହୋତ୍ସବ ସଫଳତାର ସହ  ପରିଚାଳିତ ହୋଇଛି । ପ୍ରତ୍ୟେକ ଦିନ ବିଭିନ୍ନ ସ୍ୱାଦର ବିଭିନ୍ନ କଥାବସ୍ତୁକୁ ନେଇ ନାଟକ ପରିବେଷିତ ହୋଇଛି । ଆଜି ଶେଷ ସଂଧ୍ୟାରେ ସମ୍ବଲପୁରର ଅଦୃଶ୍ୟ ନାଟ୍ୟଶ୍ରମ ଦ୍ୱାରା ତଥା ଅତୀଶ କୁମାର ଶତପଥୀଙ୍କ ଦ୍ୱାରା ଲିଖିତ ଓ ନିର୍ଦ୍ଦେଶିତ ସମ୍ବଲପୁରୀ କ୍ଷୁଦ୍ର ନାଟକ 'ଭାବ୍ ନୁ ଅଭାବ୍' ଦର୍ଶକଙ୍କ ମନ ମୋହିଥିଲା ।  ମଠଖାଇ ମହୋତ୍ସବର ଉପଦେଷ୍ଟ ପ୍ର. ମଧୁସୂଦନ ପତିଙ୍କ ଅଧ୍ୟକ୍ଷତାରେ  ଅନୁଷ୍ଠିତ ସଭାରେ ମୁଖ୍ୟ ଅତିଥି ଭାବରେ ଟିଟିଲାଗଡ଼ ବିଧାୟିକା 

ତଥା ମନ୍ତ୍ରୀ ଟୁକୁନି ସାହୁ ଯୋଗ ଦେଇ  ନିଜର ଅଭିଭାଷଣ ରଖିଥିଲେ । ଭୂମିକା ତଥା ମଠଖାଇ ମହୋତ୍ସବ କମିଟିର ଉପଦେଷ୍ଟl ନାଟ୍ୟଭୂଷଣ ଜଗଦାନନ୍ଦ ଛୁରିଆ, ମହୋତ୍ସବ କମିଟିର ଅଧ୍ୟକ୍ଷ ତଥା ବଲାଙ୍ଗୀର ବିଧାୟକ ନରସିଂହ ମିଶ୍ର ପ୍ରମୁଖ ମଂଚାସୀନ ଥିଲେ । ଏହି ଅବସରରେ ମଠଖାଇ ମହୋତ୍ସବ କମିଟି ପକ୍ଷରୁ ସ୍ମରଣିକା ‘ନାଟମଣ୍ଡପ’ ଉନ୍ମୋଚିତ ହୋଇଥିଲା । ଗତକାଲି ପରି ଆଜି ମଧ୍ୟ ଦିନ ବେଳା ‘ନାଟ୍ ଆର୍ ଜୁଆନ୍  ପିଢ଼ି ‘ ଶୀର୍ଷକ ବଷୟବସ୍ତୁ ଉପରେ ଏକ ଆଲୋଚନାଚକ୍ର ଅନୁଷ୍ଠିତ ହୋଇଥିଲା । 

ଏହି ଅବସରରେ ଅଭିନେତା ତଥା ନିର୍ଦ୍ଦେଶକ ବାଳମୁକୁନ୍ଦ ବେହେରାଙ୍କୁ  ମଠଖାଇ ମହୋତ୍ସବ କମିଟି ପକ୍ଷରୁ ମାନପତ୍ର ଓ ଉପାୟନ ଦେଇ ମଠଖାଇ ସମ୍ମାନରେ ସମ୍ମାନିତ  କରାଯାଇଥିଲା । ମହୋତ୍ସବ କମିଟିର ଅଧ୍ୟକ୍ଷ ତଥା ବିଧାୟକ  ନରସିଂହ ମିଶ୍ର ନିଜ ଅଭିଭାଷଣରେ ସମସ୍ତେ ନାଟକକୁ ଉପଭୋଗ କଲେ  ନାଟ୍ୟ ପରମ୍ପରା ସମୃଦ୍ଧ ହେବ ବୋଲି କହିଥିଲେ । ଭୂମିକାର ସଂପାଦକ ଅଶୋକ ଦାଶ ଅତିଥି ମାନଙ୍କୁ ମଂଚକୁ ଆମନ୍ତ୍ରଣ କରିବା ସହ ଶେଷରେ ଧନ୍ୟବାଦ ଅର୍ପଣ କରିଥିଲେ । ୫ ଦିନ ଧରି ଅନୁଷ୍ଠିତ ହୋଇଥିବା ଏହି ମହୋତ୍ସବରେ ଭୂମିକା ପରିବାରର ସମସ୍ତ ସଦସ୍ୟ ସହଯୋଗ କରିଥିଲେ ।