01-Jul-2026

ସୁବର୍ଣ୍ଣପୁର (ମନୋରଞ୍ଜନ ତ୍ରିପାଠୀ )
 ସୁବର୍ଣ୍ଣପୁର OMSA ଶାଖା ପକ୍ଷରୁ ଜିଲ୍ଲା ମୁଖ୍ୟ ଚିକିତ୍ସାଳୟ ସମ୍ମିଳନୀ କକ୍ଷରେ ୩୦ ତାରିଖ ମଙ୍ଗଳବାର ଦିନ ୧୨.୩୦ ଟା ବେଳେ ଏକ ଜରୁରୀକାଳୀନ ବୈଠକ ଓ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇଯାଇଛି ।ଓଡ଼ିଶା ମେଡିକାଲ ସର୍ଭିସ ଏସୋସିଏଶନ (ଓମସା) ର ନିଷ୍ପତ୍ତି କ୍ରମେ ସାରା ଓଡ଼ିଶାରେ ଆଜିଠୁ ୧ ଜୁଲାଇରୁ ୧୦ ଦଫା ଦାବୀ ନେଇ ଡାକ୍ତର ମାନେ କାର୍ଯ୍ୟବନ୍ଦ ଆନ୍ଦୋଳନ କରିବେ । ସରକାର ତାଙ୍କର ୧୦ ଦଫା ଦାବୀ ପୂରଣ କରି ନ ଥିବାରୁ ସେମାନେ ଏହି ଆନ୍ଦୋଳନ ପାଇଁ ନିଷ୍ପତି ନେଇଥିବା ସାମ୍ୱାଦିକ ସମ୍ମିଳନୀରେ ସୂଚନା ଦେଇଛି ସଂଘ । ଏହି କ୍ରମରେ ସୁବର୍ଣ୍ଣପୁର ଜିଲ୍ଲାରେ ମଧ୍ୟ ୧ ଜୁଲାଇ (ବୁଧବାର) ସମସ୍ତ ସରକାରୀ ଡାକ୍ତରଖାନାରେ ମେଡିକାଲ ସେବା ବନ୍ଦ ରହିବ ବୋଲି ଓମସା ସୋନପୁର ଶାଖା ନିଷ୍ପତ୍ତି ନେଇଛି । ସଂଘର ଜିଲ୍ଲା ସାଧାରଣ ସମ୍ପାଦକ ଡା. ମାନସ ନାଏକ ତାଙ୍କ ଦାବୀ ପ୍ରମୁଖ ଉପସ୍ଥାପନ କରି କହିଥିଲେ ଯେ 
ସମସ୍ତ ସରକାରୀ ଡାକ୍ତରଖାନାରେ ଡାକ୍ତର ସୁରକ୍ଷା ଆଇନକୁ କଡାକଡି ଲାଗୁ କରିବା, ଡାକ୍ତରମାନଙ୍କୁ କେନ୍ଦ୍ରୀୟ ହାରରେ ଦରମା ପ୍ରଦାନ କରିବା, ଖାଲି ପଡିଥିବା ଡାକ୍ତର ପଦବୀ ତୁରନ୍ତ ପୂରଣ କରିବା ଓ ଅତିରିକ୍ତ କାର୍ଯ୍ୟଭାର ହ୍ରାସ କରିବା, ଜରୁରୀକାଳୀନ ଓ ରାତ୍ରିକାଳୀନ ଡ୍ୟୁଟି ଭତ୍ତା ବୃଦ୍ଧି କରିବା ଇତ୍ଯାଦି ଦାବୀ ପୂରଣ ପାଇଁ ସଂଘ ଦାବି କରୁଛି। ଏ ନେଇ ସଂଘ ପକ୍ଷରୁ ୧ ବର୍ଷ ଉପରେ ହେବ ସଚିବଙ୍କ ସହିତ ପର୍ଯ୍ୟାୟରେ ଆଲୋଚନା ହୋଇଆସୁଛି କିନ୍ତୁ ସରକାର ଆଜି ପର୍ଯ୍ୟନ୍ତ ଗୋଟିଏ ବି ଦାବି ପୂରଣ କରିନାହାନ୍ତି । ସୁବର୍ଣ୍ଣପୁର ଜିଲାରେ ପ୍ରାୟ ୯୦ରୁ ଊର୍ଦ୍ଧ ଡାକ୍ତର ଏହି ଆନ୍ଦୋଳନରେ ସାମିଲ ହେବେ ବୋଲି ସୂଚନା ଦେଇଥିଲେ । ଏହି ସମ୍ମିଳନୀରେ ଡା. ରମେଶ ଚନ୍ଦ୍ର ସ୍ବାଇଁ, ଡା. ନନ୍ଦ କିଶୋର ନାଏକ, ଆଶୁତୋଷ ମିଶ୍ର, ଆଦିତ୍ୟ କିପ୍ଲୋ, ମାନସ ଦାଶ, ରଶ୍ମି ରଞ୍ଜନ ହୋତା, ପୂଜାଶ୍ରୀ ମିଶ୍ର, ସମ୍ବିତ କୁମାର ମହାନ୍ତି, ସନ୍ତୋଷ ବିଭାର, ମାନସ ଦାଶ ପ୍ରମୁଖ ଉପସ୍ଥିତ ଥିଲେ ।