04-Jan-2024

ନୂଆପଡ଼ା (ଡୋଲେସ୍ବର ଵାଗ )
ଅନେକ ବର୍ଷ ତଳେ ତିଆରି ହୋଇ ଲୋକ ଯିବା ଆସିବା କରୁଥିବା ରାସ୍ତାକୁ ଆଜି ପ୍ରଶାସନ ବନ୍ଦ୍ କରିବାରେ ସଫଳ । ନୂଆପଡ଼ା ଜିଲ୍ଲା ବୋଡ଼େନ ବ୍ଲକର ରୋକାଲ ହାଇ ସ୍କୁଲ ପରିସର ଭିତର ଦେଇ ମୁଖ୍ୟ ରାସ୍ତା ଠାରୁ ମଝିଆ ପଡ଼ାକୁ ଏକ ରାସ୍ତା ସଂଯୋଗ କରୁଥିଲା କିନ୍ତୁ ସେହି ବିଦ୍ୟାଳୟ ଅସୁରକ୍ଷିତ ମନେ କରି  ବିଦ୍ୟାଳୟ ପଛ ପଟେ ପାଚେରୀ ନିର୍ମାଣ କରିବାକୁ ପ୍ରଶାସନ କୁ ବାଧ୍ୟ ହେବାକୁ ପଡ଼ିଲା ।ଏସବୁ ପାଇଁ ମଝିଆ ପଡ଼ାର ଲୋକ ବାରମ୍ବାର ବିରୋଧ କରିଆସୁଥିବାରୁ ଦୁଇ ମାସ ତଳେ ବିଡିଓ ,ତହସିଲଦାର ଏବଂ ରାଜସ୍ବ ନିରୀକ୍ଷକ ବିଦ୍ୟାଳୟକୁ ଆସି ଲୋକମାନଙ୍କ ସହିତ ଆଲୋଚନା କରି ବିଦ୍ୟାଳୟର ଦକ୍ଷିଣ ପାର୍ଶ୍ଵରେ ଏକ ମୁରୁମ ରାସ୍ତା ନିର୍ମାଣ କଲେ ଲୋକଙ୍କ ଯିବା ଆସିବା ପାଇଁ ହେଲେ ଲୋକ କହନ୍ତି ସେହି ରାସ୍ତା ପାର୍ଶ୍ବରେ ଗ୍ରାମ ଦେବା ଦେବୀ ପୀଠ ଏବଂ ନିକଟରେ ଶ୍ମଶାନ ଥିବାରୁ ସେହି ରାସ୍ତାରେ ଯିବେ ନାହିଁ ।ତେଣୁ ଏହି ବିଦ୍ୟାଳୟ ଭିତର ଦେଇ ଯାଉଥିବା ରାସ୍ତାକୁ ବନ୍ଦ ନ କରିବାକୁ ପ୍ରଶାସନ କୁ ଦାବି କରିଥିଲେ ।ପାଚେରୀ ନିର୍ମାଣ କଲେ ବିରୋଧ କରିବେ ବୋଲି କହିଥିଲେ ଓ ତାଙ୍କ କଥାରେ ଅଟଳ ରହିଲେ।ବିଦ୍ୟାଳୟର ସୁରକ୍ଷା ଦୃଷ୍ଟିରୁ ଆଜି ଜିଲ୍ଲାପାଳ ଓ ଜିଲ୍ଲା ପ୍ରକଳ୍ପ ନିର୍ଦ୍ଦେଶକଙ୍କ ନିର୍ଦ୍ଦେଶକ୍ରମେ ଏ ପି ଡି ଯୋଗେଶ୍ୱର ମାଝୀ,ବିଡିଓ ପ୍ରିୟରଞ୍ଜନ କୁମାର,ତହସିଲଦାର ସରିତା ଗୁପ୍ତା,ରାଜସ୍ବ ନିରୀକ୍ଷକ କିରଣ ସାହୁ,ସହକାରୀ ନିର୍ବାହୀ ଯନ୍ତ୍ରୀ ଆଶୁତୋଷ ରାଉତ,କନିଷ୍ଠ ଯନ୍ତ୍ରୀ ସଂଗ୍ରାମ କେଶରୀ ପରିଡ଼ା,ପୋଲିସ ଏସ ଆଇ ପର୍ଶୁରାମ ଛତ୍ରିଆ,ଏସ ଆଇ କେଦାର ମାଝୀ,ଏସ ଆଇ ସୁରତ ମାଝୀ,ଠିକାଦାର ତାପସ ପଟ୍ଟନାୟକ ଏବଂ ଅନେକ ପୋଲିସ ଷ୍ଟାଫଙ୍କ ଉପସ୍ଥିତିରେ ବିଦ୍ୟାଳୟ ଗେଟ୍ ଓ ପଛପଟ ପାଚେରୀ ନିର୍ମାଣ କାର୍ଯ୍ୟ ଆରମ୍ଭ କରାଯାଇଥିଲା ।ଏସବୁକୁ ବିରୋଧ କରିଥିଲେ ମଝିଆ ପଡ଼ାର ବିଭିନ୍ନ ସ୍ବୟଂ ସହାୟିକା ଗୋଷ୍ଠୀ ଯଥା ଅନକା ମୁଡ଼ିଏନ ,ସମଲେଶ୍ଵରୀ,ବସ୍ତ୍ରାୟଣି,ମା ତୁଳସା,ମା ଗଙ୍ଗାଦି ତଥା ପଡ଼ାର ଲୋକମାନେ ।ଉପସ୍ଥିତ ସମସ୍ତ ଅଧିକାରୀ ବୁଝାଇଥିଲେ ସମସ୍ତଙ୍କ ପିଲାଙ୍କ ଭବିଷ୍ୟତ ପାଇଁ ।ତଥାପି ଲୋକମାନେ ମୁଖ୍ୟ ରାସ୍ତାକୁ ଅବରୋଧ କରି ରଖିଲେ ଅପରାହ୍ନ ୪  ଟା ପର୍ଯ୍ୟନ୍ତ ।ଏପଟେ ଅବରୋଧ ଓ ବିରୋଧ ଚାଲୁଥାଏ ପୁଣି ସେପଟେ ପ୍ରଶାସନ ଦ୍ଵାରା ନିର୍ମାଣ କାର୍ଯ୍ୟ ନିୟମିତ ଚାଲୁଥାଏ ।ପରେ ଏଡିସନଲ ଏସ ପି ଇନ୍ଦ୍ରମଣି ବେହେରା ,ଏସ ଡି ପି ଓ ଅରୂପ ଅଭିଷେକ ବେହେରା ଓ ଆଇ ଆଇ ସି ଗୋବିନ୍ଦ ମାଝୀ ପହଞ୍ଚିଥିଲେ ।ସମସ୍ତ ଅଧିକାରୀ ଲୋକଙ୍କ ସହ  ଆଲୋଚନା କରି ନିର୍ମାଣ କାର୍ଯ୍ୟରେ ବାଧା ନ ଦେବାକୁ ଅନୁରୋଧ କରିଥିଲେ ।ଆଇନକୁ ହାତକୁ ନ ନେଇ ନିୟମ ପାଳନ କରିବା ପାଇଁ ମଧ୍ୟ ଅନୁରୋଧ କରିଥିଲେ ।