16-Dec-2020

ଗୋଟିଏ ପଟେ ପାରିବାରିକ ଜଞ୍ଜାଳ, ଅନ୍ୟପଟେ ନିଜର ବୃତ୍ତିଗତ ବ୍ୟସ୍ତତା ଏବଂ ଏହାରି ଭିତରେ ନିଜର ଲେଖନୀ ମୂନକୁ ବେଶ କ୍ରିୟାଶୀଳ କରିପାରିଥିବା ଜଣେ ସାହିତ୍ୟ ଅନୁରାଗୀ କବୟିତ୍ରୀ ହେଉଛନ୍ତି ସୁନ୍ଦରଗଡ଼ର ଡ. ମମତା ପ୍ରିୟଦର୍ଶିନୀ ସାହୁ ।  ସୁନ୍ଦରଗଡ଼ର ଝରିଆପାଲି ଗାଁ ରେ ଜନ୍ମଗ୍ରହଣ କରିଥିବା ମମତା ସେହି ସୁନ୍ଦରଗଡ଼ ଜିଲ୍ଲାକୁ ନିଜର କର୍ମଭୂମି ଭାବରେ ବାଛି ନେଇଛନ୍ତି । ପିତା ଦେବରାଜ ସାହୁ ଓ ମାତା ଗୀତାରାଣୀ ସାହୁଙ୍କ ଆଦର୍ଶରେ ଅନୁପ୍ରାଣିତ ମମତାଙ୍କ ଲେଖନୀ  ଉଭୟ ଗଳ୍ପ, କବିତା ଓ ପ୍ରବନ୍ଧ କ୍ଷେତ୍ରରେ ବେଶ ଗତିଶୀଳ । ସାହିତ୍ୟକୁ ନେଇ ମମତାଙ୍କ ରହିଛି ମଧ୍ୟରେ ଅନେକ  ସପ୍ନ । ସଂପ୍ରତି ସୁନ୍ଦରଗଡ଼ର ସରକାରୀ(ଏସ୍‌ଏସ୍‌ଡି)ଏଚ୍‌ଏସ୍‌ଏସ୍ ଯୁକ୍ତ ଦୁଇ ମହାବିଦ୍ୟାଳୟରେ ଓଡ଼ିଆ ଅଧ୍ୟାପିକା ଭାବରେ କାମ କରୁଥିବା ଏହି କବୟିତ୍ରୀଙ୍କ ଲେଖନୀରେ ରହିଛି ସମାଜ ପାଇଁ କିଛି ବାର୍ତ୍ତା । ସବୁ ବର୍ଗର ଲୋକେ ପଢ଼ିପାରିବା ଓ ବୁଝିପାରିବା ଭଳି ସରଳ ଭାଷାରେ କବୟିତ୍ର ମମତା ପ୍ରିୟଦର୍ଶିନୀ ନିଜର ସହିତ୍ୟ ସଜର୍ନା କରି  ସାହିତ୍ୟ ଜଗତରେ ନିଜର ଏକ ସ୍ୱତନ୍ତ୍ର ସ୍ଥାନ ସୃଷ୍ଟି କରି ପାରିଛନ୍ତି । କବୟିତ୍ରୀଙ୍କ  ଲିଖିତ ସମାଲୋଚନାମୂଳକ ପ୍ରବନ୍ଧ ଗ୍ରନ୍ଥ ‘ସୃଜନ ଓ ସମୀକ୍ଷା’  ପ୍ରକାଶିତ ହୋଇ ସାରିଛି । ନିଜର ପ୍ରତିଭା ପାଇଁ ମମତାଙ୍କୁ ରାଜ୍ୟ ତଥା ଜିଲ୍ଲାର ବିଭିନ୍ନ ସାହିତ୍ୟ ଓ ସାମାଜିକ ଅନୁଷ୍ଠାନ ପକ୍ଷରୁ ସମ୍ବର୍ଦ୍ଧିତ କରାଯାଇଛି । ୧୯୯୬ରେ ଶ୍ରେଷ୍ଠ ଗାଳ୍ପିକ ସମ୍ମାନ, ପୂଣ୍ୟ ଉତ୍କଳ ସମ୍ମାନ, ନିଶିଗନ୍ଧା ସାହିତ୍ୟ ସମ୍ମାନ, ୨ଠଠ୪ରେ ଭରତ ଚନ୍ଦ୍ର ସ୍ମୃତି ପୁରସ୍କାର ଏବଂ ୨ଠ୧୭ ମସିହାରେ ବେଙ୍ଗଲୋର ଡ. ସର୍ବପଲ୍ଲୀ ରାଧାକ୍ରିଷ୍ଣ ଇନ୍‌ଷ୍ଟିଚ୍ୟୁଟ୍‌ରୁ ମର୍ଯ୍ୟାଦାଜନକ ଡି.ଲିଟ୍ ସମ୍ମାନ ପାଇଛନ୍ତି ମମତା । ସେହିପରି ୨ଠ୧୯ ମସିହାରେ ଇଭେଣ୍ଟସ୍ ପବ୍ଲିକେସନ ପକ୍ଷରୁ ମମତା ଶ୍ରେଷ୍ଠ କବୟିତ୍ରୀ ର ସମ୍ମାନ ପାଇଥିବା ବେଳେ ଏହି ବର୍ଷ ନୂଆଦିଲ୍ଲୀରୁ ଆଦର୍ଶ ଶିକ୍ଷୟିତ୍ରୀର ସମ୍ମାନ ମଧ୍ୟ ଗ୍ରହଣ କରିଛନ୍ତି ମମତା ।  ମମତାଙ୍କ ସାରସ୍ୱତ ଯାତ୍ରା  ଓ ବୃତ୍ତିଗତ ଜୀବନ ସୁଗମ ଓ ସୁଖମୟ ହେଉ, ପ୍ରେରଣା ପରିବାର ତରଫରୁ ମାଁ ସମଲେଶ୍ୱରୀଙ୍କ ଠାରେ କାମନା । 
  ସାହିତ୍ୟରେ ବ୍ରତୀ ତଥା ସପ୍ନ ଓ ସମ୍ଭାବନାର ସ୍ୱର ମମତା ପ୍ରିୟଦର୍ଶିନୀଙ୍କ ପରି ଜଣେ କବୟିତ୍ରୀଙ୍କ ଠାରୁ ଆସନ୍ତୁ ଶୁଣିବା ଏକ ଭିନ୍ନ ସ୍ୱାଦର କବିତା ।