17-Nov-2023

ବଲାଙ୍ଗିର(ପ୍ରେରଣା ଖବର ): ସରକାର ଧାନକିଣା ଓ କଷ୍ଟମମିଲିଂରେ ସ୍ୱଚ୍ଛତା ଆଣିବାକୁ ବିଭିନ୍ନ ନିୟମକାନୁନ କରୁଛନ୍ତି । କିନ୍ତୁ ଏହାକୁ ଲାଗୁ କରିବାକୁ ଥିବା ବାବୁମାନେ ଅସାଧୁ ବ୍ୟବସାୟୀଙ୍କ ସହିତ ମିଶି ଚଞ୍ଚକତା କରୁଥିବା ଲକ୍ଷ୍ୟ କରାଯାଇଛି । ସରକାରଙ୍କ ଧାନକିଣା ଓ ଏହାକୁ କଷ୍ଟମମିଲିଂ ପାଇଁ ମିଲର୍ସମାନଙ୍କୁ ଦେବାରେ ଅନେକ ନିୟମ ରହିଛି । ସେଥିରେ ଯେଉଁମିଲ କଷ୍ଟମମିଲିଂରେ ଭାଗ ନେବେ ସେହି ମିଲର ସ୍ୱତନ୍ତ୍ର ନିଜସ୍ୱ ଜମିରେ ମିଲଥିବା ଓ ଏହାର ନିଜସ୍ୱ ଏକ ବିଦ୍ୟୁତ କନଜ୍ୟୁମର ନମ୍ବର ରହିଥିବ । ଏହା ସହିତ ପ୍ରଦୁଷଣ ନିୟନ୍ତ୍ରଣ ବୋର୍ଡର ସାର୍ଟିଫିକେଟ,ଆରଏମସିର ପଞ୍ଜିକରଣ ଇତ୍ୟାଦି ରହିଥିବ । କିନ୍ତୁ ବଲାଙ୍ଗୀର ଜିଲ୍ଲାରେ ବିଚିତ୍ର ନିୟମ ଚାଲିଛି । ଜଣେ ମିଲର୍ସଙ୍କ ଗୋଟିଏ ବିଦ୍ୟୁତ କନଜ୍ୟୁମର ନମ୍ବରରେ ଅକାଧିକ ରାଇସମିଲ ଚାଲୁଥିବା ଦର୍ଶାଯାଇଛି । ଏପରିକି ଉକ୍ତ ମିଲର୍ସ ଚଳିତବର୍ଷ କଷ୍ଟମମିଲିଂରେ ସାମିଲ ହେବାକୁ କରିଥିବା ଆବେଦନକୁ ଯୋଗାଣ ବିଭାଗ ଗ୍ରହଣ କରି ତାକୁ ଧାନଦେବାକୁ ତାଲିକାଭୁକ୍ତ କରିଛି । ଏହି କାରବାରରେ ଯୋଗାଣ ବିଭାଗ, ଜିଲ୍ଲାପ୍ରଶାସନ ଓ ମିଲର୍ସଙ୍କ ମଧ୍ୟରେ ଏକ ବଡ ଡିଲ୍ ହୋଇଥିବା ଆଲୋଚନା ହେଉଛି ।  ଅନୁସନ୍ଧାନରୁ ଜଣାପଡିଛି ଯେ,ବଲାଙ୍ଗୀର ଜିଲ୍ଲାର ବେଲପଡା ବ୍ଲକର ସଲଣ୍ଡି ମୌଜାରେ ଦୀପକ ଅଗ୍ରୱାଲଙ୍କର ୧୯୯୮ ମସିହାରୁ ରାଇସମିଲ ରହିଛି । ଶ୍ରୀଶ୍ୟାମଜୀ ପେଡିପ୍ରୋସେସିଂ ପ୍ରା.ଲିଃ ନାମକ ଉକ୍ତ (ଉଷୁନା)ରାଇସମିଲର ବିଦ୍ୟୁତ କନଜ୍ୟୁମର ନମ୍ବର (୯୧୨୦୦୦୦୦୦୦୨୨) ରହିଥିବା ବେଳେ ଚଳିତବର୍ଷ ଉକ୍ତ କନଜ୍ୟୁମର ନମ୍ବର ଦର୍ଶାଇ ଆଉ ଏକ ଅରୁଆ ରାଇସମିଲ କରିଥିବା କହି କଷ୍ଟମମିଲିଂରେ ସାମିଲ ହେବା ପାଇଁ ଆବେଦନ କରିଛନ୍ତି । ଠିକ ସେହିପରି  ସେହି କ୍ୟାମ୍ପସରେ ୨୦୨୧ ମସିହାରୁ ଆଉ ଏକ ଉଷୁନା ଚାଉଳର  ରାଧେଗୋବିନ୍ଦ ଫୁଡପ୍ରଡକ୍ଟ ରାଇସମିଲ କରାଯାଇଛି । ଏହି ରାଇସମିଲର ବିଦ୍ୟତୁ କନଜ୍ୟୁମର ନମ୍ବର (୯୧୨୦୦୦୦୦୦୦୯୧) ରହିଛି । ସେହି ରାଇସମିଲ ୨୦୨୨-୨୩ରେ ଯୋଗାଣ ନୀଗମରୁ ଧାନ ନେଇଥିଲେ । କିନ୍ତୁ ସେହି ସମାନ ବିଦ୍ୟୁ କନଜ୍ୟୁମର ନମ୍ବର ଦର୍ଶାଇ ଆଉ ଏକ ଅରୁଆ ରାଇସମିଲ କରିଥିବା କହି ଯୋଗାଣ ନିଗମରୁ ଧାନ ନେବାକୁ ଆବେଦନ କରାଯାଇଛି । ତେବେ ସବୁଠୁ ଆଶ୍ଚର୍ଯ୍ୟର ବିଷୟ ହେଲା ଯୋଗାଣ ନିଗମର ଅଧିକାରୀଙ୍କ ସୁପାରିଶରେ ଜିଲ୍ଲାପାଳ ସେହି ରାଇସମିଲମାନଙ୍କୁ ଚଳିତବର୍ଷର କଷ୍ଟମମିଲିଂରେ ସାମିଲ କରିବାକୁ ଅନୁମୋଦନ କରିଛନ୍ତି । ସରକାରଙ୍କ ନୀୟମ ରହିଛି କଷ୍ଟମମିଲିଂରେ ସାମିଲ ହେବା ପୂର୍ବରୁ ମିଲଗୁଡିକର ମିଲିଂ କାପାସିଟି, ଫିଜିବିଲିଟି, କାପାସିଟି, ବିଦ୍ୟୁତ କନଜ୍ୟୁମର ନମ୍ବର, ପଦୂଷଣନିୟନ୍ତ୍ରଣ ବୋର୍ଡର ଅନୁମତି, ଆରଏମସିର ସାର୍ଟିଫିକେଟ ଇତ୍ୟାଦି ଯାଞ୍ଚ କରି ଉପଖଣ୍ଡ ଯୋଗାଣ ଅଧିକାରୀ ଓ ଯୋଗାଣ ନୀରିକ୍ଷକ ରିପୋର୍ଟ ଦେଇଥାନ୍ତି । କିନ୍ତୁ ଏହି ମିଲମାନଙ୍କ କ୍ଷେତ୍ରରେ ତାହା କରାଯାଇ ନାହିଁ । ବେଲପଡା ତହସିଲ ଅନ୍ତର୍ଗତ ସଲଣ୍ଡି ମୌଜାର ଗୋଟିଏ କ୍ୟାମ୍ପସରେ ଦୁଇଟି ବିଦ୍ୟୁତ କନଜ୍ୟୁମର ନମ୍ବରରେ ୪ଟି ରାଇସମିଲ ଚଳାଯାଉଥିବା ଦର୍ଶାଇଛି । ନୀୟମ ରହିଛି  ଗୋଟିଏ ମିଲପାଇଁ ଗୋଟିଏ କନଜ୍ୟୁମର ନମ୍ବର ରହିଥିବ । କିନ୍ତୁ ଏଠାରେ ସେହି ନୀୟମର ଉଲଂଘନ କରାଯାଇ ଯୋଗାଣ ନୀଗମରୁ କଷ୍ଟମମିଲିଂରେ ଧାନ ନେବାକୁ ଚଞ୍ଚକତା କରାଯାଇଥିବା ଅଭିଯୋଗ ଉଠୁଛି । ତେବେ ଜିଲ୍ଲାପାଳ ଏ ବିଷୟରେ ବଲାଙ୍ଗୀର ଜିଲ୍ଲାପାଳ ଚଞ୍ଚଳ ରାଣାଙ୍କୁ ଯୋଗାଯୋଗ କରିବାରୁ ସେ କୌଣସି ଉତ୍ତର ରଖିଲେ ନାହିଁ । ଜିଲ୍ଲା ମୁଖ୍ୟ ଯୋଗାଣ ଅଧିକାରୀ ଜି.ପ୍ରଭାକର ପାତ୍ରଙ୍କୁ ଏନେଇ ପଚାରିବାରୁ ଗୋଟିଏ କ୍ୟାମ୍ପସରେ ୪ଟି ରାଇସମିଲ ଥିବା ବିଷୟରେ ସେ ଜାଣିନାହାଁନ୍ତି । କିନ୍ତୁ ଗୋଟିଏ କ୍ୟାମ୍ପସରେ ଗୋଟିଏ ଉଷୁନା ଓ ଗୋଟିଏ ଅରୁଆ ରାଇସମିଲ ଗୋଟିଏ ବିଦ୍ୟୁତ କନଜ୍ୟୁମର ରେଜି ଷ୍ଟ୍ରେସନରେ ରହିପାରିବ ନାହିଁଁ ବୋଲି କିଛି ଉଲ୍ଲେଖ ନାହିଁ ବୋଲି କହିଛନ୍ତି । ଠିକ ସେହିପରି ରାଇସମିଲର ମାଲିକ ଦୀପକ ଅଗ୍ରୱାଲଙ୍କୁ ପଚାରିବାରୁ ସମାନ ନାମରେ ଅରୁଆ ଓ ଉଷୁନା ମିଲ ଗୋଟିଏ କ୍ୟାମ୍ପସରେ ରହିପାରିବ । ଅମ ଜିଲ୍ଲାରେ ଅଅମ ପୂର୍ବରୁ ଓ ପରେ ମଧ୍ୟ ଅନ୍ୟମାନଙ୍କର ଏଭଳି କରାଯାଇଛି ବୋଲି କହିଛନ୍ତି । ଏହି ଘଟଣାର ଏକ ଉଚ୍ଚସ୍ତରୀୟ ତଦନ୍ତ କରାଗଲେ ଅନେକ ରହସ୍ୟ ଫିଟିବ ବୋଲି ଦାବି ହେଉଛି ।