12-Sep-2023

ଧମା-( ସଂଜୀବକୁମାରପାଣିଗ୍ରାହୀ)  ଆଜି ମା’ ଝାଡେଶ୍ୱରୀ ମହାବିଦ୍ୟାଳୟର ୩୦ତମ ପ୍ରତିଷ୍ଠା ଦିବସ ମହାବିଦ୍ୟାଳୟ ପରିସରରେ ପାଳିତ ହୋଇଯାଇଛି। ମହାବିଦ୍ୟାଳୟର ଯୁକ୍ତ ଦୁଇ ସ୍ରୋତର ଅଧ୍ୟକ୍ଷ ଅଶୋକ କୁମାର ପୁରୋହିତଙ୍କ ସଭାପତିତ୍ୱରେ ଆୟୋଜିତ ଏହି ସଭାରେ ମୁଖ୍ୟବକ୍ତା ଭାବରେ ଯୋଗଦେଇ ବିଶିଷ୍ଟ ସାହିତ୍ୟିକ ଡ. ଲକ୍ଷ୍ମୀନାରାୟଣ ପାଣିଗ୍ରାହୀ କହିଥିଲେ ଯେ, ଆମ ସଭିଙ୍କ ଭିତରେ ଏକ ସ୍ପର୍ଶକାତର ସମ୍ବେଦନଶୀଳତାର ଭାବ ରହିଥାଏ ତାହା ଆମର ଉପଲବ୍ଧି ହେଲେ ଆମେ ସାହିତ୍ଯ ସହ ଅନ୍ୟାନ୍ୟ  ସର୍ଜନା କରିବାକୁ ମନନଶୀଳ ହୋଇଥାଉ। ତେଣୁ ପ୍ରତ୍ୟେକ ଶିକ୍ଷାର୍ଥୀ ନିଜକୁ ନିଜେ ଆକଳନ କରି ମୂଲ୍ୟାୟନ କରି ଶିଖିବା ଉଚିତ। ନିଜକୁ ଆକଳନ କରି ନିଜ ପ୍ରତିଭାକୁ ଜାଣିବା ଆମକୁ ବିନାଶକୁ ମଧ୍ୟ ଦୃଷ୍ଟିରେ ରଖି ଆଗକୁ ବଢିବାକୁ ହେବ। ମୃତ୍ୟୁକୁ ନଜାଣିଲେ ଜୀବନର ମହତ୍ତ୍ୱକୁ ହୃଦୟଙ୍ଗମ କରି ହେବନାହିଁ। ତେଣୁ କୌଣସି ବିନାଶ ବା ଅସଫଳତାକୁ ନେଇ ଆମେ ଭୀତତ୍ରସ୍ତ ହେବା ଅନୁଚିତ, କାରଣ ସମସ୍ତ ଅସଫଳତାକୁ ଜୟ କରିବାର ଶକ୍ତି ଆମ ଭିତରେ ଅଛି। ଯିଏ ଏହି ଶକ୍ତିର ସଫଳ ପ୍ରୟୋଗ କରେ ସେ ଅମୃତତ୍ୱ ଲାଭ କରିବାକୁ ସମର୍ଥ ହୁଏ। ତେଣୁ ଆମକୁ ସବୁ ଦିଗରେ ନିଜର ଜ୍ଞାନର ଆହୋରଣର ପରିସରକୁ ବୃଦ୍ଧି କରିବା ଉଚିତ ବୋଲି ସେ ପରାମର୍ଶ ଦେଇଥିଲେ। ଅଧ୍ଯାପକ ସତ୍ୟନାରାୟଣ ଦାଶ ଅତିଥି ପରିଚୟ ଓ ସ୍ୱାଗତ ଭାଷଣ  ପ୍ରଦାନ କରିଥିବା ବେଳେ ଅଧ୍ୟାପିକା ସୁଶ୍ରୀ ପାଢୀ ଅତିଥିମାନଙ୍କୁ ମଞ୍ଚକୁ ଆମନ୍ତ୍ରଣ କରିଥିଲେ। ଅଧ୍ଯାପକ ପଣ୍ଡିତ ବ୍ୟାସଦେବ ପଣ୍ଡା ବେଦମନ୍ତ୍ର ପାଠ କରିଥିଲେ। ଅଧ୍ଯାପିକା ସୁଦିପ୍ତା ଦାଶ ଓ ମୌସୁମୀ ଷଢଙ୍ଗୀଙ୍କ ସଂଯୋଜନାରେ ଛାତ୍ରୀମାନେ ପ୍ରାରମ୍ଭିକ ସଙ୍ଗୀତ ପରିବେଷଣ କରିଥିଲେ।ଅଧ୍ଯାପକ ରବିନ୍ଦ୍ରନାରାୟଣ ଠାକୁରଙ୍କ ସଂଯୋଜନାରେ ଅତିଥିମାନଙ୍କୁ ସମ୍ବର୍ଦ୍ଧନା ଜ୍ଞାପନ ଓ ପୁରସ୍କାର ବିତରଣୀ କାର୍ଯ୍ଯକ୍ରମ ଆୟୋଜିତ ହୋଇଥିଲା। ଅଧ୍ଯାପକ ବଳଦେବ ମହାକୁର ଧନ୍ୟବାଦ ଅର୍ପଣ କରିଥିଲେ। ସଭାରେ ପୂର୍ବତନ ପରିଚାଳନା ପରିଷଦର ସଭାପତି ଦିଲୀପ କୁମାର ମହାପାତ୍ର,ଉପସଭାପତି ପରମାନନ୍ଦ ସିଟ,ସମ୍ପାଦକ ରବିନ୍ଦ୍ର ପୃଷ୍ଟିଙ୍କ ସମେତ ଦୂର୍ଯ୍ୟୋଧନ ସେଠ,ତ୍ରିବିକ୍ରମ ମିର୍ଦ୍ଧା,ଗୋପୀରଞନ ବେହରା ଏବଂ ଯୁକ୍ତତିନ ସ୍ରୋତର ଅଧ୍ୟକ୍ଷ ଅନୀଳ ପ୍ରଧାନ ପ୍ରମୁଖ ମଞ୍ଚରେ ଉପସ୍ଥିତ ରହି ସେମାନଙ୍କ ବକ୍ତବ୍ୟ ମାଧ୍ଯମରେ ଶୁଭେଚ୍ଛା ପ୍ରଦାନ କରିଥିଲେ।ରବିଶଙ୍କର ହୋତା,ଲମ୍ବୋଦର ପାଢୀ,ଅନ୍ତର୍ଯ୍ୟାମୀ ମହାକୁର,ନିର୍ମଳ ତ୍ରିପାଠୀ,ସଂଗ୍ରାମ କେଶରୀ ମିଶ୍ର,ବନୋଜ କୁମାର ସାହୁ,ମିନତି ଦାଶ,ସଂସାର ପଧାନ,ପ୍ରମୋଦ ଦେହେରି ଯଦୁମଣି ସାହୁ,ଜୀବର୍ଦ୍ଧନ ସେଠ,ଶୁଶୃତ ଷଡଙ୍ଗୀ,ଚୈତନ୍ଯ ସେନାପତି ପ୍ରମୁଖ କାର୍ଯକ୍ରମରେ ସହଯୋଗ କରିଥିଲେ। ସଭା ପୂର୍ବରୁ ନିକଟ ଅତୀତରେ ଇହଲୀଳା ସମ୍ଭରଣ କରିଥିବା ମହାବିଦ୍ୟାଳୟର ପୂର୍ବତନ ଯୁକ୍ତତିନ ପରିଚାଳନା ପରିଷଦର ସଭାପତି ତଥା ସମାଜସେବୀ ସୁରଞନ ମହାପାତ୍ରଙ୍କ ଅମର ଆତ୍ମାର ସଦ୍‌ଗତି କାମନା କରି ନିରବ ପ୍ରାର୍ଥନା କରାଯାଇଥିଲା। ପ୍ରତିଷ୍ଠା ଦିବସ ଉପଲକ୍ଷେ ଆୟୋଜିତ ହୋଇଥିବା ଓଡିଆ ବକ୍ତୃତା ପ୍ରତିଯୋଗିତାରେ ଯୁକ୍ତଦୁଇ ବର୍ଗରେ ଶ୍ୟାମ ମେହେର,ରାକେଶ ମେହେର, ଲକ୍ଷ୍ମୀପ୍ରିୟା ରଣା ଏବଂ ଯୁକ୍ତତିନ ବର୍ଗରେ ସ୍ୱରାଜ ପାଣିଗ୍ରାହୀ,ସ୍ମୃତିରେଖା ପୋଢ ଓ  ଦୀପାଞଳି ଖମାରି ଯଥାକ୍ରମେ ପ୍ରଥମ ଦ୍ୱିତୀୟ ଓ ତୃତୀୟ ସ୍ଥାନ ଅଧିକାର କରି ଅତିଥିମାନଙ୍କ ଦ୍ବାରା ପୁରସ୍କୃତ ହୋଇଥିଲେ।