12-Sep-2023

ସମ୍ବଲପୁର-(ସଂଜୀବକୁମାରପାଣିଗ୍ରାହୀ)     ଆଜି ଓଡିଶା ସାଂସ୍କୃତିକ ସମାଜ ପକ୍ଷରୁ ସମ୍ବଲପୁରର ପଞ୍ଚସଖା ଦିବସ ପାଳିତ ହୋଇଯାଇଛି। ଅନୁଷ୍ଠାନର ଉପସଭାପତି ଶିବନାରାୟଣ ପାଣିଗ୍ରାହୀଙ୍କ ଅଧ୍ୟକ୍ଷତାରେ ଆୟୋଜିତ ଏହି ସଭାରେ ବକ୍ତା ଭାବରେ ଯୋଗଦେଇ ଶିକ୍ଷାବିତ ଅରବିନ୍ଦ ମହାପାତ୍ର କହିଥିଲେ ଯେ, ସମ୍ବଲପୁରର ପଞ୍ଚସଖାଙ୍କ ବାବଦରେ ଆମ ଉତ୍ତର ପିଢି ଯେତେ ଜାଣିବା କଥା ଆମେ ସେମାନଙ୍କୁ ସେତିକି ତଥ୍ଯ ଯୋଗାଇ ପାରୁନାହୁଁ କାରଣ ଭାଷା ଆନ୍ଦୋଳନରେ ସେନାପତି ସାଜି  ଶିମଲାଯାତ୍ରା କରିଥିବା ସେହି ମହାନ ପଞ୍ଚସଖାଙ୍କ ବିଷୟରେ ଏଯାବତ୍ ପର୍ଯ୍ୟାପ୍ତ ଅନୁସଂଧାନ ଓ ଗବେଷଣା ହୋଇପାରି ନାହିଁ। ଅନ୍ୟତମ ଆଲୋଚକ ଡ. ଗୌରିଦାସ ପ୍ରଧାନ ବକ୍ତବ୍ୟରଖି କହିଲେ ଯେ,ପଞ୍ଚସଖାଙ୍କ  ପ୍ରୟାସ ରହିନଥିଲେ ସମ୍ବଲପୁର ଖଣ୍ଡରେ ଓଡିଆ ଭାଷାର ପ୍ରଚଳନ ହେବା ଅତ୍ୟନ୍ତ କଷ୍ଟକର ହୋଇଥା’ନ୍ତା। ମାତ୍ର ଯେଉଁ ମହାନ ପଞ୍ଚସଖାଙ୍କ ପାଇଁ ସମ୍ବଲପୁରେ ଓଡିଆ ଭାଷାର ପ୍ରଚଳନ ହେଲା ଓ ଯୋଉଥି ପାଇଁ ସମ୍ବଲପୁର ଓଡିଶାରେ ମିଶି ପାରିଲା ସେହି ମହାନ ମନିଷୀମାନଙ୍କ ଚର୍ଚ୍ଚା କେବଳ ସମ୍ବଲପୁର ସହର ମଧ୍ୟରେ ହିଁ ସୀମିତ ରହିଯିବା ତଥା ଏକଦା ମଧୁସୁଦନଙ୍କୁ ଭାଷା ଆନ୍ଦୋଳନରେ  ସହଯୋଗ କରିଥିବା ଏହି ଭାଷା ଆନ୍ଦୋଳନକାରୀଙ୍କୁ ରାଜ୍ୟସ୍ତରରେ  ଯଥା ସମ୍ମାନ ନମିଳିବା କ୍ଷୋଭର ବିଷୟ ବୋଲି ସେ କହିଥିଲେ। ସମ୍ପାଦକ ଡ ସିଦ୍ଧାର୍ଥ ପଣ୍ଡା ପ୍ରାରମ୍ଭିକ ସୂଚନା ପ୍ରଦାନ କରିଥିବା ବେଳେ ସହସମ୍ପାଦକ ସୁରେଖା ସାହୁ ଧନ୍ୟବାଦ ଅର୍ପଣ କରିଥିଲେ।ପ୍ରଫୁଲ୍ଲ କୁମାର ହୋତା, ଦୀନବନ୍ଧୁ ପଣ୍ଡା,ସବ୍ୟସାଚୀ ମିଶ୍ର,ଲଲିତ ମୋହନ ବେବର୍ତ୍ତା ପ୍ରମୁଖ ଏହି କାର୍ଯ୍ୟକ୍ରମରେ ସହଯୋଗ କରିଥିଲେ।