09-Sep-2023

ବରଗଡ଼:- ଶିଶୁ କିଶୋର ମାନଙ୍କୁ ଓଡ଼ିଶାର ସମୃଦ୍ଧ ସାହିତ୍ୟ ବିଶେଷ କରି ଓଡିଆ ଶିଶୁ ସାହିତ୍ୟ ଓ ପ୍ରକାଶ ପାଉଥିବା ଶିଶୁ କିଶୋର ପତ୍ର ପତ୍ରିକା ମାନଙ୍କ ସହ ପରିଚିତ କରାଇବା ତଥା ଛାତ୍ରଛାତ୍ରୀ ମାନଙ୍କ ମଧ୍ୟରେ ପୁସ୍ତକ ପଠନ ପ୍ରତି ଆଗ୍ରହ ସୃଷ୍ଟି କରାଇ ସେମାନଙ୍କୁ ପୁସ୍ତକ ମନସ୍କ କରାଇବା ଉଦ୍ଦେଶ୍ୟରେ କାର୍ଯ୍ୟରତ ଶିଶୁଶ୍ରୀ ଭ୍ରାମ୍ୟମାଣ ପାଠାଗାର ତରଫରୁ ସ୍ଥାନୀୟ ମାଷ୍ଟରଟିକ୍ରା ସ୍ଥିତ ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ ପରିସର ମଧ୍ୟରେ ୧୪୩ତମ ପିଲାଙ୍କ ପାଖରେ ପାଠାଗାର କାର୍ଯ୍ୟକ୍ରମ ଇତି ମଧ୍ୟରେ ଆୟୋଜିତ ହୋଇଯାଇଛି। 'ଶିଶୁଶ୍ରୀ' ର ସଭାପତି ମନୋରଞ୍ଜନ ମେହେରଙ୍କ ଅଧ୍ୟକ୍ଷତାରେ ଅନୁଷ୍ଠିତ

ଉକ୍ତ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗଦେଇ ବିଶିଷ୍ଟ ଚଳଚ୍ଚିତ୍ର ଅଭିନେତ୍ରୀ ତପସ୍ଵିନୀ ଗୁରୁ ପୁସ୍ତକ ପଠନର ଗୁରୁତ୍ବ ଉପରେ ପିଲାମାନଙ୍କୁ ଅବଗତ କରାଇ ପୁସ୍ତକ କେମିତି ଜୀବନର ପ୍ରତିଟି କ୍ଷେତ୍ରରେ ମନୁଷ୍ୟର ସହାୟକ ହୋଇଥାଏ ବିଭିନ୍ନ ଉଦାହରଣ ମାଧ୍ୟମରେ ବୁଝାଇଥିଲେ।  ସମ୍ମାନୀତ ଅତିଥି ଭାବେ ଯୋଗଦେଇ ଅବସର ପ୍ରାପ୍ତ ପ୍ରଧାନ ଶିକ୍ଷୟିତ୍ରୀ ରେଣୁ ଦାଶ ଶର୍ମା, ଦିବ୍ୟ କାନ୍ତି ଭୋଇ ଓ ମୀନା ପଣ୍ଡା ପୁସ୍ତକ ସବୁ ସମୟରେ ବନ୍ଧୁ ଭଳି ସାହାଯ୍ୟ କରିବା କଥା ଉଲ୍ଲେଖ କରିଥିଲେ। ଅନ୍ୟମାନଙ୍କ ମଧ୍ୟରେ ଶିକ୍ଷକ ସୀତାରାମ ମହାପାତ୍ର, ଧର୍ମେନ୍ଦ୍ର ମିଶ୍ର ଓ ଶିକ୍ଷୟିତ୍ରୀ ମାନଙ୍କ ମଧ୍ୟରୁ ଝରଣା ପାଣି, ସୁରମା ପଣ୍ଡା, ନିରୂପମା ବନଛୋର, ପଦ୍ମିନୀ ମିଶ୍ର ପ୍ରମୁଖ ଛାତ୍ର ଛାତ୍ରୀ ମାନେ ମୋବାଇଲରେ ବେଶି ସମୟ ବ୍ୟସ୍ତ ନରହି ମଝିରେ ମଝିରେ ପାଖରେ ଥିବା ପାଠାଗାରକୁ ଯାଇ ନୂଆ ନୂଆ ଉପାଦେୟ ପୁସ୍ତକ ସବୁ ପଢିବାକୁ ପରାମର୍ଶ ଦେଇଥିଲେ। ପ୍ରଦର୍ଶିତ ପୁସ୍ତକରୁ ନିଜ ପସନ୍ଦର ପୁସ୍ତକ ଚୟନ କରି, ପଠିତ ପୁସ୍ତକ ସମ୍ପର୍କରେ ବକ୍ତବ୍ୟ ପ୍ରଦାନ କରି ଛାତ୍ରଛାତ୍ରୀମାନଙ୍କ ମଧ୍ୟରୁ ଆୟୁଷ ଚିରଗୁନ, ଦେବରାଜ ବିଶି, ସଜନା ମିର୍ଲେ ଓ ସୁରଜ୍ ନାଗ ଯଥା କ୍ରମେ ପ୍ରଥମ, ଦ୍ବିତୀୟ ଓ ତୃତୀୟ ସ୍ଥାନ ଗ୍ରହଣ କରି ପୁରସ୍କୃତ ‌ହୋଇଥିଲେ। ପ୍ରାରମ୍ଭରେ 'ଶିଶୁଶ୍ରୀ' ର ଆବାହକ ଡକ୍ଟର ରବିନାରାୟଣ ସାହୁ ଉଦ୍ଦେଶ୍ୟ ଜ୍ଞାପନ କରିଥିଲେ ଓ ବିଦ୍ୟାଳୟର ପ୍ରଧାନ ଶିକ୍ଷକ ବୀରେନ୍ଦ୍ର ନାଥ କୁମାର ଧନ୍ୟବାଦ ଅର୍ପଣ କରିଥିଲେ।