14-Jul-2023

ବଲାଙ୍ଗୀର(ପ୍ରେରଣା ଖବର))-ବଲାଙ୍ଗୀର ଜିଲ୍ଲାର ମାଗୁରବେଢାରେ ନିର୍ମାଣ ଚାଲିଥିବା ଲୋୟରସୁକତେଲ ଜଳସେଚନ ପ୍ରକଲ୍ପକାମ ସରିବା ଉପରେ । ଚଳିତବର୍ଷ ଡେମରେ ପାଣି ଅଟକା ଯାଇସାରିଲାଣି । ଗାଁଗୁଡିକୁ ପାଣିପଶିବ ବୋଲି ଡେମସାଇଟର ଗ୍ରାମଗୁଡିକର ବିସ୍ଥାପିତଲୋକଙ୍କୁ ଅନ୍ୟତ୍ର ସ୍ଥାନାନ୍ତର କରାଯାଉଛି । ବିସ୍ଥାପିତଙ୍କୁ ସମସ୍ତ ପ୍ରାପ୍ୟ ନଦେଇ ତାଙ୍କୁ ଗାଁଛାଡିବାକୁ ବାଧ୍ୟ କରି ତାଙ୍କର ଘରେ ଜେସିବି ଲଗାଇ ଘର ଭାଙ୍ଗି ଦିଆଯାଉଛି । ତେବେ ଲୋକମାନେ ପୂର୍ବରୁ ବିସ୍ଥାପନକୁ ବିରୋଧ କରିଆସୁଥିଲେ ହେଁ ପୋଲିସ ଓ ପ୍ରଶାସନର ବଳ ଆଗରେ ମୁଣ୍ଡ ନୁଆଁଇଲେ । ତାଙ୍କର ପ୍ରାପ୍ୟନେଇ ଅନ୍ୟତ୍ର ଯିବାକୁ ହଁ ଭରିଲେ । ହେଲେ ଏବେ ଡେମରେ ପାଣିରଖିଲା ପରେ ପ୍ରଶାସନ ଗ୍ରାମବାସୀଙ୍କୁ ତଡିବା ଆରମ୍ଭ କରିଛି । ନୀୟମ କହୁଛି ବିସ୍ଥାପିତଙ୍କୁ ତାଙ୍କର ଉଚିତ ପ୍ରାପ୍ୟଦେଇ ତାଙ୍କୁ କଲୋନୀରେ ଥଇଥାନ କଲାପରେ ଘର ତଡିବା କଥା । ବିସ୍ଥାପିତ କଲୋନୀ ନିର୍ମାଣ କରାଇ ସେଠାରେ ଅସ୍ଥାୟୀ ଥଇଥାନଗୃହରେ ରଖାଇ ତାଙ୍କର ନିଜସ୍ୱଗୃହ ନିର୍ମାଣ କରାଇବାର ନୀୟମ ରହିଛି । ଯେଉଁ ବିସ୍ଥାପିତ କଲୋନୀରେ ଲୋକଙ୍କୁ ଯାଗା ଦିଆଯିବ ସେଠାରେ ପାନୀୟଜଳ,ବିଦ୍ୟୁତ,ଶିଶୁଙ୍କ ପାଇଁ ଅଙ୍ଗନୱାଡିକେନ୍ଦ୍ର,ସ୍କୁଲଘର,ଏଏନଏମ ସେଣ୍ଟର,କମ୍ୟୁନିଟିସେଣ୍ଟର,ପୂଜାପାଇଁ ମନ୍ଦିର ଇତ୍ୟାଦି ନିର୍ମାଣ କରାଯିବାର ନୀୟମ ରହିଛି ।

କିନ୍ତୁ ପ୍ରଶାସନ ଏବେ ଡେମରେ ପାଣି ରଖିଲାପରେ ଜଙ୍ଗଲତଳେ କେବଳ ମାଟିକୁ ହାଣି ସାମାନ୍ୟ ସମତୁଲକରି ସେଠାରେ ବିସ୍ଥାପିତଙ୍କୁ ଘରନିର୍ମାଣ କରି ରହିବାକୁ କୁହାଯାଉଛି । ପୂର୍ବରୁ ବଲାଙ୍ଗୀର ସଦାଇପାଲି,ଲର୍କିପାଲିରେ ବିସ୍ଥାପିତ କଲୋନୀ ନିର୍ମାଣ କରାଯାଇଥିôବା ବେଳେ ଏବେ ଝାଙ୍କରପାଲି,ଗେଡାବାଞ୍ଜିଛକ,ହର୍ଡାଟାଲ,ଢୁଲୁସର,କୁସମେଲ ଇତ୍ୟାଦି ଅଞ୍ଚଳରେ ବିସ୍ଥାପିତ କଲୋନୀ କରାଯାଉଛି । ବଲାଙ୍ଗୀର-ପାଟଣାଗଡ ରାସ୍ତାକଡେ ଝାଙ୍କରପାଲି ମୌଜାର ଜଙ୍ଗଲତଳେ ଗଡଶଙ୍କରଡୁଙ୍ଗୁରିପାଲିର ବିସ୍ଥାପିତ ପରିବାରଙ୍କୁ ଯାଗା ଦିଆଯାଇଛି । ପ୍ରତ୍ୟେକ ପରିବାରକୁ ୫ଡେସିମିଲ ହିସାବରେ ଜମି ଦିଆଯାଇଛି । ସେମାନେ ପାଇଥିବା ମୁଣ୍ଡପିଚ୍ଛା ସହାୟତା ଅର୍ଥରେ ଏଠାରେ ଗୃହନିର୍ମାଣ କରୁଛନ୍ତି । ଗଡଶଙ୍କର ଡୁଙ୍ଗୁରିପାଲିର ଅନେକ ପରିବାର ଆଜି ପର୍ଯ୍ୟନ୍ତ ଜମି ଓ ଗଛର ଟଙ୍କା ପାଇନାହାଁନ୍ତି । କିନ୍ତୁ ତଥାପି ସେମାନଙ୍କୁ ଘରୁ ଜବରଦସ୍ତ ତଡାଯାଇ ଏଠାରେ ଆଣି ରଖାଯାଇଛି ବୋଲି ଅଭିଯୋଗ ହେଉଛି । ତେବେ ଏଠାରେ ବିସ୍ଥାପିତଙ୍କ ପାଇଁ ପ୍ରଶାସନ ଅସ୍ଥାୟୀ ଟିଣଘର ନିର୍ମାଣ କରାଉଛି । ୧୨ଫୁଟ ଚଉଡା ଓ ୧୪ଫୁଟ ଲମ୍ବର ଏକ ଟିଣଘର କରାଯାଉଛି । ନୀୟମ ରହିଛି ଏହି ଘରପାଇଁ ତଳେ ଦଇଫୁଟର ସବବେସ କରାଯାଇ କଂକ୍ରୀଟଦେଇ ଲୁହାଏଙ୍ଗଲ ଲଗାଯିବ ଓ ଚାରିପଟେ ଟିଣ ଲଗାଯିବ । ଉପରେ ମଧ୍ୟ ଟିଣଆଜବେଷ୍ଟସ ଲଗାଯିବ । କିନ୍ତୁ ଝାଙ୍କରପାଲି ବିସ୍ଥାପିତ କୋଲନୀରେ ଅତିନିମ୍ନମାନର ଘର ନିର୍ମାଣ କରାଯାଉଛି । ସବବେସ ଅତିନମ୍ନମାନର ହେଉଥିବା ସେଠାରେ ରହୁଥିବା ଲୋକ ଅଭିଯୋଗ କରୁଛନ୍ତି । ତଳେ ବାଲିନେଇ କେବଳ ମାଟି ଓ ମୋରମ ଦେଇ ସବବେସ କରାଯାଉଥିବା ବେଳେ ଟିଣଘରୁ ବର୍ଷାରେ ପାଣି ମଧ୍ୟ ଗଳୁଛି ।  ଏହି ବିସ୍ଥାପିତ କଲୋନୀ ମଧ୍ୟଦେଇ ଜଙ୍ଗଲରୁ ଆସିଥିବା ନାଳ ବହିଯାଇଛି । ଗତଦୁଇଦିନ ତଳେ ପ୍ରବଳ ବର୍ଷାରେ ପାଣିଯାଇ ନପାରି ଅନେକ ଅନେକ ଲୋକଙ୍କ ଅସ୍ଥାୟୀଘରକୁ ପାଣି ପଶିଯାଇଥିଲା । ଫଳରେ ଲୋକମାନେ ନାହିଁ ନଥିବା ଦୁର୍ଦ୍ଦଶାରେ ରାତି କଟାଇଥିଲେ । ନାଳ ପାଣିକୁ ତଳକୁ ବହିଯିବାର ବ୍ୟବସ୍ଥା କରାଯାଇନଥିବାରୁ ବିସ୍ଥାପିତଙ୍କ ପାଇଁ ଏହା କାଳ ସାଜିଛି । ବିସ୍ଥାପିତ କଲୋନୀକୁ ଗତ ୨୦ଦିନ ହେଲା ଲୋକମାନେ ପରିବାର ଧରି ଆସି ଅସ୍ଥାୟୀ ଘରେ ରହୁଥିବା ବେଳେ ଗତ ଦୁଇଦିନ ତଳେ କଲୋନୀକୁ ବିଦ୍ୟୁତ ସଂଯୋଗ କରାଯାଇଛି । ତେବେ ଏପର୍ଯ୍ୟନ୍ତ କେବଳ ବିଦ୍ୟୁତଖୁଣ୍ଟରେ ବଲ୍ୱ ଲଗାଯାଇଛି କିନ୍ତୁ ଘରକୁ ବିଦ୍ୟୁତ ସଂଯୋଗ କରାଯାଉନାହାଁନ୍ତି । ଜଙ୍ଗଲ କଡେ କଲୋନୀ ରହିଥିବାରୁ ବନ୍ୟଜନ୍ତୁ ଓ ବିଷଧର ସାପଙ୍କ ଭୟ ଥିବା ବେଳେ ପ୍ରଶାସନ ସେହି ସମସ୍ୟାକୁ ଦୃଷ୍ଟି ଦେଉନାହିଁ ।

ତେବେ ଗଡଶଙ୍କର ଡୁଙ୍ଗୁରିପାଲି ଗାଁରେ ଲୋକଙ୍କ ପୂର୍ବରୁ ବହୁତ ପରିମାଣରେ ବିଦ୍ୟୁତବିଲ ବାକିଆଥିବା ଆଳ କରି ଟାଟାକମ୍ପାନୀ ବିସ୍ଥାପିତଙ୍କ ଘରକୁ ବିଦ୍ୟୁତ ସଂଯୋଗ କରୁନାହିଁ । ଆଜି ଆମେ ଏହି କଲୋନୀକୁ ଖବରସଂଗ୍ରହ ପାଇଁ ଯାଇଥିବା ବେଳେ ସେଠାରେ ଉପସ୍ଥିତ ଥିବା ଟାଟାକମ୍ପାନୀର କନିଷ୍ଠଯନ୍ତ୍ରୀ ଇଂ.ବଇଭବ ମଧୁକର ପାୱସଙ୍କୁ ପଚାରିବାରୁ ଆମକୁ ନିର୍ଦ୍ଦେଶ ରହିଛି ପୁରୁଣା ବିଲ ପଇଠ ନହେଲେ ବିଦ୍ୟୁତ ସଂଯୋଗ କରାଯିବ ନାହିଁ । ଏନେଇ ଲୋକମାନେ ଜିଲ୍ଲାପାଳଙ୍କ ପାଖରେ ଅଭିଯୋଗ କରିଥିଲେ ହେଁ ସେ ମଧ୍ୟ ବହୁତ ଟଙ୍କା ପାଇଛ ପୁରୁଣା ବିଦ୍ୟୁତବିଲ ଦେଇଦିଅ ବୋଲି କହିଥିବା ଲୋକମାନେ ଅଭିଯୋଗ କରିଛନ୍ତି ।  ଗତ ଦୁଇମାସ ହେଲା ଏମାନେ ଚାଉଳ ମଧ୍ୟ ପାଇନଥିବା ମଧ୍ୟ ଅଭିଯୋଗ କରିଛନ୍ତି । ଫଳରେ ପ୍ରଶାସନ ବିସ୍ଥାପିତଙ୍କ ପ୍ରତି ସମ୍ବଦନଶୀଳ ନୁହଁନ୍ତି ବୋଲି ବିସ୍ଥାପିତ କଲୋନୀର ଅଭି ପଧାନ,ଶ୍ରୀମତୀ ସତ ପଧାନ ଓ ଅନ୍ୟମାନେ ଅଭଯୋଗ କରିଛନ୍ତି । ଝାଙ୍କରପାଲି ବିସ୍ଥାପିତ କଲୋନୀରେ ସ୍କୁଲଗୃହ,ଅଙ୍ଗନୱାଡିକେନ୍ଦ୍ର,ଏଏନଏମକେନ୍ଦ୍ର ନିର୍ମାଣ ସହିତ ତୁରନ୍ତ ସମସ୍ତଗୃହକୁ ବିଦ୍ୟୁତସଂଯୋଗକରିବା,ପାନୀୟ ଜଳ ଯୋଗାଣ କରାଇବାକୁ ବିସ୍ଥାପିତମାନେ ଦାବି କରିଛନ୍ତି । ଏହି ସବୁ ଅଭିଯୋଗ ବିଷୟରେ କଲୋନୀ ପରିଦର୍ଶନରେ ଯାଇଥିବା ବଲାଙ୍ଗୀର ଗୋଷ୍ଠୀଉନ୍ନୟନ ଅଧିକାରୀ ଇପ୍ସିତା ପାତ୍ରଙ୍କୁ ପଚାରିବାରୁ ଖାଉଟିକାର୍ଡଗୁଡିକ ଅନଲାଇନରେ ଆବେଦନ କରି ପରିବର୍ତ୍ତନ କଲାପରେ ଚାଉଳ ପାଇବେ ବୋଲି କହିବା ସହିତ ଅନ୍ୟାନ୍ୟ ସମସ୍ୟାଗୁଡିକର ସମାଧାନ କରାଯାଉଛି ବୋଲି କହିଥିଲେ ।