13-Jun-2023

ବଲାଙ୍ଗିର(ପ୍ରେରଣା ଖବର)-ବଲାଙ୍ଗୀର ମହାରାଣୀ ସାଗରର ଉନ୍ନତିକରଣ ପାଇଁ ବଲାଙ୍ଗୀରରେ ରାଜନୀତି ଯୋରଧରିଛି । ଆଜି ମହାରାଣୀସାଗର ପୁସ୍କରିଣୀର ଉନ୍ନତିକରଣ ପାଇଁ ପୌରପାଳିକା ପକ୍ଷରୁ ଶୀଳାନ୍ୟାସ କରାଯାଇଛି । ରାଜ୍ୟସରକାରଙ୍କ ନଗରଉନ୍ନୟନ ବିଭାଗପକ୍ଷରୁ ଅମୃତ ୨.୦ ଯୋଜନାରେ ମଞ୍ଜୁର କରାଯାଇଥିବା ୧୨କୋଟି ୧୮ଲକ୍ଷ ଟଙ୍କାର ବ୍ୟୟଅଟକଳରେ ମହାରାଣିସାଗର ପୁସ୍କରିଣୀର ପଙ୍କୋଦ୍ଧାର କରାଯିବ । ସବୁଠୂଗୁରୁତ୍ୱପୂର୍ଣ୍ଣ ବିଷୟ ହେଲା ଏହି କାମକୁ ମହିଳାସ୍ୱୟଂସହାୟକ ଗୋଷ୍ଠୀମାନେ କରାଇବେ । ସେଥିପାଇଁ ଆଜି ହଜାରସଂଖ୍ୟା ମହିଳାଙ୍କ ଉପସ୍ଥିତିରେ ମୁଖ୍ୟଅତିଥି ଭାବରେ ଯୋଗଦେଇଥିବା ପୂର୍ବତନ ସାଂସଦ ତଥା ରାଜ୍ୟ ହାଉସିଂ କର୍ପୋରେସନର ଅଧ୍ୟକ୍ଷ କଳିକେଶନାରାୟଣ ସିଂଦେଓ ଏହି ପ୍ରକଲ୍ପର ଶିଳାନ୍ୟାସ କରିଛନ୍ତି । ବଲାଙ୍ଗୀର ପୌରାଧ୍ୟକ୍ଷା ଲିକା ସାହୁଙ୍କ ସଭାପତିତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ସମ୍ମାନୀତ ଅତିଥି ଭାବରେ ଜିଲ୍ଲାପରିଷଦର ଅଧ୍ୟକ୍ଷା ଦେବକୀ ସାହୁ,ପୌରାଉପାଧ୍ୟକ୍ଷା ଗାୟିତ୍ରୀ ଭୋଇ ଓ ସମସ୍ତ ବିଜେଡିକାଉନସିଲର ଯୋଗଦେଇଥିଲେ । ପ୍ରକଲ୍ପକୁ ଶୀଳାନ୍ୟାସ କରି କଳିକେଶ ସିଂଦଓ କହିଛନ୍ତି ଯେ,ସରକାର ଏବେ ନୂଆ ଯୋଜନାରେ ବିନା ବିସ୍ଥାପନରେ ବିକାଶ କାମ କରାଇବାକୁ ପ୍ରସ୍ତାବ କରିଛନ୍ତି । ତେଣୁ ପୂର୍ବରୁ ଯେଉଁ ପ୍ରସ୍ତାବ କରାଯାଇଥିଲା ତାକୁ ବଦଳାଯାଇ ନୂଆ ଅମୃତ ୨.୦ ଯୋଜନାରେ ମହାରାଣୀସାଗରକୁ ସାମିଲ କରାଇ ଏବେ ୧୨କୋଟି ଟଙ୍କା ଅଣାଯାଇଛି । ଯାହାକି ଏହାର ପଙ୍କୋଦ୍ଧାରରେ ଖର୍ଚ୍ଚ ହେବ । ଲୋକମାନଙ୍କୁ ଆଉ ବିସ୍ଥାପିତ ହେବାକୁ ପଡିବ ନାହିଁ । ସେହିପରି ପୌରାଧ୍ୟକ୍ଷା କହିଛନ୍ତି ଯେ,ଗରୀବଙ୍କୁ ହଇରାଣ କରାଯାଇ କୌଣସି କାମ କଲେ ବିକାଶ ହେବନାହିଁ ବରଂ ବିନାଶ ହେବ । ତେଣୁ ବିନା ବିସ୍ଥାପନରେ ନବୀନ ସରକାର ବିକାଶ କରାଇବାକୁ ଯୋଜନା କରି ଅର୍ଥ ଦେଇଛନ୍ତି । ଆଜି ଏହାର ଶୀଳାନ୍ୟାସ କରାଯାଇଛି । ଆଗକୁ ପଙ୍କୋଦ୍ଧାର ପରେ ଆହୁରି ଅନେକ ଅନୁଦାନ ଆସି ସୌନ୍ଦର୍ଯ୍ୟକରଣ କରାଯିବ ବୋଲି କହିଛନ୍ତି । ପ୍ରକାଶ୍ୟ ଯେ,ପୂର୍ବରୁ ମହାରାଣୀସାଗରର ଉନ୍ନତିକରଣ ପାଇଁ ୨୦କୋଟି ଟଙ୍କା ମଞ୍ଜୁର ହୋଇଥିଲା । କିନ୍ତୁ ତାହାର ଡିପିଆରରେ ୧ହଜାରରୁ ଅଧିକ ପରିବାରଙ୍କୁ ବିସ୍ଥାପିତ କରାଯାଇ କେବଳ ସୌନ୍ଦର୍ଯ୍ୟକରଣ କରାଯିବାକୁ ପ୍ରସ୍ତାବ ରହିଥିଲା । ସେହିକାମକୁ ସେତେବେଳେ ବିସ୍ଥାପିତ ହେବାକୁଥିବା ଲୋକେ ପ୍ରବଳ ବିରୋଧ କରିଥିଲେ । ତେଣୁ ସେହି ପ୍ରସ୍ତାବ ବଦଳି ଏବେ ନୂଆ ଯୋଜନାରେ ଅର୍ଥ ଆସିଥିବା ସୂଚନା ଦିଆଯାଇଛି । ଆଜିର ଏହି ଉଦଘାଟନୀ ଉତ୍ସବରେ କଳିକେଶନାରାୟଣ ସିଂଦେଓ,ପୌରାଧ୍ୟକ୍ଷା ଲିକା ସାହୁ,ଜିଲ୍ଲାପରିଷଦ ଅଧ୍ୟକ୍ଷା ଦେବକି ସାହୁ,ମହିଳା ବିଜେଡିର ଜିଲ୍ଲାସଭାପତି ଦମୟନ୍ତି ବାଗ,ଯୁବବିଜେଡି ସଭାପତି ରାଜେନ୍ଦ୍ର ହୋତା,ଛାତ୍ରବିଜେଡିର ସୁମନ ନନ୍ଦ,ନଗର ସଭାପତି ମହେନ୍ଦ୍ର ବାଗ,ବରିଷ୍ଠ ଆଇନଜୀବି ଓମକାର ନାୟକ,ବରିଷ୍ଠନେତା  ଲକ୍ଷ୍ମଣକୁମାର ମେହେର,ଭଗବାନ ବଗର୍ତ୍ତି,ନରସିଂ ବାଘ,ଶମ୍ଭୁ ନାଗ,ଇରସାଦ ଖାନ ପ୍ରମୁଖଙ୍କ ସହିତ ଶତାଧିକ ମହିଳା/ପୁରୁଷ ଯୋଗଦେଇଥିଲେ ।