13-Jun-2023

ବଲାଙ୍ଗିର(ପ୍ରେରଣା ଖବର) - ସ୍ଥାନୀୟ ସରକାରୀ  ଟାଉନ ବାଳିକା ଉଚ୍ଚ ବିଦ୍ୟାଳୟ ଠାରେ କଳାଧାମ ଅନୁଷ୍ଠାନ ର ବାର୍ଷିକ ଉତ୍ସବ “କଳାଧାମ ଉତ୍ସବ-୨୦୨୩”  ଉଦ୍‌ଯାପିତ ହୋଇଯାଇଛି । ଅନୁଷ୍ଠାନର ଅଧ୍ୟକ୍ଷ ଦିଲିପ ସିଂ ଦେଓ ଙ୍କ ସଭାପତିତ୍ୱରେ ଅନୁଷ୍ଠିତ ସଭାରେ ମୁଖ୍ୟ ଅତିଥି ଭାବେ ପୌରାଧ୍ୟକ୍ଷା, ବଲାଙ୍ଗିର ଲିକା ସାହୁ, ମୁଖ୍ୟ ବକ୍ତା ଭାବେ ଜିଲ୍ଲା ସଂସ୍କୃତି ଅଧିକାରୀ ରଶ୍ମୀ ରଞ୍ଜନ ମିଶ୍ର ଯୋଗ ଦେଇଥିଲେ । ଜୀବନ ଯାତ୍ରାକୁ ସୁସ୍ଥ କରିବା ପାଇଁ ନାଚ, ଗୀତ ଓ ନାଟକର ଆବଶ୍ୟକତା ଅଛି । ‘କଳାଧାମ’ ଅନୁଷ୍ଠାନ ଦୀର୍ଘ ବର୍ଷ ଧରି ଏ ଦିଗରେ ସାଧନରତ ଅଛି । ଏ ସାଧନା ପ୍ରଶଂସନୀୟ ବୋଲି ମୁଖ୍ୟ ଅତିଥି ଶ୍ରୀମତୀ ସାହୁ ନିଜ ବକ୍ତବ୍ୟରେ କହିବା ସହ ଏ ଅନୁଷ୍ଠାନ ଆଗାମୀ ଦିନରେ ଅଗ୍ରଗାମୀ ହେଉ ବୋଲି କହିଥିଲେ ।

ମୁଖ୍ୟ ବକ୍ତା ଶ୍ରୀ ମିଶ୍ର ନିଜ ବକ୍ତବ୍ୟରେ ବଲାଙ୍ଗିର ର ନୃତ୍ୟ, ସଙ୍ଗୀତ ପରମ୍ପରାରେ ‘କଳାଧାମ’ ଏକ ଚର୍ଚ୍ଚିତ ଅନୁଷ୍ଠାନ ବୋଲି କହିବା ସହ ଅନୁଷ୍ଠାନର ଉତ୍ତରତର ଉନ୍ନତିରେ ତାଙ୍କର ପୂର୍ଣ୍ଣ ସହଯୋଗ ରହିଛି ଓ ଆଗାମୀ ଦିନରେ ରହିବ ବୋଲି କହିଥିଲେ ।  ‘କଳାଧାମ’ ଅନୁଷ୍ଠାନର ଉପଦେଷ୍ଟା ନାଟ୍ୟଭୂଷଣ ଜଗଦାନନ୍ଦ ଛୁରିଆ ନିଜ ବକ୍ତବ୍ୟରେ ସଂସ୍କୃତି ହେଉଛି ପ୍ରଗତିର ବାହକ ବୋଲି କହିବା ସହ ଚିତ୍ର, ସଙ୍ଗୀତ, ନାଟକ ଆଦି କଳା ମନୁଷ୍ୟକୁ ସଂସ୍କୃତି ସଂପନ୍ନ କରେ, ଏଣୁ ଏ ଦିଗରେ ସମସ୍ତଙ୍କର ସହୃଦୟ ସହଯୋଗ କାମନା କରିଥିଲେ । ଅନୁଷ୍ଠାନର ସଭାପତି ମଧୁସୂଦନ ନାୟକ ମଞ୍ଚାସୀନ ଥିଲେ ।  

ମୁଖ୍ୟଅତିଥି ଶ୍ରୀମତୀ ସାହୁ କଳାକାରମାନଙ୍କ କଳାକୃତି ପ୍ରଦର୍ଶନୀକୁ ଉଦଘାଟନ କରିଥିଲେ ।  ଏହି ଅବସରରେ ଚୈତନ୍ୟ ମଟାରୀ, ମନୋରଞ୍ଜନ ବେହେରା, ନରେନ୍ଦ୍ର ନିଆଲ, କ୍ଷମା ସାଗର ଯୋଶୀ, ବିଶେଶ୍ୱର ପଟେଲ, ଲେଖାଙ୍କିକା ନାଏକ, ସୂରଜ କୁମାର ଅଗ୍ରୱାଲ ତଥା ରାଜ୍ୟ ସ୍ତରୀୟ ଜି. ସାର୍ଥକ ‘ସାରେଗାମାପା’ ର ବିଜେତା ଅଜୟ ଅମର ସିଂ ଦେଓ ଙ୍କୁ ସମ୍ବର୍ଦ୍ଧିତ କରାଯାଇଥିଲା । ସଭା ପରେ ଅନୁଷ୍ଠାନର ଛାତ୍ର ଛାତ୍ରୀ ମାନଙ୍କ ଦ୍ୱାରା ଗୁରୁଶ୍ରୀ ଦିଲିପ କୁମାର ସିଂ ଦେଓଙ୍କ ନିର୍ଦ୍ଦେଶନାରେ ଓ  ଏସ. ଶାନ୍ତିପ୍ରିୟା ଙ୍କ ନୃତ୍ୟ ନିର୍ଦ୍ଦେଶନାରେ ସାଂସ୍କୃତିକ କାର୍ଯ୍ୟକ୍ରମ  ପରିବେଷଣ ହୋଇଥିଲା । କାର୍ଯ୍ୟକ୍ରମର ସଂଯୋଜନା ରତ୍ନମୟ ତ୍ରିପାଠୀ କରିଥିବା ବେଳେ ଧନ୍ୟବାଦ ଦେଇଥିଲେ ଭକ୍ତ ନାଏକ ।